امسكي في اللي بيخاف عليكي.. 6 دروس من «حكايات بنات»
«سكك البنات يجي ميت سكة، يجي بالأصول يلاقيني فكة، أنا مسعدوش لو اشيل منه، ولا ارحموا لو في شكة».
مسلسل «حكايات بنات» من المسلسلات اللي قدرت تعبر عن حكاياتنا اللي بنعيشها في الحياة، والواقع ده تقدر تطلع منه بمجموعة من الدروس اللي هتفيدك في حياتك :).
صديقك سندك
كل واحد مننا بيحتاج لصديق في حياته يقف جنبه وقت شدته، ويساعده يتخطى أي أزمة يمر بيها ويحاول يبسطه ويطمنه بكل الطرق، ولو وقع في يوم يلاقي ايده سانداه وبتطبطب عليه وده الصديق اللي لازم تختاره في حياتك.
مسلسل «حكايات بنات» أكد قيمة الصداقة في حياة الإنسان من خلال العلاقة القوية اللي جمعت بين «أحلام» و«كاميليا» و«مريم» و«سلمى» اللي قدروا وهما مع بعض يتخطوا أي أزمة مروا بيها في الحياة، وكل مشهد بينهم بيأكد على مقولة «اختار الصديق قبل الطريق».
حدد هدفك في الحياة
اتخلقنا في الحياة عشان نسعى فيها ونحقق الهدف اللي بنحلم بيه ولو عندك مشكلة في تحديد هدفك في الحياة هتوه وسط الزحمة وهتقع في مشاكل كتيرة منها اللي ربنا هيسترها معاك وهتطلع منها زي الشعرة من العجينة.
ومنها برضه اللي هتقع فيها وحالتك النفسية هتبقى في النازل زي ما «سلمى» حالتها النفسية كانت سيئة من كتر ما هي مش عارفة هي عايزة تشتغل أيه. ومن كتر التجارب اللي دخلتها وفشلت فيها وعشان كده عليك إنك تحدد هدفك عشان متوهش وسط زحمة الحياة وتفقد نفسك.
اتمسكي باللي بيخاف عليكي
الشخص اللي بيحبك وبيخاف على مصلحتك امسكي فيه ومتبصيش ليه إنه بيدخل في حياتك أو بيحاول يفرض سيطرته عليكي لأنه بالعكس تمامًا هو بيحبك وعايز يشوفك بخير زي ما «يوسف» في كذا مشهد في المسلسل كان بينصح «سلمى» لأنه بيحبها وعايزها تحدد هدفها ومتضيعش نفسها في تجارب هتجبلها مشاكل وهتأذي بيها نفسها.
حافظي على قلبك
مشاعرك دي عاملة زي الكنز مينفعش تطلع الا للشخص اللي صارحك من أول علاقتكوا بحبه ليكي، وخلاكي تطمني وتطلعي مشاعرك اللي بتعبر عن حبك ليه من زمان. وده عشان تحافظي على قلبك من الوقوع في حب شخص غلط.
شخص حسسك بكل كلامه وأفعاله إنه بيحبك ويوم ما واجهتيه سابك ومشي والشخص ده طبعًا مكنش صريح معاكي في البداية، هو بس حسسك بالحب لكن مكنش عنده الجرأة إنه يعترفلك بحبه وطبعًا الشخص ده مينفعش تبني آمالك في الحب عليه.
و«عاصم» مثال للشخص ده اللي حسس «أحلام» إنه بيحبها بكل كلامه وأفعاله وخلاها خلاص تحس إنها لقت فتى أحلامها اللي هتعيش معاه في تبات ونبات وفجأة بعد كل ده سابها وسافر.
صارح حبيبتك بحبك
حبيتها وواثق إنك قد المسؤولية يبقى صارحها بحبك على طول متخافش، ومتترددش، ومتخمنش إنها مش هتستحمل معاك المشوار. قول اللي في قلبك على طول ليها وده عشان مضيعهاش من ايدك.
متعملش زي «عاصم» اللي حب أحلام لكنه مصارحهاش بحبه ده عشان كان خايف زي ما شرح في الفيديو اللي في النقطة السابقة إن لو اتجوزها العلاقة بينهم تفشل زي ما فشلت علاقته مع مراته قبل كده، هو خمن حاجة غلط وبنى على أساسها علاقته مع «أحلام» وضيعها من ايده.
متتجوزيش ابن أمه
ابن أمه جملة بتتقال على واحد شخصيته ممسوحة ومامته هي اللي مسيطرة عليه وعلى قراراته تمامًا والشخص ده للأسف هيتعبك معاه في الحياة ومش بس كده ده أنتي كمان هتتعبي مع مامته اللي هتلاقيها متدخلة في كل تفاصيل حياتك وحطاكي تحت المنظار.
واللي بيوضح الكلام ده شخصية «كاميليا» لما ارتبطت بـ«كريم» اللي كان واضح من البداية إن مامته متحكمة في مصيره بس «كاميليا» لأنها بتحب «كريم» مبصتش على ده.
لكن اللي خلاها تحس ده قوي لما طلعت مش بتخلف فمامت «كريم» أصرت إنهم يطلقوا وجوزت ابنها لبنت أختها بدون ما «كريم» يرفض قرار مامته ده ويصر إنه يتمسك بـ«كاميليا» وسابها بناءً على طلب مامته.
