صورة من حلقة سابقة من برنامح "البرنامج؟ مع باسم يوسف" عن التطبيل
هي ليه الناس بتطبل؟.. طب يعني إيه تطبيل؟
«طبلي طبل على طبلي خليك حنين طب طبلي»، دي أغنية لمحمد فؤاد من زمان بس الموضوع مش على قد الأغنية بس لأن التطبيل بقى أسلوب حياة البعض في المجتمع.
في الموضوع ده من «شبابيك» هنعرف امتى الواحد بيطبل؟، وليه؟، وأيه أبرز عبارات التطبيل؟ وأخرته إيه؟
مصلحة
أميرة حلمي بتقول إن السبب الرئيسي ورا التطبيل «هو المصلحة اللي بتخلي الواحد يطبل ويقول كلام جميل لحد عشان يعمله الحاجة اللي عايزها منه».
وندى عبد الجواد بتتفق مع «أميرة» في إن التطبيل بيكون عشان خاطر الواحد عايز مصلحة عند الشخص اللي بيطبله، يعني فيه موظف بيطبل لمديره في الشغل عشان عايزه يرقيه مثلًا.
حب التفخيم
«أميرة» بتقول كمان إن فيه سبب تاني للتطبيل، وهو إن فيه ناس بتحب اللي يفخمها ويقولها كلام جميل وخصوصًا الناس الكبيرة في السن، فالواحد بيضطر يديلهم جرعة زيادة من التطبيل عشان يكسب ودهم وميزعلوش منه.
«أميرة» شايفة إن في الحالتين التطبيل شيء سلبي لأن لازم الواحد يكون عنده الشجاعة الكافية ويواجه الشخص باللي في قلبه ليه، وميطبلش بكلام عكس اللي هو حاسه.
جمل التطبيل الشهيرة
ندى إبراهيم بتؤكد برضه إن التطبيل بيكون عشان مصلحة، ورصدت جمل التطبيل الشهيرة اللي بتسمعها دايمًا في الشغل واللي كلها بتدور في فكرة إن الشخص عنده مصلحة عند المدير فبيطبل ليه وبيقول «هو في زيك يا ريس»، و«دي الإدارة من غيرك كانت مضلمة»، و«إحنا بنتنفس بوجودك»، و«مكنتش عارف أنام يا ريس عشان زعلان مني :D».
خوف من الحبيبة
عبد الله شاهر بقى بيتفق مع نقطة إن التطبيل بيكون عشان خاطر مصلحة وبيقول كمان إن التطبيل بيكون موجود في العلاقات العاطفية.
يعني لو الشخص عمل حاجة عارف إن حبيبته هتتضايق منها فهيخاف إنها تعرف وعشان يداري على ده، بيوافق على أي حاجة تقولها، ويقولها كلام مدح زيادة عن اللزوم عشان يغلوش على اللي عمله.
سبب التطبيل
دكتورة علم النفس سلوى عبد الباقي بتقول إن السبب في إن الشخص بيطبل هو إنه من صغره حاسس بالدونية، وإنه أقل من الناس لأن أهله مزرعوش فيه فكرة إنه يكون واثق من نفسه، ودي نقطة لازم تاخدوا بالكوا منها في تربية أولادكم في المستقبل، وهي إنكم لازم تخلوهم واثقين في نفسهم وتشجعوهم على إنهم ينموا مواهبهم عشان يحسوا بذواتهم.
والسبب التاني إن ممكن يكون والده أو والدته مطبلاتية وهو توحد بيهم وبقى يمشي على نهجهم في التطبيل.
والشخص المطبلاتي ده لما كبر بقى يشوف إن كل ما هيطبل للناس ويقولهم كلام مديح زيادة عن اللزوم كل ما هيحسسوه بقيمة نفسه، وهيشبعوا ذاته الفاقدة لإحساس الثقة.
نظرة المجتمع
وبتكمل دكتورة «سلوى» وبتقول إن المجتمع بيعرف على طول الشخص المطبلاتي لأن المبالغة في الكلام بتكون زيادة عن الحد واللي بيزيد عن حده بينقلب لضده وبيخلي المجتمع يكره الشخص المطبلاتي ويرفض إنه يتعامل معاه.
كي لا تكون مطبلاتي
وعشان متكونش مطبلاتي دكتور «سلوى» بتقولك إن عليك إنك تكون متوازن في كلامك مع الناس لأن المبالغة الزيادة في الكلام بتحسس الطرف الأخر إنك شخص مطبلاتي.
