رغدة جلال الدين تكتب: تجربتي مع «شبابيك»
عاملين إيه؟
يارب تكونوا قضيتوا أجازة سعيدة :)
معاكم رغدة جلال الدين من أهدى مكان في العالم :D
أما بعد..
النهاردة تم سنة على افتتاح موقع «شبابيك» وعلى وجودي كمان كصحفية في الموقع وبالمناسبة ديه حبة أحكي ليكوا عن تجربتي :) .
بص ياسيدي اسمعي يا ستي :D
أنا اتخرجت من قسم دراما ونقد مسرحي، كلية أداب، جامعة عين شمس.. والقسم ده كان بيعلمنا إزاي نطلع نقاد مسرح متميزين وكان كل اللي بتمناه وأنا بدرس إني أشتغل في مجالي اللي هو النقد ومكنتش حبة إني أشتغل في مجال غير مجالي لأني هحس وقتها إني ضيعت سنين من عمري في دراسة حاجة وفي الأخر اشتغلت في حاجة تانية فمجرد إني أفكر في حاجة زي كدة كنت بضايق.
ولما اتخرجت، ملقتش مؤسسة نقدية أبتدي من خلالها أدرب وأكتب مقالات واشتغل فيها وعرفت إني لو عايزة أكتب لازم يكون جوا إطار، والإطار ده هو الصحافة اللي بيكون جوا جرايدها ومواقعها الإلكترونية قسم ينفع يتكتب فيه مقالات نقدية فنية أو مقالات رأي عن مواضيع حياتية.
بس مكنش عندي خبرة في الصحافة والحل طبعًا كان إني أتدرب عليها عشان مش هينفع إني أدخل الموقع الصحفي أقولهم أنا عايزة أكتب مقالات بس لأن أبسط رد اتقلي قبل كدة لما روحت مؤسسة لا داعي لذكر اسمها في الانترفيو «إنتي مين عشان تكتبي مقالات؟».. هو طبعًا أنا مش اسم معروف زي أسماء كبار النقاد بس كان ممكن أتدرب جوا المكان واتعلم بس محصلش نصيب.
وفي طريقي كان فيه ورشة صحفية اتدربت فيها وفهمت الأسس اللي مفروض أكتب بيها موضوع صحفي. وابتديت بقى أدور على مواقع إلكترونية أبعت ليها بس مكنش فيه حد بيرد عليا.. لأ في حد رد وروحتلوا اللي قالي الجملة بتاعة «إنتي مين» :D وطبعًا اتقفلت ومشيت لأني حسيت بإحتقار من الشخص ليا هو أكيد بيتكلم صح في فكرة إني مش ناقدة كبيرة عشان أقول رأيي بس خانوا طريقة التعبير.
وفي يوم
صاحبتي عملتلي منشن على موقع طالب صحفيين قولت أبعت يمكن يرودوا وبعدين لقتهم باعتين ليا ميل بيقولوا إني أكتب ليهم موضوع، وكتبته وبعته ولقتهم مكلمني وقالولي إنهم وافقوا عليا :) وده كان موقع «شبابيك»، ودي طبعًا كانت خطوة جديدة فتحتلي خبرة في مجال جديد وهو الصحافة زائد إني كمان هكتب مقالات خاصة بتخصصي. ديه بقى كانت تجربتي مع موقع «شبابيك» اللي حبة منها أقول لكل شاب وكل فِتاة :D إن لو اتخرجت وملقتش على طول شغل يخص مجالك عافر لحد ما تلاقي وهتلاقي ولو كان فيه شغل هو مش مجالك بس مواصفات الموظف فيه تنطبق على مواصفاتك روحوا واتعلمه واشتغل وحط في دماغك إن أي شغل بتشتغله ده بيبني ليك خبرة كبيرة تحطها في الـ«CV» بتاعك.
