بتحب الراديو؟.. 6 محطات لازم تسمعها على الإنترنت
لو بتحب الراديو وعايز توسع دايرة معرفتك بالإذاعات ومتخليهاش مقتصرة بس على كام إذاعة أنت تعرفها، في الموضوع ده إحنا جمعنا ليك مجموعة من الإذاعات الشبابية المختلفة اللي موجودة على الإنترنت.
ترام
إذاعة ترام أسسها مجموعة من الشباب المتطوعين بهدف تعريف الناس بثقافة إسكندرية من خلال الأخبار والإيفينتات اللي بتحصل في البلد، وبتتميز إن الموسيقى والأغاني والمواضيع اللي بتطرحها بتكون مختلفة. وتقدر تسمع الإذاعة بالعربي وبالإنجليزي.
لينك صفحة ترام من هنا
حريتنا بحري
إذاعة حريتنا بحري تابعة لإذاعة حريتنا اللي بتعتبر أول إذاعة إنترنت في مصر، وهي موجهة لمحافظات الوجه البحري بصفة عامة لكنها بتهتم بالحديث عن محافظة الإسكندرية بصفة خاصة وده من خلال تقديم برامج ثقافية، وثائقية، واجتماعية، ومنوعات، وده بيخلينا نتعمق في تفاصيل المحافظة.
لينك صفحة حريتنا من هنا
Blanco FM
إذاعة لكل عشاق الزمالك. أسسها الملحن والمطرب عزيز الشافعي سنة 2011 وده من شدة حبه لنادي الزمالك اللي كان مر على إنشائه 100 سنة وقتها، ففكر إنه يعبر عن حبه تجاهه بالمناسبة دي وأسس الإذاعة وخلى شعارها صوت الزملكاوية.
لينك صفحة بلانكو من هنا
محطة مصر
أسسها الإذاعي أسامة منير الشهير بتقديم برنامج «أنا والنجوم وهواك» على «نجوم إف إم» والمحطة تقوم بإذاعة مجموعة من البرامج المتنوعة سواء الفنية، الاجتماعية، والثقافية.
ومن برامج الإذاعة برنامج «البوسطجي» للإذاعي إسلام فراج اللي بيقدم مجموعة من ذكريات الفن والأدب، وبرنامج «حلمي» مع المذيعة مي حلمي اللي من خلاله بتستضيف النماذج الناجحة في المجتمع وده عشان تقول إن أي حد عنده حلم هيتحقق مهما كانت الصعوبات اللي هتقابلوا.
أنتيكا
إذاعة بتهتم بالبرامج التنموية ودعم المبادرات الشبابية وإبراز التراث المصري القديم ومناقشة المواضيع اللي تهم المواطن المصري والعربي. والراديو تأسس سنة 2012 وهو إحدى مشروعات المؤسسة العربية للإعلام الإلكتروني.
ومن برامج الإذاعة: أستاذ أنتيكا، وجع قلب، ضحكة ببلاش، إزاى تعيش حياتك، حكايات بنات، وكلمات على ورق.
لينك صفحة أنتيكا من هنا
رحاب إف إم
إذاعة أسسها المطرب حميد الشاعري وأخوه مجدي الشاعري وبتقدم مجموعة مختلفة من البرامج منها برنامج فكروني لخالد بكر اللي بيتكلم عن زمن الطرب الأصيل وبرنامج الحلم وتفسيره للشيخ أحمد أبو النيل.
لينك الصفحة من هنا
