بعد الزحمة وأكل اللحمة.. أماكن في المنصورة ممكن تروحها في العيد
في العيد وزحمته ولحمته، مبنقدرش نستغنى عن الخروجات والفسح واللمة الحلوة مع العيلة أو الأصدقاء، وعشان انت من المنصورة وعاوز تخرج في العيد، هتلاقيها كأنها بنت بتنادي عليك فيها سر بيخليها دايما حلوه في عنيك، المنصورة بجوها الرائع وأماكنها الحلوة.
«شبابيك» بيرشحلك أماكن تقدر تخرج فيها انت وعيلتك أو صحابك، عشان تستمتع بالعيد، بس نصيحة.. «متكترش في اللحمة :D»
جزيرة الورد
الجزيرة دي مكانها في المشاية السفلية اللي بتطل على فرع رشيد من نهر النيل، وهناك ممكن تقضي يومك كامل في جو كويس وبأقل تكلفة، لأن هناك سعر التذكرة 2 جنيه بس، كمان لو معاك حد وحابب تركب مركب في النيل الساعة بـ 20 جنيه.
طب لو معاك أطفال هتعمل إيه؟ هناك فيه ملاهي للأطفال وفيها ألعاب كتير، وتذكرتها مش غالية، بجنيه واحد بس، بس اللعبة جوة بـ 10 جنيه.
دار ابن لقمان
من الأماكن التاريخية المعرفة في المنصورة واللي بيتباهى بيها أهلها لأنهم أسروا لويس التاسع وحبسوه في دار ابن لقمان، الدار موجودة في منتصف شارع بورسعيد المقابل للسكة الحديد، التذكرة فيه بـ 3 جنيه، ممكن تاخد عيلتك أو صحابك وتروحوا تستمتعوا بالصور التاريخية والمناظر هناك.
سينما مول الجامعة بلازا
ممكن بعد ما تخلص معايدة على قرايبك وصحابك، تروح مول الجامعة بلازا اللي موجود في امتداد شارع جيهان مقابل القرية الأوليمبية، من أحدث الأماكن في المنصورة وفيه محلات كتير ومطاعم وكافيهات وسينمات كتير.
الكافيهات والمطاعم
لو تعبت من اللف طول اليوم ما بين زيارات وخروجات، وعاوز تاخد ريست وتريح رجليك شوية، ممكن تروح شارع الجمهورية اللي مقابل لبوابة البارون قدام الجامعة، الشارع ده فيه عدد كبير من الكافيهات زي (بينشي كافيه، كابتشينو، كوفي لاونج،) كمان فيه مطاعم كتيرة زي (ستيك أوت، فرنش فريز، كنتاكي، كوك دور، ماكدونالدز، بيتزا هت، دجاج تكا).
اللمة الحلوة
مع إن العيد ده اسمه عيد اللحمة، بس فيه ناس مبتقدرش تستغنى عن معشوقتها الشوكولاتة أو الحلويات بشكل عام، ممكن تخطف رجل انت وصحابك وتروحوا مكان من دول (Flavors لمحبي Waffles، و Nola لمحبي الـ Cupcakes، و جزيرة Loca Loca اللي بيطل على النيل مباشرة، سينابون وذلك لمحبي القرفة.
