«بهجج نفسك» مع حفلات ساقية الصاوي في أكتوبر
ساقية الصاوي من الأماكن الثقافية والفنية اللي بتشع بهججة في حي الزمالك.. لو عايز تعرف إيه أبرز الحفلات اللي هناك الشهر ده هنقول في التقرير ده على كل الحفلات اللي هتحصل في الساقية في أكتوبر عشان تعيش البهججة الحقيقة :D
فريق أندروميدا الغنائي
فريق "أندروميدا" هيقدم حفلة غنائية بمصاحبة موسيقى الروك يوم 2 أكتوبر الساعة 8 بليل على مسرح النهر. سعر التذكرة هيكون 50 جنيه.
و"أندروميدا" هو أقدم فريق للروك في مصر والشرق الأوسط والاسم نسبة إلى مجرة "أندروميدا" الفضائية أقرب المجرات إلى كوكب الأرض.
مسرحية حبيتك يا مصر
فرقة "أحلام مصر" هتعرض مسرحية حبيتك يا مصر على مسرح الحكمة الساعة 7 بليل يوم 3 أكتوبر.. والمسرحية تأليف وإخراج محمود عبد الناصر، وسعر التذكرة هيكون 15 و20 جنيه.
فرقة بسمة الأندلس للإنشاد الديني
فرقة "بسمة الأندلس" هتقدم حفلة انشاد ديني يوم 3 أكتوبر برضه الساعة 8 مساءً على مسرح النهر وسعر الحفلة هيكون 20 جنيه.
انطلاقة الفرقة في عالم الإنشاد الديني كانت سنة 1998 مع الألبوم الأول ليها «جينا نهني» وكان مدير الفرقة في الوقت ده مجدي عزوز.
فرقة مصر للموسيقى عربية
فرقة "مصر" هتقدم حفل موسيقى عربية يوم 4 أكتوبر الساعة 7 بليل على مسرح الحكمة وسعر التذكرة هتكون 30 جنيه.
الفرقة اتأسست في سنة 2015 وبتتكون من حوالي 30 عازف وبتقدم معزوفات موسيقية لمجموعة من الألحان الشهيرة.
الست أم كلثوم
"الست" هتقدم حفلتين في إطار مسرح العرايس يوم 6 أكتوبر على مسرح الحكمة الحفلة الأولى هتكون الساعة 6 بليل والحفلة التانية الساعة 8 بليل. وهتقدم خلال الحفلتين مجموعة من أشهر أغاني كوكب الشرق أم كلثوم زي "اسأل روحك" و"هذه ليلتي" .
سعر التذكرة هيكون 15 جنيه.
ستاند أب كوميدي
وفي يوم 6 أكتوبر برضه هيكون فيه حفل ستاند أب كوميدي الساعة 7 بليل على مسرح النهر في ساقية الصاوي، وسعر التذكرة هيكون 45 جنيه.
المنشد علي الهلباوي
المنشد علي الهلباوي هيقدم حفلة يوم 7 أكتوبر فيها مجموعة من الأغاني الدينية بمصاحبة الموسيقى الغربية الساعة 7 ونص بالليل، على مسرح النهر.. وهتسمع خلال الحفلة أغنية مرسال لحبيبتي، نسيم الوصل، قل للمليحة.
سعر التذكرة هيكون 40 جنيه.
مسرحية أغلى من الدهب
المخرج محمد الصاوي هيقدم عرض تحت عنوان "أغلى من الدهب.. الطفل المعجزة" وده في اطار مسرح العرائس يوم 7 أكتوبر الساعة 3 العصر، وسعر التذكرة هيكون 15 جنيه.
حفل انشاد ديني لوصلة سماع
فريق "وصلة سماع" هيقدم حفل انشاد ديني يوم 8 أكتوبر الساعة 7 بليل على مسرح الحكمة وسعر الحفلة هتكون 20 جنيه. والفريق بيتكون من مجموعة من المنشدين بيقوموا بأداء عدد من الاناشيد والابتهالات بشكل احترافي.
مسرحية عصفور برجل واحدة
وفي نفس يوم 8 أكتوبر هتتعرض مسرحية تحت عنوان "عصفور برجل واحدة.. متأسف ومتشكر" للمخرج محمد الصاوي الساعة 3 العصر، على مسرح الحكمة وسعر التذكرة هيكون 15 جنيه.
فرقة مولاي باند للإنشاد الصوفي
فريق |مولاي| هيقدم حفل انشاد صوفي يوم 9 أكتوبر الساعة 7 ونص بليل على مسرح النهر وسعر التذكرة هيكون 35 جنيه.
ورسالة الفرقة السلام والحب بغناء أشعار في حب الله و تبرز قيم التسامح في جميع الاديان السماوية.
