مشهد من مسرحية «1980 وانت طالع»
لو هتكون فرقة مسرحية اسمع من اللي قبلك
لو خلاص قررت تكون فرقة مسرحية واستقريت على الناس اللي عايزها معاك، يبقى فيه شوية نصايح لازم تعرفها من مجموعة فرق مسرحية ليها خبرتها في المجال ده عشان تقدر تقدم عروض ناجحة وفرقتك تكبر واسمها يتعرف.
فريق 1980 وانت طالع
- الروح الحلوة
لازم تكون الروح بينكوا حلوة، يعني ميكونش فيه أي نفسنة، ده اللي بيأكد عليه محمد العتابي أحد الممثلين في الفريق. والروح دي هتعلى من خلال إنكوا تتقابلوا دايمًا برا الشغل وتتكلموا مع بعض وتعرفوا بعض أكتر بحيث الكيميا تعلى بينكوا.
- الجماعية مش الأنانية
المسرح بيقوم على الفريق مش الشخص الواحد، وبالتالي لازم تشتغلوا بمبدأ الجماعية مش الأنانية.
- تقديم النصيحة
أي حد عنده نصيحة لحد أو ايفيه شايف إنه هيعلي المشهد اللي بيمثل فيه يقولوا على طول وميبخلش عليه.
- الصدق في الشغل
وبيأكد «العتابي» انكم لازم تكونوا كمان مصدقين اللي بتعملوه عشان يقدر الجمهور يصدقكوا ويحب يتفرج على عروضكم.
فريق اسمه ايه
- التدريب
صفاء محمدي إحدى الممثلات بالفريق بتقولكم لازم تفضلوا تتدربوا دايمًا حتى لومفيش عروض عندكم في الوقت الحالي، وده عشان جسمكم يكون مليان حيوية ونشاط ومستعد يعرض في أي وقت ويفرغ الطاقة الإيجابية اللي جواه على خشبة المسرح.
- الأمل
ممكن عقبات تقف في طريقكم، أو تقعدوا وقت كتير مفيش فرصة إنكم تعرضوا، أو ماديًا الدنيا مش متظبطة، لكن «صفاء» بتقولكم إن برغم كل ده لازم يكون عندكم أمل إن الدنيا هتبقى أحسن وتعدوا مع بعض أي محنة هتقابلكوا.
- العرض بصفة مستمرة
بينصحكوا أحمد برعي، أحد الممثلين بنفس الفريق، إنكم لازم تعرضوا كتير في أماكن كتيرة مش شرط تستنوا لما يكون فيه مهرجان عشان تعرضوا فيه، لأ اعرضوا كتير في أماكن كتيرة وخلوا ليالي العرض تكون مستمرة مش تعرضوا مرة وخلاص عشان الجمهور يتعرف عليكوا ويتابع الشغل بتاعكم بعد كده.
لأن العرض لما بيتعرض مرة واحدة ممكن الجمهور ميلحقش يتفرج عليه لكن لما يتعرض كذا مرة بيشوفوا أكبر عدد من الجمهور. وبالتالي بتوسع دايرة متابعيك وبيدي «برعي» مسرحية «قهوة سادة» للمخرج خالد جلال و«1980 وانت طالع» للمخرج محمد جبر كأمثلة وبيقول إنهم من المسرحيات اللي قعدت تتعرض فترات طويلة وبقى ليها شهرة كبيرة.
- هدف العرض
وبيقولك «برعي» إن قبل أي عرض لازم يتم التفكير في الهدف من العرض، ومين اللي هيقعد يتفرج هل ناس كبار ولا صغيرين، وهتوصلهم إزاي فكرتك، وهكذا مش مجرد هتعملوا عرض وخلاص، وده عشان الجمهور يخرج وهو مستمتع وواصلوا فكرة العرض مش يخرج وهو حاسس إنه مش فاهم حاجة.
- باصين لقدام
ودايمًا خليكم باصين لقدام وبتفكروا إزاي يكون ليكوا دور في التنمية الاجتماعية لأن المسرح مش مجرد عرض وخلاص زي ما «برعي» بيقول.
- الخروج برا الصندوق
حطوا في بالكم كمان إنكوا تخرجوا برا خشبة المسرح وتجربوا نفسكم في حاجة جديدة، يعني «برعي» بيقترح مثلًا تجربوا مسرح الشارع وتدربوا عليه وتقدموه بشكل متميز.
فريق أفانسية
- الصبر
محمد زكي أحد أعضاء الفريق بينصحكم إنكوا لازم يكون عندكم صبر كبير وتكونوا عارفين إن أي بداية هتحتاج منكم مجهود عشان تقوموا الفرقة على رجلها.
- الشعار.. نعمل حاجة كويسة
وبيكمل وبيقول خلي هدفكم وشعاركم دايمًا في أي عرض انكم طالما حابين اللي بتعملوه فإنتوا هتعملوا حاجة كويسة وطول ما انتوا حاطين في بالكم ده طول ما انتوا هتوصلوا للي انتوا عايزينوا وهتعملوا عروض تسمع مع الناس.
فريق فن محوج
- التسويق
محمود عبد العزيز مخرج مسرحية «هيبتا» و«قلبي أنثى عبرية» بيقول «إن لازم يتم التسويق للعرض بشكل كويس عشان يقدر يوصل لمجموعة كبيرة من الجمهور».
- اختيار مكان العرض وتوقيته
اختيار مكان العرض من الأشياء المهمة اللي «عبد العزيز» بيأكد عليها يعني لازم تاخدوا بالكم انكوا تعرضوا في مكان حيوي، ويكون توقيت العرض مناسب يعني متكونش الدنيا مقلوبة وتعرضوا مثلًا عرض راقص.
- اختيار عناصر لديها خبرة
«عبد العزيز» بيقول كمان إن لازم يكون فيه عناصر عندها خبرة في الفريق سواء في فريق الممثلين أو الإخراج عشان اللي عنده خبرة يساعد اللي معندوش والعرض يطلع بشكل كويس وعناصره متماسكة.
- اختيار لهجة العمل
من الحاجات المهمة كمان اختيار لهجة العمل يعني العرض هيكون بالعامية البسيطة اللي بتحمل مفردات جميلة بحيث توصل لكل الناس ولا هيكون باللغة العربية الفصحى ولا هيبقى مزج بين العامية والفصحى لأن طبعًا كل ده مهم في تحديد شغلكم من البداية.
- المؤلف ثم المؤلف
بيأكد «عبد العزيز» على أهمية المؤلف وبيقول إن لازم تختاروا مؤلف العمل اللي يكون عنده دراية بكل حاجة بتحصل حوالينا وبيحضر مسرح كتير عشان يعرف إيه اللي بيتعرض ويشوف ممكن يكتب إيه مختلف عن المعروض مش يكتب حاجة مكررة. وفي النهاية «عبد العزيز» بيشوف إن مفيش قاعدة ثابتة الفرق بتمشي عليها لكن فيه أساسيات مفروض الكل يمشي عليها عشان يقدم عرض ناجح.
