متخليش حد يستفزك.. دي روشتة الوداع لعدم الثبات الانفعالي
في ناس طبيعتها إن معندهاش ثبات انفعالي وده نتيجة لأنهم من صغرهم نشأوا بين أهل دايمًا بينهم خناقات فلما كبروا بقوا أي كلمة تعصبهم وتخليهم غير مستقرين نفسيًا. وفيه مراهقين بيكون عدم ثباتهم الانفعالي نتيجة لتغيير الهرمونات بتاعتهم وفيه ناس نتيجة لرتم الحياة بقى عندها عدم ثبات انفعالي.
وفي كلا الحالتين فإن عدم الثبات الانفعالي مشكلة لازم نعرف إزاي نعالجها عشان نقدر نكون مستقرين نفسيًا في حياتنا لأننا لو مقدرناش نعالجها هيحصل لينا مشاكل كتير. وده اللي هينبهك ليه استشاري الصحة النفسية الدكتور إبراهيم مجدي.
مشاكل عدم ثباتك
عدم ثباتك من الناحية المرضية ممكن يخليك تصاب بالضغط، والسكر، وكمان يحصلك مشاكل في المناعة. أما من الناحية الاجتماعية فهتكون صورتك سيئة عند ناس كتير بسبب إنك بتعمل مشاكل كتيرة نتيجة لرد فعلك العصبي عليهم.
مفروض أعمل إيه؟
لازم تفكر وتسمع كويس في حياتك قبل ما تتكلم، وده عشان تاخد رد فعل متزن تجاه أي موقف بيعصبك بدل ما تاخد رد فعل متسرع يعمل مشكلة كبيرة.
يعني مثلًا لو حد قالك أي كلمة عصبتك متاخودش رد فعل عصبي عليه لأن هجومك عليه مش هيفيدك بحاجة بل ده هيأثر عليك نفسيًا.
والمفروض إنك تسمع اللي هيقولوا وبعدين ترد عليه بهدوء أو لو أنت حاسس إنك متعصب جامد يبقى الأحسن أنك تنسحب من المكان وترجع بيتك تفكر في اللي حصل بحيث تهدى شوية عشان لما تشوف الشخص مرة تانية تقدر ترد عليه رد متزن.
روشتة مدى الحياة
فيه بقى روشتة بيقدمها ليك دكتور إبراهيم مجدي هتفيدك إن يكون عندك ثبات انفعالي بس الروشتة دي مدى الحياة مش مجرد تمشي عليها يوم وخلاص.
الكتابة
كل يوم بعد لما تروح بيتك اكتب كل المواقف اللي حصلت ليك في يومك لأنك مع الكتابة هتكتشف إنك مثلًا في الموقف ده مكنش ليك حق إنك تتعصب بالشكل ده وكان ممكن تقول حاجة تانية وهكذا هتلاقي الكتابة بتخليك تراجع نفسك وبالتالي هتعودك على إنك تفكر قبل ما تتكلم.
الفضفضة عدوى
فضفض مع حد من النوع اللي بيسمع بهدوء، لأنك لما تتكلم معاه هتتأثر بيه وبهدوئه وبالتالي هتتعدي وتكون واحدة واحدة هادي زيه لما يحصلك أي موقف تعرف بعد تفكيرك فيه إنك ترد بهدوء.
الرياضة عادة
العب أي نوع من أنواع الرياضة لأنها هتخليك تفرغ أي طاقة سلبية جواك مخلياك مضايق ومتعصب وهتمدك بطاقة إيجابية تخليك حاسس براحة نفسية وهدوء وبالتالي هتكون محافظ على ثباتك الانفعالي.
جلسة تأمل
جلسة الـmeditation أو التأمل هتفيدك في إن يكون مزاجك كويس، وكمان هتساعدك على إنك تحرر نفسك من أي انفعالات، فلو شوفت قدامك أي جلسة تأمل هتتعمل روح على طول.
وكمان ممكن تنزل في أي مكان فيه خضرة لوحدك وتقعد تتأمل لأن الجو الحلو مع الخضرة هيساعدك إنك تاخد نفس عميق وتخرج أي توتر مخليك متعصب وحاسس بعدم ثبات انفعالي.
خد نفس 30 مرة
وفيه تمرين استشاري الصحة النفسية جمال فرويز بيقول ليك إنك ممكن تعود نفسك عليه في البيت عشان يكون عندك ثبات انفعالي، وهو إنك تنام على السرير وميكونش في مخدات وتفرد رجلك وايديك، والأوضة ميكونش فيها إزعاج والنور جاي من ورا ضهرك مش في وشك.
وبعدين تاخد نفس وتخرجه من بقك 30 مرة، وتغمض عينيك، وتفكر في أي حاجة إيجابية كنت فرحان بيها ولو افتكرت في النص في حاجة وحشة مش مشكلة بس حاول تفكر في الحاجات الحلوة.
وكرر الموضوع ده كل يوم مرة أو مرتين على الأقل لمدة 8 أيام لأن كل لما تعمل التمرين ده كتير كل ما هيكون أفضل ليك.
وبرضه في الشغل لو أي حد استفزك اقعد على الكرسي وافرد رجليك وغمض عينيك لمدة 5 دقايق وفكر برضه في الحاجات الحلوة.