عبد الحليم حافظ
العندليب الأسمر هيقدم حفلة في اطار مسرح العرائي في نفس يوم 9 أكتوبر الساعة 7 بليل على مسرح الحكمة وسعر التذكرة 15 جنيه.
فرقة كلام للبيع الغنائية
فرقة كلام للبيع هتقدم حفلة غنائية يوم 10 أكتوبر الساعة 7 ونص بالليل على مسرح النهر وسعر التذكرة هيكون 25 جنيه.
مسرحية عفاريت اكس بايرد
أما فرقة "ريجنسي بالاس" هتعرض مسرحية "عفاريت اكس بايرد" يوم 10 أكتوبر الساعة 7 بالليل على مسرح الحكمة وسعر التذكرة هتكون 20 جنيه.
العرض عن نص 8 حارة يوتوبيا ومن تأليف و إخراج رامي المصري.
فرقة عشاق الطرب للموسيقى العربية
فرقة "عشاق الطرب" هتقدم حفلة موسيقى عربية يوم 11 اكتوبر الساعة 8 بليل على مسرح الحكمة وسعر التذكرة هيكون 25 جنيه. والباند بيسعى لإحياء أغاني التراث وشارك في عدة حفلات منها حفلة سليم سحاب في دار الأوبرا المصرية.
ريسيتال بيانو وكمان لفؤاد ومنيب
محمد فؤاد وأحمد منيب هيقدموا حفل موسيقي يوم 12 أكتوبر الساعة 8 بليل على مسرح الحكمة وسعر التذكرة هيكون 35 جنيه. فؤاد ومنيب جمعهم حبهم للموسيقى وعملوا مشروع تحت عنوان مؤلفات محمد فؤاد باعادة توزيع أحمد منيب وقدموا عدة حفلات.
فرقة الخان للموسيقى العربية
فرقة "الخان" هتقدم حفلة موسيقى عربية في نفس يوم 12 أكتوبر الساعة 8 بالليل على مسرح النهر سعر التذكرة 25 جنيه. والفرقة اتأسست سنة 2014 وهدفها إحياء التراث القديم والحديث.
موسيقى كمان لعمر عقل
عمر عقل، هيقدم حفل موسيقى كمان يوم 13 أكتوبر الساعة 8 بليل على مسرح الحكمة وسعر التذكرة 20 جنيه ودرس عمر الموسيقى والعزف على الكمان على يد كل من الدكتورة نيڤين المحمودي والدكتور حسن شرارة وهو عضو في أوركسترا وتريات أوبرا الإسكندرية.
فرقة مسار اجباري
فرقة "مسار اجباري" هتقدم حفلتين يوم 14 أكتوبر الحفلة الأولى هتكون الساعة 4 العصر والتانية الساعة 8 بليل على مسرح النهر وسعر التذكرة 60 جنيه.
اتأسست "مسار إجباري" سنة 2005 وقدمت الفرقة من أول ما طلعت مجموعة من الألبومات المتميزة اللي خلت تكبر في وقت قصير.
أسامة الهادي
أسامة الهادي هيقدم حفلة غنائية يوم 20 أكتوبر الساعة 7 بليل على مسرح الحكمة وسعر التذكرة هيكون 25 جنيه. وأسامة بجانب إنه بيغني فهو كمان بيكتب وبيلحن أغاني.
فرقة الإخوة أبو شعر للإنشاد الديني
فرقة "الإخوة أبو شعر" هتقدم حفل انشاد ديني يوم 22 أكتوبر على مسرح النهر الساعة 8 بليل وسعر التذكرة هيكون 40 جنيه.
و"الإخوة أبو شعر" أو فرقة أبو أيوب الأنصاري هى فرقة إنشاد إسلامية سنية سورية.
فرقة ميوزيفوريا الموسيقية
فرقة "ميوزيفوريا" هتقدم حفلة موسيقية يوم 22 أكتوبر برضه الساعة 8 ونص بليل على مسرح الحكمة وسعر التذكرة هيكون 25 جنيه.
والفرقة اتأسست في القاهرة على يد حسن شرارة وبتعتمد على الآلات الموسيقية وبتقدم موسيقى العصر الحديث.
حفل موسيقى عربية
الملحن محمد عبد العزيز هيقدم حفل موسيقى عربية تحت عنوان الحرافيش بمصاحبة المايسترو جمال نوفل والفنان ياسر بدوي يوم 24 أكتوبر الساعة 7 بليل على مسرح النهر وسعر التذكرة هيكون 25 جنيه.
ولحن عبد العزيز مجموعة من الألحان المتميزة منها لحن أغنية حب الرمان للمطرب محمد العزبي.
فرقة المولوية
فرقة "المولوية" هتقدم حفل انشاد ديني يوم 27 اكتوبر الساعة 7 بليل على مسرح النهر وسعر التذكرة هيكون 35 جنيه. والفرقة مختصة في الإنشاد الديني والأغاني الصوفية ويقودها الشيخ عامر التوني.
