السكر غِلي.. اسمع نصايح الشيف شربيني واعرف هتحلّي بإيه
في ظل أزمة السكر اللي تشهدها أسواق التجزئة ومنافذ التموين، واللي خلّت سعر كيلو السكر يرتفع من 5 لـ10 جنيه، وخلت الحكومة تطارد أي حد معاه كمية سكر كبيرة باعتباره محتكر، قررنا في الموضوع ده من «شبابيك» نقولك علي بدايل السكر اللي تقدر تستخدمها بدون ما تحس إنك محتاج السكر.
العسل الأبيض
الإستشاري بالمعهد القومي للتغذية الدكتورة ملك صالح بتقول إن العسل الأبيض صحي جدًا أكتر من السكر بمراحل بس أهم حاجة أنك تجيبو من مصدر موثوق فيه لأن فيه مغشوش ومحطوط فيه سكر مش بيكون عسل أبيض خالص.
وهتعرف إذا كان مغشوش ولا لأ لو دوقته ولقيتو مسكر قوي لدرجة لازعة يبقى مغشوش أما لو دوقته ولقيت مقدار الحلاوة فيه معتدلة يبقى مش مغشوش.
ودكتورة «صالح» شايفة إن في ظل أزمة السكر اللي بنعيشها الناس مش هتعرف تغش العسل الأبيض لأن مفيش سكر يغشوه بيه فهنضمن إننا هناكل عسل مش مغشوش.
وكمان فيه ناس بتعمل خلية نحل عندها عشان تقدر تحصل على العسل الأبيض بصورة كبيرة، ودكتورة «صالح» بتقولك إنك تسأل الناس اللي بيعملوا الخلية دي عن اللي هتحتاجه عشان تعملها بحيث تكون بديل كويس ليك.
العسل الأسود
بعد العسل الأبيض بترشح دكتورة «صالح» العسل الأسود اللي سعره أرخص من العسل الأبيض، واللي برضه مفيد أكتر من السكر العادي يعني مثلًا بيحتوي على نسبة عالية من المواد المضادة للأكسدة اللي بتقلل خطر الإصابة بالسرطان وغيرها من الفوايد الكتير.
وبتنصحك «صالح» إنك لو حطيتي على العسل طحينة وأكلتيها لأبنك أو بنتك فإنتي بكده بتقدمي ليه وجبة غذائية مرتفعة جدًا.
ودكتورة «صالح» بتقولك كمان إنك لازم تعودي ابنك من صغره إنك تديه السكر بكمية معقولة مش بكمية كبيرة، لأن الكمية الكبيرة هتأثر على صحته الغذائية وهتخليه يصاب بمرض السكر مثلًا.
دكتورة «صالح» بتقول إن من شبّ على شيء شاب عليه، يعني لو عودتي ابنك ياكل السكر بكميات كبيرة هيبقى مش سهل إنك تدي ليه حاجة تانية بديلة. أما لو عودتيه على الكمية القليلة هيبقى سهل يتناول أي حاجة بديلة ليه.
الفاكهة
الفاكهة كمان السكر فيها أحادي، بمعنى إن السكر اللي فيها مش بيأثر في الجسم زي السكر الأبيض اللي كتره بيأثر على الجسم.
ودكتورة «صالح» بتقول إنهم صنفوا السكر بالمعهد إنه من السموم البيضا والسم هنا المقصود منه إنه لازم يتم تناوله بحذر وبقدر معقول عشان كتره بيسبب مشاكل صحية للواحد زي الضغط، والسكر.
الفاكهة طبعًا لما تيجي تاكلها يبقى بشكل معقول لأن فيه فواكه بيكون فيها سكر زيادة زي البلح، والمانجة. وفيه فواكه بيكون السكر بتاعها معتدل زي الجوافة.
أقراص السكر
«صالح» بترشح كمان أقراص بتكون مخصصة لمرضى السكر موجودة في الصيدلية، والأقراص دي بتكون سعراتها قليلة لأنها مخصصة لمرضى السكر بس ينفع أي حد ياخدها برضه لأن فيها تحلية كويسة.
نصايح الشيف شربيني
الشيف شربيني بيقول إن أزمة السكر مسيرها تتحل لكن في حالة إننا محتاجين بديل فعسل النحل بديل أفضل رغم إنه أغلى من السكر الأبيض. وهتقدري تستخدمي سواء العسل الأبيض، أو الأسود، أو عسل الجلوكوز في أي أكل بتعمليه وهيدوكي نفس تحلية السكر الأبيض أو تحطيهم على أي مشروبات.
وبيشوف «شربيني» إن لما أزمة السكر تتحل لازم الناس تشتري السكر على قد إحتياجاتها ومتجبش زيادة وتخزنه عشان كل الناس تقدر تلاقيه وتشتريه.
