الكافيهات كتير بس روح الزمن الجميل في الـ4 أماكن دي
الكافيهات في بلدنا مفيش أكتر منها، بس فيه كافيهات نقدر نقول إنها من الطراز الخاص اللي هتحس وأنت قاعد فيها بروح الزمن الجميل.
وفي الموضوع ده هنرشح ليك بعض الكافيهات دي اللي سمعت كلام الست لما قالت «عايزنا نرجع زي زمان، قول للزمان ارجع يازمان». وفعلًا هتخليك تعيش روايح زمان :)
أولديش
صحيح الدنيا اتغيرت لكن الحاجة الوحيدة اللي لسه محتفظة بروح الزمن الجميل هي «وسط البلد» اللي برغم زحمتها إلا إن الواحد لما يمشي في شوارعها بيحس إنه عايش حالة نوستالجيا جميلة.
وفي شارع محمد محمود جنب الجامعة الأمريكية هتلاقي مكان اسمه «أولديش» اللي نقدر نقول عليه إنه هيعيشك في حالة الزمن الجميل اللي بتظهر من أول بابه الخشب الكبير، لحد الديكور بتاعه اللي معمول بمزاج عال العال لغاية الإكسسوارت زي الطربوش، والبيشة، واللي تقدر تاخدهم وتتصور بيهم وتعيش جوا شخصيات زمان وأخيرًا بقى عازف العود اللي بيجي من وقت للتاني يسلطنك. وأسعارالأكل والشرب معقولة. ونصيحة جرب الملوخية لأنك هتاكل صوابعك وراها من كتر حلاوتها.
ومن هنا اتفرج على أولديش.
في شقة جاردن سيتي
فاكرين المود الرومانسي الجميل اللي عيشنا فيه فيلم «في شقة مصر الجديدة»؟ المود اللي صوت كارم محمود عبر عنه لما قال «أمانة عليك ياليل طول وهات العمر من الأول بحب جديد وقلبي سعيد ياريتني عشقت عمنول».
أهو المود ده بقى هتعيشوه مع «في شقة جاردن سيتي» اللي من كتر حلاوتها هتقول «أمانة عليك يا ليل طول» عشان تقدر تستمع بتفاصيل المكان اللي هتلاقي كل حتة فيه جذباك إنك تقعد، وكفاية إني أقولك إن الست أم كلثوم هتكون روحها معاك.
الأسعار معقولة والنت هناك سريع وفيه ايفينتات فنية بتتعمل، والعنوان 2 شارع اتحاد المحامين العرب الدور الأول شقة 3 جاردن سيتي. وعشان تعرف العنوان بالتفصيل ادخل على صفحة المكان من هنا.
علبة ألوان
الزمالك زيها زي وسط البلد من ناحية إنك بتحس في شوارعها ومبانيها بزمن الكلاسيكيات الراقية وفي 15 شارع أحمد حشمت المتفرع من إسماعيل محمد الزمالك هتلاقي «علبة ألوان» اللي هتحس فيها بالمود الكلاسيكي.
وده من خلال الأغاني والديكور اللي بيضفي على المكان جمال من نوع خاص. و«علبة ألوان» أسعارها برضه معقولة وبتعمل ايفينتات فنية كتيرة يعني هتتبسط وهتفصل عن الواقع وتعيش في عالم الكلاسيكيات الجميل.
خدلك جولة واتفرج على «العلبة» من هنا.
Da house
من كل بستان زهرة، دي جملة نقدر نوصف بيها «Da house» اللي خد جزء من كل حاجة بنحبها ولينا ذكرى معاها وحطها عنده في المكان عشان كل لما نحس بحنين نروح على طول ليه.
«Da house» موجود في شارع مصدق بالدقي، الدور الرابع، وبيعمل ايفينتات فنية وأسعاره معقولة.
