فن البانتوميم.. تعالى واحنا نقولك «اسمه إيه»
فن البانتوميم من الفنون اللي بتعتمد على الإيماءة مش الكلام، واللي بيقدمها لازم يكون ممثل محترف يقدر يخلي الجمهور يديه سوكسيه.
وفريق «اسمه إيه» قدر يخلي الجمهور يستمتع وهو بيتفرج على عروضه، وعشان كده حبينا إننا نعرف عنه أكتر من خلال حوارنا مع أحمد برعي أحد أعضاء الفريق.
كاست تجارة
بيقول «برعي»: «دخلت كلية تجارة جامعة القاهرة على حسب مجموعي لأن دي مكنتش رغبتي من البداية، وفي وسط ما أنا بدرس عرفت إن فيه فريق مسرح في كلية تجارة واتحمست إني أدخله وكنت مبسوط جدًا إني بمثل جوا فريق معظم النجوم اللي موجودة دلوقت في الساحة الفنية كانت فيه زي مثلًا علي ربيع ومحمد فراج».
مهرجان أفلام للموبيل
أول مسابقة اشترك فيها فريق «اسمه ايه» كان مهرجان أفلام للموبيل سنة 2008، وكان بيشارك فيه بفيلم «سندريلا» ومدته 3 دقايق. وشركة «جود نيوز» هي اللي كانت بتنتجه، والفيلم حصل على المركز التاني زي ما قالنا «برعي».
أول عرض تمثيلي مسرحي
مسرحية «هارديبس» كانت أول عرض للفريق، وتم عرضها ليلة واحدة في مسرح «الجيزويت»، وكان مؤلفها الكاتب ورقيب المصنفات الفنية ناجي عبد الله.
ويقول «برعي»: «كنا مبسوطين جدًا بوجود ناجي معانا على طول في البروفات لأن وجود المؤلف مع الممثلين بيفرق كتير معاهم وده عشان نسأله على كل تفاصيل الشخصيات اللي من خلالها نقدر نحول الكلام المكتوب على النص لصورة حية متميزة الجمهور يشوفها».
ويضيف «بعد العرض ده عملنا في سنة 2011 عرض تاني اسمه ديوان البقر لأبو العلا السلاموني وعرضناه في مهرجان بجمهورية زفتى وميت غمر».
الإتجاه للبانتوميم
يقول «برعي»: «في نفس وقت عرضنا لمسرحية ديوان البقر كان بيتعمل مهرجان الساقية للبانتوميم فقدمنا فيه عرض بابا وماما والبزازة والعرض حصل على جايزة أفضل ممثلة أولى وراحت لهدير أسامة».
سر «اسمه إيه»
وعن سبب تسمية الفريق بـ«اسمه إيه» قال «برعي»: «سمينا الفريق اسمه إيه لأننا حاسين من وقت كبير إن المسرح فن مهمش. صحيح لما جه مسرح مصر ابتدت الناس تهتم وتنزل تحضر عروض، لكن قبل كده لأ وعشان كده قررنا اننا من خلال فريقنا نعرف كل الناس على فن المسرح اللي الناس كانت بتهمشه وتقول عليه اسمه ايه؟».
فن البانتوميم
بيقول «برعي» إن فن البانتوميم عكس المسرح، والتحدي كان إزاي أوصل للجمهور إنه يصدق اللي بمثلوا من غير ما أتكلم، وأخليه يتفاعل معايا زي ما بيتفاعل بالظبط وهو بيتفرج على عرض مسرحي.
والبانتوميم اعتماده الأساسي بيكون على الممثل، ومفيش عدد محدد للممثلين فيه، وعروضه مش بتتكلف مصاريف كتيرة بعكس المسرح اللي بيحتاج ميزانية مناسبة عشان تقدر تغطي عناصر العرض من ملابس وديكور وماكياج واكسسوارات وغيرها من العناصر.
اللقاء مع صفاء محمدي
بيتابع «برعي» إن في سنة 2010 «اشتركنا تاني في مهرجان الساقية للبانتوميم وعرضت أنا ونرمين حبيب أحد عضوات الفريق عرض بابا وماما والبامبينو وأخدنا المركز التالت.. بعدها بشهر جاتلنا فرصة نعرض مرة تانية في مكان تاني بس كانت نرمين ظروفها مش سامحة تمثل وجات صفاء محمدي ومثلنا العرض سوا».
من ساعتها واحنا سوا
بيحكي «برعي» قصته مع «صفاء» وبيقول: «اتعرفت عليها لما شوفتها في العرض واتجوزنا ومن ساعتها أنا وهى سوا.. وبيتنا عبارة عن أوضة نوم وصالة عملناها ستوديو بنتدرب فيه بشكل يومي لأننا حابين نبذل كل جهدنا في تقديم عروض متميزة تخلي الجمهور يحب فن المسرح».
مبادرة ماستر بيس
«برعي» بيقول عن مباردة «ماستر بيس» إنهم كانوا بيعملوا ايفينتات لنشر السلام وطلبوا منهم يعرضوا عندهم عرض في شارع نادي الصيد في الدقي ودي كانت أول تجربة ليهم في الشارع.
مسرح الشارع
وبيكمل «برعي» وبيقول إن «تجربة مسرح الشارع كانت جديدة بالنسبة لينا وليها تأثير إيجابي علينا وخلتنا نتجه لعروض مسرح الشارع بجانب عروضنا على خشبة المسرح، وعرضنا في أماكن كتير زي دور الأيتام ومستشفى 57357».
100ألف مايم للتغيير
في سنة 2012 ابتدت فرقة «اسمه أيه» مبادرة «100 ألف مايم للتغيير» اللي بتتعمل في العالم كله في أخر كل سبت من شهر 9، وعملوا أكتر من عرض في كذا مكان وكل عرض كان الغرض منه الاقتراب أكتر من جمهور الشارع ونشر فن البانتومايم أكتر بينهم.
تجربة انتاج عروض
بيقول «برعي»: «قدمنا ناخد دعم من الصندوق العربي للثقافة والفنون أفاق عشان نقدر نعمل مهرجان فيه عدة عروض، وفعلًا دعمونا وادونا ميزانية انتجنا بيها 6 عروض لمجموعة من الفنانين الموهوبين في فن البانتوميم».
الدعم المادي
وعن الدعم المادي للفريق بيقول «برعي» إن الفريق بيعتمد على الجهود الذاتية بجانب الإيفينتات اللي بتكون بمقابل مادي.
وعن دور وزارة الثقافة في تدعيم الفريق بيكمل كلامه، وبيقول إن «مرة كنا عايزين الوزارة تدعمنا في ايفينت هنعمله فراح الموظف قالي بالنص: (لو معايا 10 جنيه اديها لبنتي ولا لبنت أختي) وكان قصده إن اللي داخل الوزارة أولى بالدعم من الغريب وطبعًا ده خلاني أحس إنها مش مهتمة تدعمنا».
نصيحة لكل الموهوبين
بينصح «برعي» كل موهوب بالممارسة العملية، لأن هي المعيار الحقيقي اللي هيخليه يتعلم ويطور موهبته.
