لو عندك خوف مرضي.. هتعرف إزاي؟ وهتعمل أيه؟
الخوف شعور وجوده جوانا بيفقدنا لذة الاستمتاع بالحياة، بس يا ترى خوفنا ده هل ممكن يكون في صالحنا ولا لأ؟ وأزاي يكون الخوف مرض أو طبيعي؟ وتعمل أيه؟ ده اللي هتعرفه في التقرير ده من «شبابيك».
استشاري الطب النفسي الدكتور جمال فرويز بيقسم الخوف لدرجات، وبيقول إن فيه خوف طبيعي، وخوف مرضي.
الطبيعي
الخوف الطبيعي هو الحاجة اللي كلنا طبيعي نخاف منها؛ زي خوفنا من الأسد، والتعبان، وهكذا، يعني أي حاجة الناس كلها بتخاف منها.
المرضي
لكن الخوف المرضي هو الحاجة اللي مش طبيعي إن الواحد يخاف منها؛ زي الشخص اللي أول ما يشوف مثلًا الأسانسير يخاف جدًا ويحلف ميت يمين إنه مش راكب فيه.
متى يكون في صالحك؟
لو كان خوف طبيعي يبقى في صالحك؛ يعني مثلًا طالب الثانوية العامة لما يخاف من الإمتحانات ده خوف في صالحه عشان يقدر يتحمل المسؤولية ويذاكر كويس.
ولاعب الكرة الخوف في صالحه عشان يعرف إزاي يستعد للماتش ويعمل ليه ألف حساب. وأي مشروع حد بينفذوا لازم يخاف عشان يقدر يعمل حساب كل نقطة صح.
وكل ده خوف طبيعي في صالح الواحد عشان يعرف إزاي يتعامل بمسؤولية مع الحاجة اللي بيعملها عشان يقدر ينجح فيها ويتميز.
ولو حد مثلًا استفزك واتريق على خوفك، «فرويز» بينصحك إن يكون عندك ثبات انفعالي وقتها وتحاول متتعصبش.
تمرين الثبات الانفعالي
وفيه تمرين ممكن تعود نفسك عليه في البيت عشان يكون عندك ثبات انفعالي، وهو إنك تنام على السرير وميكونش في مخدات وتفرد رجلك وايديك، والأوضة ميكونش فيها ازعاج والنور جاي من ورا ضهرك مش في وشك.
وبعدين تاخد نفس وتخرجه من بقك 30 مرة، وتغمض عينيك، وتفكر في أي حاجة إيجابية كنت فرحان بيها ولو افتكرت في النص حاجة وحشة مش مشكلة بس حاول تفكر في الحاجات الحلوة.
وكرر الموضوع ده كل يوم مرة أو مرتين على الأقل لمدة 8 أيام لأن كل لما تعمل التمرين ده كتير كل ما هيكون أفضل ليك.
وبرضه في الشغل لو أي حد استفزك اقعد على الكرسي وافرد رجليك وغمض عينيك لمدة 5 دقايق وفكر برضه في الحاجات الحلوة.
متى يكون ضدك؟
لو اتحول لخوف مرضي يبقى مش في صالحك خالص؛ يعني لو طالب الثانوية خاف بطريقة مرضية هيتوتر جامد وهيسقط، ولو لاعب الكرة خاف جامد مش هيعرف يركز وهيقف قدام الفريق المنافس مش عارف يتعامل. أما صاحب المشروع لو خاف بشكل مرضي ممكن يفشل لأنه مهتمش.
خليك حاطط في دماغك إن الخوف الطبيعي في صالحك، لكن لو خوفك زاد عن الطبيعي هيبقى خوف مرضي، وساعتها الخوف ده لو سيطر عليك علاجه هيحتاج منك إنك تروح لدكتور نفسي.
