أنت باشا.. اعرف الوظيفة المناسبة لشخصيتك
شغل كتير بنروحو وبنكتشف في الأخر إنه مش بيناسب شخصيتنا، وطبعًا الواحد بيكون مضايق لأنه مش عارف إيه الشغل اللي يناسب الشخصية بتاعته. وعشان كده حبينا نقولك في الموضوع ده من «شبابيك» على الوظايف اللي تناسب شخصيتك.
الشخصية العصابية
استشاري الصحة النفسية جمال فرويز بيقول إن الشخصية العصبية اللي طبيعتها إن أي حاجة بتثيرها وتنرفزها وسهل إن حد ينكشها حتى لو بهزار ويغلطها ويخليها تتعصب لأنها أصلًا سريعة الغضب مينفعش تشتغل في وظايف فيها احتكاك بالجماهير.
ويوضح «فرويز» إن الشخصية دي مينفعش تشتغل في الوظايف اللي يكون فيها تعامل مع الناس بشكل كبير زي مثلًا ظابط شرطة، أو ظابط جيش لأن لو حد هينرفزه هيطلع المسدس ويموته.
ولا ينفع برضه يشتغل طبيب جراح لأن بمجرد ما هيشوف دم المريض هيتوتر وهيتعصب ومش هيكون متزن. ولا مذيع لأن لو حصل إن الضيف اتعصب أو جاتلوا مداخلة عصبته هيتنرفز وهيشتم. ولا سواق تاكسي لأن كل شوية هيتخانق مع الزباين.
والشغل المناسب للشخصية العصبية هو اللي يكون فيه تعامل مع عدد محدود من الناس مش مع عدد مطلق. لأن وجود الناس بشكل كبير في المحيط اللي صاحب الشخصية دي فيه هيخليه مش مستحمل حد يكلمه، ولو حد كلمه هيتعصب عليه.
فممكن يشتغل في أي عمل مكتبي ميكونش فيه احتكاك مباشر مع الجمهور ويكون الاحتكاك محدود يعني مثلًا ممكن يشتغل في الأرشيف، أو طبيب معمل، أو حسابات، أو أمين مكتبة.
الشخصية الاجتماعية
هى الشخصية اللي بتحب إنها تتعامل مع الناس وتكون علاقات اجتماعية في حياتها. والشخصية دي مش هتستحمل إنها تشتغل في أي عمل روتيني يخليها قاعدة طول الوقت على مكتب وميكونش فيه احتكاك بشكل كبير مع الناس.
و«فرويز» بيقولك إنك لو كنت شخصية اجتماعية فالشغل المناسب ليك هو اللي يكون فيه تعامل مع الناس، يعني ممكن تشتغل مثلًا طبيب نفسي، أو رجل أعمال، أو مدرس، أو علاقات عامة، أو Hr، أو سكرتير.
الشخصية الوسواسية
بيقول «فرويز» عن الشخصية الوسواسية إنها الشخصية اللي بتحب تدقق وتركز بشكل مبالغ فيه في كل حاجة حواليها وبتراجع عليها كذا مرة وعندها دقة متناهية في الشغل.
ولو أنت من الشخصيات الوسواسية فأي شغل هيكون مناسب ليك لأن أي شغل بيتطلب الدقة والتركيز يعني ممكن تشتغل مثلًا في المخابرات، أو المباحث، أو البنك، أو الحسابات، أو مدرس، أو محرر صحفي، أو ساعاتي.
الشخصية الإنطوائية
استشاري الصحة النفسية محمد هاني بيقول إن الشخصية الإنطوائية هي الشخصية الخجولة اللي بتحب الروتين وعدم التفاعل مع المجتمع.
والشخصية دي مينفعش تشتغل في أي مكان خدمي في تعامل مع الجمهور زي مثلًا العلاقات العامة، والكول سنتر، والدليفري، ومندوب المبيعات، والبنك.
ولو أنت شخصية انطوائية فالشغل اللي يناسبك هو أي عمل مكتبي يكون فيه تعامل محدود مع الناس زي مثلًا ممكن تشتغل في الحسابات، أو الأرشيف، أو أمين مكتبة.
الشخصية الجريئة
هي الشخصية القادرة على إنها تخاطب مجتمع كامل ومتعرفش معنى الخوف. وقادرة كمان إنها تفرض احترامها وأسلوبها في التعامل مع الناس اللي بتبني وياهم علاقات اجتماعية بكل سلاسة.
ولو أنت من الشخصيات الجريئة تقدر تشتغل في أي شغل لأنك شخصية قادرة تثبت نفسها في أي عمل بتروحه وهاني بيقترح عليك مثلًا أنك ممكن تشتغل مذيع، أو صحفي، أو محامي، أو في العلاقات الاجتماعية.
وبيشوف «هاني» إنك لو حتى اشتغلت وظيفة مش مناسبة مع شخصيتك فأنت تقدر تكيف نفسك معاها وتجتهد فيها ويكون عندك طموح إنك هتوصل فيها لنتائج معينة.
