من الأقاليم للقاهرة.. طلاب يروون معاناتهم في رحلة البحث عن سكن
بدأ العام الدراسي الجديد بجامعة الأزهر وبدأت معه معاناة الطلاب الجدد الملتحقين بالجامعة -خاصة الوافدين من محافظات الأقاليم- بسبب بعد المسافة بين محل إقامتهم وفرع الجامعة بالقاهرة، وكذلك أزمة البحث عن سكن مناسب يضطرهم للوقوع تحت رحمة السماسرة.
«الأزهر» في أول يوم دراسة.. كليات خارج الخدمة وجولة مبكرة لرئيس الجامعة
في هذا التقرير يرصد «شبابيك» حكاوي الطلاب الجدد بجامعة الأزهر عن معانتهم في الحصول على مسكن.
يحكي عبدالحميد أحمد الطالب المستجد بالجامعة «أنا واحد من محافظة الغربية علشان ألاقي سكن مناسب ليا هنا قضيت يومين في القاهرة أدور وكل ما أروح لسمسار بحس أنهم بيستغلونا لأننا لسه أول سنة ومش فاهمين الدنيا، ولقيته بيحط أسعار سكن خيالية دا غير تأمين وسماسره وخلافه».
4 أتوبيسات لنقل الطلاب داخل جامعة الأزهر بأسيوط
أما ناجح محمد فقال « أنا من المنيا وداخل كلية طب الأسنان من كليات القمة، فمرتب نفسي إني هسكن مدينة على طول فلما سألت على المدينة قالولي مش هاتفتح إلا في آخر الترم الأول، وأنا دلوقتي مش عارف هاسكن فين وماعنديش حد هنا أقعد معاه يومين لحد ما أدور على سكن».
جامعة الأزهر: الإعلان عن موعد تسكين المدن الأسبوع المقبل
وأصدرت جامعة الأزهر، السبت، بيانا بأنه سيتم الإعلان عن موعد تسكين الطلاب بالمدن الجامعية نهاية الأسبوع المقبل، وذلك بعد الاطمئنان على توريد التغذية اللازمة والانتهاء من أعمال الصيانة.
محمد أحمد يسرد تفاصيل حكايته من بيته للجامعة «أنا جيت من بلدنا الفيوم النهاردة على أساس إن الدراسة بدأت وهنبدأ محاضرات ماعرفش إن أول أسبوع كدا مش هناخد فيه محاضرات، ولما أدور على سكن علشان أسكن فيه لقيت الأسعار غالية جدا بتصل لـ3 آلاف جنيه سعر الشقة الواحدة ومعنديش مقدرة أدفع بالغ كبيرة زي دي، وبكدا هنكون مضطرين نسكن بأعداد كبيرة في الشقة الواحدة، وده هيأثر علينا طول الدراسة ومش هنعرف نذاكر، ولما حبينا نشوف سكن رخيص وسعره معقول لقينا بس بعيد عن الجامعة جدا وهياخد وقت كبير علشان أوصل للجامعة وهتأخر عن محاضرتنا كدا، واحنا مش عارفين نعمل إيه دلوقتي».
الصيانة تؤجل الدراسة بـ«شريعة وقانون» الأزهر (صور)
أختلفت قصة محمود حسن من كفر الشيخ في رحلة البحث عن سكن، عن سابقيه، فقال «كنت قلقان جدا من حكاية السكن لما التنسيق رشح لي كلية التربية في القاهرة، وخصوصا إني معرفش حاجة في القاهرة ولا عمري جيتها قل كدا، بس لما اتكلمت مع أصحابي الأكبر مني وسألتهم فهموني الدنيا، وواحد منهم خدمني وشاف لي سكن معاه الفرد بـ300 جنية وإحنا 7 أفراد في الشقة ومساحتها ضيقة أوضتين وصالة، وأضاف هاعمل إيه مش مافيش قدامي غير كدا ومضطر لكدا، والمفروض الجامعة تحس بينا بقا وتفتح المدينة لأننا متغربين وأول سنة ولسه تايهين».
وبدأ العام الدراسي الجديد 2016/2017 بجامعة الأزهر اليوم السبت، وذلك بعد العام في الجامعات الأخرى السبت الماضي 24 سبتمبر.
