«فكرة» بهندسة شبرا يعلن فتح باب انضمام الطلاب له

أعلن فريق «فكرة» الطلابي بكلية الهندسة جامعة بنها بشبرا مصر، عن فتح باب الانضمام للفريق، مستهدفين الطلاب في كافة المجالات لتحسين مهاراتهم ليكونوا مؤهلين لسوق العمل والتطبيق العملي.

قال الفريق عبر صفحته بموقع التواصل «فيس بوك»: «ايه اللي يخليني أدخل نشاط طلابي، ايه اللي يخليني آخد من وقتي ومجهودي عشانه؟، في الحقيقة عمر الوقت والمجهود اللي بتبذلهم في نشاط طلابي بيكون ضايع أبدا، بتتعلم عن حاجات جديدة ومهارات مش بتتدرس في منهج لكنها خبرة، لو عندك أفكار معينة بيكون هو الجو المناسب إنك تطبق أفكارك وتجربها، بتساعدك تعرف نفسك اكتر.. بتساعدك تعرف انت عايز ايه وبتحب ايه آكتر وايه الحاجات اللي بتشدك وايه الحاجات اللي بتفصلك».

وتضمن المنشور عن أسباب الانضمام لهم كفريق، موضحين «خلينا نتكلم إنك شخصية عملية وبتحب تجيب من الآخر والشغل اللي بيجيب فلوس، لو جيت تقدم في منحة دراسة أو تدريب في شركة بيكون من ضمن الشروط إنك تكون مشارك في أنشطة طلابية، لو داخل Interview في شركة دايما الـHR بيفضل الشخص اللي الـCV بتاعه في خبرة في أنشطة طلابية، لأن دا بيضمن له إن الشخص دا متعاون وبيعرف يتعامل مع المشاكل اللي أكيد قابلته في فترة تطوعه، وإنه بيقدر يتعامل في جو فيه مديرين وزملاء وملتزم وبيعرف يشتغل في team، غير دا كله هي قيمة العمل التطوعي نفسه وإنك بتفيد غيرك من زملاء في نفس النشاط أو في كليتك أو الفئة اللي بيكون هدف النشاط الطلابي اللي أنت فيه خدمتها، وبكدا تكون حققت المثلث، نشاط طلابي = نفسك+ شغلك+ مجتمعك».