علشان تستثمر وقتك.. 10 نصائح للقراءة المفيدة
كتير من القراء بيعانوا في بداية دراستهم لمجال تخصصي محدد، وبيتعرضوا لتساؤلات في طريقهم للتحصيل المعرفي، مثلا إيه الكتب المفيدة اللي مش هتضيع وقتي؟ الكتب الكبيرة مفيدة ولا لأ، وازاي أتعامل مع الكتب الصعبة؟
الكاتب والباحث راجي يوسف، بيقول إن أهم حاجة لازم يعرفها كل قارئ إن رأسماله الحقيقى هو وقته، فلازم يعمل شوية إجراءات اقتصادية وهو بيقرأ، ووضع 10 قواعد مهمة علشان القارئ يخرج بأكبر قدر من الاستفادة.
1-لازم تحسب تكلفة الكتاب من حيث الوقت مقارنة بالفايدة العايدة عليك من قرائته، فمثلا يقابلك كتاب صعب الهضم جدا وهياخد وقت ضخم وممكن فى نفس الوقت ده تخلص كتابين أو ثلاثة فايدتك فيهم أعلى وده اسمه إجراء تكلفة الفرصة البديلة.
2- قابلك كتاب صعب وعمال تجاهد فيه وضيع وقتك وأنت مش مستفيد سيبه فورا وأدخل على اللى وراه.
3- استعين بالقراء السابقين اللى درسوا المجال قبلك يرشحولك كتب أو منهج بدل ما تجرب بنفسك وتخسر وقتك وفلوسك.
4- ابدأ أى مجال بكُتب المداخل لأنها بتعملك مخطط للمادة ومدارسها وخطوطها العريضة وأهم من كتبوا فيها.
5- التدرج أمر هام جدا، مينفعش تقرأ كتاب أعلى من مستواك لأن محصلتك هتبقى ضعيفة جدا، سيبه واقرا كتاب أقل منه في القوة والعمق وابقى ارجعله بعدها.
6- فيه كُتاب عندهم إصرار يصعبوا المادة العلمية علشان يظهروا من النخب، دول سيبك منهم.
7- مفيش مانع لو مجال جديد عليك تستعين بمحاضرات شارحة لأنها يتفيد جدا.
8- يا ريت لو لك أصدقاء قراء تناقشوا اللى بتقروه لأن النمط ده من المناقشات بيفتحلك مجالات جديدة أو أمور انت مش ملاحظها ويا ريت تبقى مناقشات منهجية مش استعراضية لانكم مش فى مسابقة .
9- متقعش فريسة مدرسة واحدة ولا رؤية أحادية ولا أيدلوجية ولا دوجمات علشان تستفيد.
10- يا ريت تدون ملاحظاتك أو تلخص الكتب المهمة لأن القراءة العميقة لكتاب أحسن من قراءة عدة كتب.
وفى النهاية خلي عندك رؤية تكاملية لمعارفك واوعى تتناقض من غير ما تشعر وحاول تاخد وقت تهضم قراءتك وتكون نسق فكرى ممنهج ومفيش مانع من قراءة أدب أو روايات، الدنيا مش فكر وبس ولعلك تصادف فى رواية جملة أو مفتاح يفيدك وفى بعض الكتاب بطبيعتهم كلامهم مفتاحى بيحل مغاليق كتير اتمسك بيهم بشدة.
