في الجامعة.. 7 شخصيات مسيطرين على الكليات لازم تعرفهم
كتب- ندى عثمان
كل جامعة بيكون ليها طبيعتها الخاصة، كمان طلاب كل جامعة بيكون ليهم السمات أو الحاجة اللي بتميزهم عن أي طلاب في أي جامعة تانية.
لكن فيه بعض الشخصيات ليهم صفات خاصة، بيكونوا موجودين بشكل أساسي في كل كلية من الكليات، وبتعرفهم من أول ما تشوفهم يعني مش محتاج حد يعرفهملك.
الشخصيات دي بيكونوا منتشرين في كل الكليات ولازم هتقابلهم، والكلام ده مش معناه إنهم شخصيات مش كويسة، لا طبعا، بس الشخصيات دي بيكون ليها طريقة تعامل وكاريزما معينة لازم تعرف هتتعامل معاهم إزاي.
الطالب الخبرة
ده بيبقى عنصر خبرة في الكلية، ويعرف كل الناس، لأنه في الكلية من أيام ما كانت مصر مملكة، وبيسقط كل سنة مش عشان هو فاشل، لا عشان هو حابب جو الجامعة وعاوز يعمر فيها، فهتلاقيه جاي يتعرف عليك في أول يوم وعايز يعرف عنك كل حاجة.
لا وكمان هتلاقيه متصاحب على عمال الكلية سواء في الشئون أو الكافتيريات، وطبعاً جملته الشهيرة« لو عايز أي حاجه في الجامعة قولي، كل الناس دي حبايبي».
عمرو دياب الكلية
ده بقا بيحب الموسيقى بشكل أوفر، وعادة هتلاقيه بيعزف على الجيتار ومعاه في كل حته، حتى في الوقفات الاحتجاجية في الجامعة أو عزاء واحد زميلكم مثلاً، هتلاقيه جاي بيه برضو.
هتعرفه من كمية البنات اللي بتتلم عليه، لأنه طبعاً صحابه الولاد مش كتير، وكمان لو البنت اتصاحبت عليه يبقى لازم متسمعش أي مغني تاني غيره.
ملكة جمال الكلية
هتعرفها من شكلها اللي مش باين من المكياج، والكعب العالي، وعمرك ما هتلاقيها لبسه طقم جت بيه قبل كدا.
بتبقى عامله حزب بنات كدا، بيقعدوا على جنب يتكلموا على كل شخص في الكلية، ولو جيت كلمتها هتعرف أن مفيش حد في الكلية مكنش عايز يرتبط بيها، وهي طبعاً مش معبره حد فيهم.
عضو اتحاد الطلاب
بيبقى شخص اجتماعي لدرجة كبيرة، هتلاقيه مشترك في كل الأنشطة، وقريب للدكاترة والمعيدين وبينقل صوت الطلاب للمسئولين في الكلية، وعمرك ما هتلاقيه قاعد في مدرج، لأنه باختصار مش فاضي.
الدحيح
ده عنده طاقة فظيعة في أنه يحضر كل المحاضرات ويكتب كل كلمة بيقولها الدكتور، ويعمل ملخصات وملازم للطلاب في أيام الامتحانات.
وإذا جه حظك جنبه في اللجنة، انسى إنه يغششك حاجة، بالعكس ده ممكن يبلغ عنك.
عصفورين كانريا
ده عبارة عن ولد وبنت متفهمش هما صحاب ولا مرتبطين ولا إيه نظامهم، بس كل اللي تعرفه إنهم على طول مع بعض، وإذا صدفت حد فيهم لوحده هيبقى ياما بيدور على التاني ياما حد فيهم في التواليت ملهاش حل تالت :D.
وهتلاقي كمان بوستات على الفيس بوك حب، أنما اذا سألتهم هما مرتبطين، هيكون الرد لا طبعاً احنا أصدقاء.
صاحب المزاج
ده مركب مراوح على دماغه، ميعرفش أي حاجه عن الكلية غير مكان الكافتيريا، ده إذا كان بيجي الجامعة أصلاً.
متفكرش أنك تنصحه وتقوله تعالى أحضر معايا، هيكون رده «محاضرة إيه أنا هروح أكل أو أي حاجة تانية».
