فيها إيه لما تختاري عريسك؟.. بس أنتي مين في دول؟
كتير من العلاقات العاطفية بتنتهي بسبب إن شخصية الطرفين مش متوافقة مع بعض، بس لو كان طرف منهم عرف من البداية إزاي يختار شريك حياته على حسب شخصيته كان الوضع اختلف.
استشاري علم النفس الدكتور محمد حجاب هيقول ليكي في الموضوع ده على مواصفات العريس اللي تناسب شخصيتك.
الشخصية العصبية
لو أنتي عصبية، فأنتي هتحتاجي شخص يكون عكسك تمامًا يعني عنده اتزان انفعالي قوي، وبيتميز بذكاء عشان يقدر يفهم دوافعك وراء عصبيتك، وإيه اللي بيعصبك، ويعرف إزاي يمتص غضبك مش يكون هو سبب غضبك. وكمان يكون طويل البال وميبقاش خلقه ضيق، وعنده حسن استماع مش بيدخل في كلامك فيثيرك عصبيًا.
الشخصية الاجتماعية
شخصيتك الاجتماعية دي عايزة راجل يفهمها ويفسرها صح بإنك شخصية فيها صفات حلوة، والصفات دي خلتك محبوبة من الناس لأن ممكن حد يفسرها غلط بإنك مثلًا معندكيش حدود في التعامل مع الناس أو أي تفسير غلط. وكمان يكون اجتماعي زيك مش انطوائي، وميكونش شكاك ولا عنده غيره عمياء.
الشخصية العدوانية
فيه جزء من شخصيتك محتاج راجل يقولك تمام على كل حاجة بتعمليها، والجزء ده هو إنك بتحبي تكوني المسيطرة وكلمتك هي اللي تمشي حتى لو كانت غلط، فبالتالي محتاجة راجل شخصيته سلبية يوافقك على أي حاجة بتعمليها لأن لو اختارتي حد شخصيته قوية حياتكوا هتتدمر.
الشخصية المنطوية
انطوائك ده عايز راجل يكون عنده ذكاء اجتماعي بحيث يعرف إزاي يعلمك تخرجي من انطوائك وتندمجي في المجتمع. ويكون عنده صبر ويعرف إنك مش في يوم ليلة هتصحي تبقي شخصية اجتماعية.
وكمان محتاجاه يديكي ثقة بنفسك بإنه مثلا يقولك كلام إيجابي لأن انطوائك ده بيكون ضعف في الثقة بالنفس.
الشخصية المسرفة
أنتي بقى عايزة راجل يعملك فرامل لإسرافك ده عشان لما يديكي مرتبه، الميزانية متخرمش من إيدك ومتلاقوش ولا مليم تكملوا بيه لأخر الشهر.
الشخصية البخيلة
عكس الشخصية المسرفة، فأنتي هنا هتكوني عايزة راجل بيعرف قيمة القرش ويكون حذر يحط الفلوس في محلها. لإن أنتي من النوع اللي بيحب الفلوس وبيخاف عليها.
الشخصية الوسواسية
أنتي محتاجة راجل يكون نضيف مش مهمل في نفسه ولا في بيته، لأنه لما يكون كده هيهدي الوسواس اللي عندك وهيريحك.
