شرم الشيخ بـ100 جنيه.. سافر روّق دماغك مع رحلات شهر نوفمبر
شرم الشيخ، والواحات البحرية، وسيوة، وغرب الفيوم، والنوبة وغيرها من الأماكن الكتير اللي مستنياك تروحها في شهر نوفمبر عشان تتبسط وتروق دماغك. وفي التقرير ده «شبابيك» هيعرض ليك فرص السياحة والسفر داخل مصر لكل رحلة.
غرب الفيوم
بتحب الشلالات؟ طب بتحب السفاري والمحميات والتخييم في الصحراء والنوم تحت النجوم؟ طب نفسك كمان تستكشف الغابة المتحجرة ووادي الحيتان؟ يبقى يلا جهز شنطتك واطلع مع فريق Rove Egypt رحلتهم لغرب الفيوم اللي هتبدأ من يوم الجمعة 4 نوفمبر، وسعرها هيكون 650 جنيه.
لتفاصيل أكتر اضغط هنا.
شرم الشيخ
هتدفع 100 جنيه بس وتسافر تقضي 5 أيام/ 4 ليالي في شرم الشيخ ابتداءً من يوم السبت 5 نوفمبر وسعر الرحلة هيكون شامل الإنتقالات والإقامة والإعاشة.
والرحلة دي منظماها الإدارة المركزية للبرامج الثقافية والتطوعية بوزارة الشباب والرياضة تحت شعار «اعرف بلدك» وده بهدف تشجيع أبناء المحافظات لزيارة مدينة شرم الشيخ وغيرها من الأماكن اللي هتطلعها رحلات زي مهو موضح في الصورة واللي هيطلعوا الرحلة هيكونو الشباب من سن 18 لي 35 سنة. لتفاصيل أكتر ادخل هنا.
سانت كاترين
لو نفسك تجرب تتسلق الجبل وتمسك التلج بايدك وتتصور عليه كأنك في القطب الشمالي ولو عايز كمان تشوف العجل الذهبي والشجرة المباركة يبقى يلا جهز نفسك واطلع مع فريق Elrahaftours رحلتهم لسانت كاترين اللي هتطلع يوم 9 نوفمبر وهتكون بـ175ـجنيه بس.
وعشان تعرف بقية التفاصيل ادخل هنا.
قرية غرب سهيل
الرحلة دي للي حابب يعيش في هدوء وسط مناظر طبيعية جميلة ويقعد في بيوت النوبة على النيل في قرية غرب سهيل، وطبعًا مفيش حد فينا مش عايز يعيش في الجو الجميل ده.
اللي هيخليك تعيشوا فريق Rove Egypt لمدة 3 أيام بداية من يوم الخميس 10 نوفمبر وسعر الرحلة هيكون بـ1250 جنيه والسفر بقطر درجة تانية مكيفة من القاهرة لأسوان. لتفاصيل أكتر ادخل هنا.
الواحات البحرية
حملة عنوان بلدنا لتنشيط السياحة الداخلية لنشر الوعي السياحي والثقافي هطلعك رحلة سفاري 3 أيام/ ليلتين تزور فيها الواحات البحرية، الصحراء البيضاء والسوداء، وجبال وكهوف الكريستال، وحمامات الاستشفاء الباردة والساخنة الكبريتية، وجميع المزارات السياحية بالواحات البحرية وكل الفسح دي هيكون سعرها 775 جنيه بدل 950 جنيه، وهتبدأ من يوم 17 نوفمبر.
وعشان تعرف تفاصيل أكتر ادخل هنا.
سيوة
بتشتهر سيوة بعيونها وبحيراتها وينابيعها وبوجود الصحراء العلاجية فيها عشان كده أطلقوا عليها اسم جنة الصحراء الغربية.
وفريق رحالة - Rahalla قرر إنه ياخدك لجنة سيوة عشان تشوف جبل الموتى، والبيت السيوي، وبحر الرمال.
وده بداية من يوم 29 نوفمبر ولمدة 4 أيام/ 3 ليالي بسعر 888 جنيه شامل الفطار والعشا اللي هيكونوا أوبن بوفيه وعشان تعرف هيكون شامل إيه تاني ادخل هنا.
