الفرق بين الإنجليزي الأمريكي والبريطاني.. إيه الأفضل؟

لما بنيجي نتعلم لغة إنجليزية بنلاقي نفسنا قدام حيرة شديدة، نتعلم إنجليزي أمريكي ولا إنجليزي بريطاني؟ إيه فيهم أسهل من التاني؟ وإيه فيهم أهم؟ ويا ترى هل الفرق بينهم كبير لدرجة أنه ممكن يلخبطني وأنا بتعلم اللغة؟

الإنجليزي زيه زي أي لغة في العالم هتلاقي فيه لهجات بعدد الدول والمدن كمان اللي بتسخدمه؛ لكن أشهر لهجتين معتمدتين اللهجة البريطانية واللهجة الأمريكية.. ولأنهم مجرد لهجتين للغة واحدة، فلازم نعرف أن البريطاني مش بيختلف كتير عن الأمريكي بالدرجة اللي ممكن تلخبطنا لكن بيكون فيه بعض الاختلافات البسيطة في طريقة النطق وقواعد اللغة.

اختلاف الكلمات المستخدمة

الإنجليزي هتلاقي فيه أكتر من كلمة بتدي نفس المعنى دون أي اختلاف.  زي مثلا كلمة «Biscuits» اللي متاخدة منها كلمة «بسكويت» بالعربي، وكلمة «Cookies» يعني بسكويت برده.

طيب إيه الفرق بينهم؟ وليه بنستخدم أكتر من كلمة عشان نعبر عن نفس المعنى؟

الإجابة ببساطة أن كلمة «Biscuits» هي إنجليزي بريطاني. وكلمة «Cookies» إنجليزي أمريكي.

مثال تاني لكلمة بنستخدمها كل يوم وهي «Movie» يعني فيلم سينمائي، بالإنجليزي الأمريكي. وكلمة «Film» يعني فيلم برده لكن بالإنجليزي البريطاني.

وزي كلمة «Candy» ومعناها حلوى أو «بونبوني» بالإنجليزي الأمريكي. وكلمة «Sweets» بالإنجليزي البريطاني، ومعنها برده حلوى أو بونبوني.

فرق في كتابة بعض الكلمات

وبعض الكلمات القليلة في اللغة الإنجليزية بتختلف كتابتها أو الـ «Spelling» بتاعها بين الإنجليزي البريطاني والأمريكي.

فروق في الجرامر

قواعد الجرامر في اللغة الإنجليزية واحدة، لكن برده فيه فروق بسيطة بين بعض القواعد بين الإنجليزي البريطاني والأمريكي.  

فمثلا في تصريف الفعل للماضي البسيط «Past Simple» الكلمات اللي آخرها حرف «L» بنضاعف الحرف في الإنجليزي البريطاني.

كلمة Travel»» في الماضي هتبقى Travelled»  » بالبريطاني. وبالأمريكي هتبقى Traveled» . من غير ما نزود «L».

بالبريطاني هنقول I travelled to china. وبالأمريكي I traveled to china. يعني أنا سافرت الصين

مثال آخر

في الكلام عن المستقبل البريطانين بيحبوا يستخدموا «Shall» بدل «Will» فبيقولوا «I shall go home» يعني أنا هروح البيت. وبالأمريكان «I will Go Home».

ملكش حجة.. قنوات لتعليم الإنجليزي والشرح بالعربي

 طيب ليه لازم أعرف كل ده؟

لو ناوي تسافر بره أو تشتغل في شركة أجنبية جوه مصر، يبقى لازم تحدد  من الأول هتختار إنجليزي بريطاني أو إنجليزي أمريكي من البداية.

لأنها بتفرق لما تتكلم نص كلامك إنجليزي أمريكي والنص التاني بريطاني. بيبقى باين أوي أنك مش متمكن من اللغة ومش فاهم الفروق بينهم حتى لو بسيطة؛ زي اللي بيتكلم نص كلامه مصري والنص التاني شامي :D 

أختار بريطاني ولا أمريكي؟

أنت اللي بتحدد بنفسك على حسب أنت عايز تعمل ايه بالإنجليزي اللي هتتعمله. لو عايز تتعلمه لنفسك أو عشان تشتغل في شركة مصرية بتتعامل بالإنجلش أو عشان تسافر وتلف العالم. يبقى مش هتفرق هتختار إيه فيهم.

لكن لو أنت حابب تدرس في جامعة معينة بريطانية أو أمريكية أو تسافر بلد معينة، يبقى لازم تكون مدرك للهجة اللي هيحتاجها المكان اللي عينك عليه كويس أوي.

مينفعش يبقى طموحك تدرس في أمريكا وتروح لهم بتتكلم إنجليزي بريطاني، أو العكس.

ولو هتسافر دولة غير أمريكا وغير إنجلترا أو بريطانيا، يبقى لازم تعرف اللهجة اللي بتستخدمها. دولة زي كندا أو أستراليا بتعتمد الإنجليزي البريطاني في الشهادات الدولية.

ببلاش اتعلم إنجليزي على إيد الأجانب

الشهادات المعتمدة

عشان تدرس أو تشتغل بره بيكون مطلوب منك شهادة معتمدة عالميا تقول أنك متقن للغة الإنجليزية.

بالنسبة للإنجليزي الأمريكي، فتحتاج لشهادة التويفل، اللي تقدر تحصل عليها من الجامعة الأمريكية بالقاهرة أو من معهد «أميديست» الأمريكي.

وبالنسبة للإنجليزي البريطاني هتحتاج شهادة الآيلتس. وتقدر تدخل الاختبار بتاعها وتحصل عليها من الـ«بريتش كونسيل» أو المجلس الثقافي البريطاني.

أماكن تانية

لكن لو عايز تتعلم بس ومش مهتم بالشهادة في الفترة الحالية، فممكن تروح معهد «بيرلتز» المتخصص في الإنجليزي البريطاني. 

وبالنسبة للإنجليزي الأمريكي فممكن تروح «S.Y.E» أو «Spread Your English».

وأي مكان تاني هتروحه لازم تسألهم الأول إيه نوعية الإنجلش اللي هيدوه، أمريكان ولا بريتش؟

وبالنسبة للكورسات الأونلاين؟

ولو أنت من المهتمين بالكورسات الأونلاين، فموقع «Coursera» هتلاقي فيه أغلب كورسات اللغة أمريكان إنجلش لأنها مقدمة من جامعات أمريكية.

وفي موقع «Future Learn» هتلاقي أغلب الكورسات بريتش إنجلش ومقدمة من جامعات بريطانية.

Future Learn.. كورسات ببلاش من أفضل الجامعات