لو صوتك حلو اقرأ هذا الموضوع.. غير كده لأ
لو شايف نفسك موهوب في مجال الغنا وعايز تتعلمه، يبقى فيه شوية نصايح عامة لازم تاخد بالك منها بيقولها ليك مهندس الصوت أحمد قمر.
صوتك حلو دي البداية
لو صوتك حلو تبقى دي بداية الموضوع مش نهايته، وده لأن لسة قدامك الطريق طويل في إنك توصل وتبقى مطرب محترف. والوصول ده لازم يتم من خلال أنك تتعلم وتاخد درس غنا تتدرب فيه على أسس الغنا السليم.
متغنيش من غير مزيكا
غني دايمًا ومعاك مرجع موسيقي للتوضيح، يعني موسيقى الأغنية أو صوت المطرب، بس يكون امكانياته الصوتية متميزة مش العكس بحيث إنه يكون مرجع تستفاد منه أو حد بيعزفلك الأغنية على الآلة.
لأنك لو غنّيت من غير مرجع ممكن تقول نغمة غلط وتستمر في أنك تقولها غلط لأن ودانك خدت عليها، والغلط ده بيتسمى «نشاذ»، فهتلاقيك وأنت بتغني بتنشذ مش بتغني الأغنية صح، والمرجع دوره إنه بيراجع وراك النغمة صح.
غني بصوت واطي
ولما تيجي تغني مع المرجع الموسيقي خلي صوتك دايمًا واطي مش أعلى من المرجع، وده عشان تعرف تسمع النغمات كويس وتقولها صح.
ابدأ بالأغاني البسيطة
ابتدي مرّن نفسك بأغاني بسيطة مش أغاني محتاجة منك مجهود مضاعف، ومهم جدًا إنك تسجل صوتك وأنت بتغني وبعدين ترجع تسمعه.
شوف إذا كنت ماشي على النغمات كويس وبتقول الأغنية صح ولا لأ، ولو فيه حاجة غلط في نغمة ما ارجع تاني كرر نفس القصة؛ سجل صوتك واسمعه.
وده لأنك لازم تعرف إن فيه فرق بين حد صوته حلو، وحد بيغني صح، واللي بيغني صح هو الأساس اللي عليك تهتم بيه.
ابعد عن التقليد
لما تيجي تغني خلي بالك إنك متقلدش صوت المطرب، وخليك مركز إنك تكتشف كاركتر صوتك اللي يميزك. والكاركتر ده هتعرفوا مع الوقت من خلال التمرينات اللي هتقوم بيها في دروس الغنا.
تظبيط النفس
فيه تمرين ممكن تعود نفسك على إنك تعمله من دلوقت بحيث تظبط نفسك، وهو إنك تقول كلمة «آه» بنغمات ودرجات مختلفة، يعني من الدرجة واحد لإتنين، وهكذا مع كل درجة هتلاقي إنك بتحاول تقول «آه» بدون ما نفسك يقطع.
غني وأنت واقف
لما تيجي تغني خليك واقف عشان تعرف تنظم نفسك، وطبعًا لازم تركز في صوتك ومتتحركش كتير لأن الحركة بتهدر الطاقة عشان تتعود بعدين لما تغني في أي حفلة إنك تكون واقف ثابت قصاد المايك.
