في جامعة أسيوط وبتحب تتصور؟ الأماكن دي هتعجبك
كتب- لمياء محمد وشيماء محمد
طبعا كلنا لما بنروح مكان جديد بنحب نفضل فاكرين المكان ده، وبنحب نتصور عشان نفضل محتفظين بصورنا وذكرياتنا، وبما إنك سنة أولى جامعة فأكيد هتكون عاوز تتصور في أماكن في الجامعة عشان دي مرحلة جديدة في حياتك.
«شبابيك» رصد أبرز الأماكن اللي طلاب جامعة أسيوط بيتصوروا عندها عشان يعرفهالك، وتروح تتصور لو حابب قدام الأماكن دي، ومتنساش تبعتلنا صورتك :)
نافورة الجامعة والمبنى الإداري
دي من أكتر الأماكن المشهورة داخل جامعة أسيوط ومميزه لأنها قدام المبنى الإداري في الجامعة والمعروف بتصميمه المميز اللي تقدر تتصور وهو وراك، ودي صور لشكلها ومنظر المكان.
قاعة النيل
من أكبر القاعات في الجامعة، بيتم فيها فيها أغلب الحفلات واللقاءات والندوات، طلاب كتيرة بتحب تتصور داخل أو خارج القاعة، مكانها أمام كلية التجارة، ودي صور علشان أول ما تروح هناك تعرفها.
بوابة الجامعة
طبعا من أهم الصور إنك تتصور قدام جامعتك وتثبت حضورك فيها، واحنا هنعرفك أكتر بوابات الجامعة اللي تقدر تتصور قدامها، بوابة شارع الجامعة أو شارع المكتبات ودي البوابة الرئيسية في الجامعة، بوابة القرية الألومبية مكانها قدام نافورة الجامعة، البوابة التانية بوابة الترعة أو كورنيش الجامعة ومكانها الجهة المقابلة للجامعة.
بوابة القرية الأوليمبية
كلية العلوم
المكان بيتميز بالمساحة وتنظيمها، واتساع المكان، والأهم إن الكلية متوفر فيها متحف للحيوانات تقدر تاخد أكتر من منظر، المتحف موجود في قسم الحيوان بالكلية.
قاعة الدكتور محمد رأفت
المكان مليان خضرة وأشجار تقدر تتصور فيه مع أصحابك وتشاركم بيها، المكان قدام كافتريا بيتو وقريش.
ساحة كلية الهندسة
من الأماكن طلبة كتير بتحب تتصور قدامها، المكان مساحته واسعة وفيه أماكن للجلوس كتير وبشكل منظم وجذاب للعين، تقدر تتصور فيه مع صحابك قدام الأشجار والخضرة.
كلية حاسبات ومعلومات
كلية فيها جناين وكافتريا شكلها جميلة، أماكن كتير داخل الكلية ملونة بالوان جذابة، الأرضية والسلالم أغلبها ملونة صورتك هتبقى أحلى لما تتصور قدامها
