المسرح الأسود.. يا ترى إيه سر سواده؟
زمان لما كنا نسمع حد بيقول البحر الأسود كنا نتخض لأننا بنفتكر إنه لونه أسود، فكان منظره بالنسبة لينا مخيف، ولو لسه بتتخض يبقى هتاخد التقيلة في الموضوع ده «المسرح الأسود» :)
متخفش «المسرح الأسود» هدفه إنه يمتعك برؤية عروضه المختلفة مش يخضك:D وفي الموضوع ده حبينا نعرفك على سر سواده.
البداية
ظهرت بدايات «المسرح الأسود» في الصين، واتطور وبقى ليه مكانة خاصة في مدينة براغ عاصمة تشيكوسلوفاكيا، واتسمى باللغة التشيكية «تشرني ديفادلو». ودخل النوع ده من المسرح في أنشطة الكنيسة.
سبب التسمية
اتسمى بـ«الأسود» لأنه بيعتمد على الإظلام التام بعكس المسرح المتعارف عليه. والإضاءة الوحيدة اللي بتشوفها هي إضاءة الممثلين اللي ليهم طبيعة خاصة تناسب النوع ده من المسرح. و«المسرح الأسود» فيه منه مسرح عرايس، وفيه المسرح اللي بيعتمد على أشخاص.
ممثل المسرح الأسود
ممثل «المسرح الأسود» بيظهر الأجزاء اللي عايز يعبر بيها عن اللحظة اللي بيأديها مش بيظهر جسمه كامل بالطول، والعرض زي المسرح المتعارف عليه.
يعني ممكن يظهر نص جسمه، أو ايده، أو رجله، أو وشه أو جسمه كامل على حسب هو عايز يعبر إزاي عن اللحظة اللي بيأديها.
والممثل كمان قادر إنه يعمل أي حاجة أنت شايفها غير متوقعة، زي إنه يطير ويعمل تشكيلات حركية وطبعًا ده بمساعدة فريق العمل اللي معاه اللي مش بيكونوا ظاهرين ليك لأنهم لابسين أسود.
واللي ظاهر بس هو الممثل اللي بيتحرك قدامك على صوت الموسيقى أو المؤثرات الصوتية. والمتعة بتيجي من هنا إنك مش شايف أي حاجة على المسرح غير ممثل قادر إنه يتشقلب في الهوا وحاجات تانية كتير تخليك مستمتع بالعرض.
بيظهر ازاي؟
فيه لمبة «فلورسنت» لونها أسود بيخرج منها أشعة فوق بنفسجية وبتتحط على أرضية المسرح، واللمبة دي بتعكس اللون الفسفوري اللي بيتم إضافته جوا ملابس الممثلين، أو الديكور لو العرض تطلب إن الديكور يظهر كمان مع الممثلين.
أما اللي بيحرك الممثل وهو بيعمل تشكيل حركي في الهوا فده بيكون لابس ملابس سودة تمامًا مفيهاش أي لون عشان ميبنش للجمهور.
يعني المسرح ممكن يكون عليه 11 واحد، منهم 5 ظاهرين، والباقي مش ظاهر وبيساعد اللي ظاهرين في تأدية حركاتهم اللي بتكون محتاجة إن حد يساعدهم عشان يقدروا يبهروا الجمهور بشكل محترف ومتميز.
تحضير المسرحية
عشان يطلع العرض بشكل متميز بيحتاج وقت كبير للتحضير وتدريب الممثلين على الحركات اللي هيقدروا من خلالها يبهروا الجمهور.
كون المسرح أسود ده تحدي كبير للممثل إنه لازم يشتغل عل نفسه وقت طويل عشان يقدر يخلي الجمهور مستمتع مش حاسس بالملل لأنه لو حس بالملل يبقى كده العرض فشل في توصيل هدفه إنه يخلي الجمهور في حالة اندهاش من اللي بيشوفوا.
