عود ومسرح وغنا.. عيد الحب أحلي مع الخروجات دي
«ياحبيب امبارح وحبيب دلوقتي ياحبيبي لبكرة ولأخر وقتي». بما إن النهاردة عيد الحب فهنقترح عليكوا بعض الخروجات المختلفة اللي هتكون موجودة في اليوم ده ما بين السفر لإسكندرية وحضور مسرحية، والغني مع أنغام وحاجات تانية كتيرة اختاروا منها واتبسطوا :)
سهرة في إسكندرية
فريق المحمود للسياحة هيخلي اليوم ده مختلف بالنسبة ليك وهيطلعك أفريكانو بارك اللي فيها هتلاقي كل الحيوانات اللي بتحبها وهتقدر تلعب وتتصور معاها.
وبعدين هتطلعوا تسهروا في إسكندرية، وتدخلوا المنتزة وتشوفوا القصر، وتستمتعوا بمياه البحر المتوسط، وتعملوا جولة على شاطئ المنتزة، وهناك هتلاقي كافيهات تقدر تقعد عليها أنت وحبيبتك وتستمتعوا بجمال إسكندرية في الشتا.
سعرتذكرة الفرد من القاهرة 185 جنيه، ومن بورسعيد أو من السويس 285 جنيه. وعشان تعرف هتحجز فين والرحلة هتطلع الساعة كام ادخل هنا.
أنغام في الأوبرا
«أنغام» هتحيي حفلة بدار الأوبرا المصرية الساعة 9 بالليل، وده في إطار الإحتفال بمهرجان الموسيقى العربية الـ25.
وشباك تذاكر حفلات المهرجان مفتوح من الساعة 10 الصبح بدار الأوبرا. وللعلم الشباك مفتوح من يوم التلات الموافق 25 أكتوبر فالحق احجز بسرعة. ولو عايز تسأل على حاجة ادخل على لينك الإيفينت من هنا.
جلسة شعرية في شقة جاردن سيتي
أما الشاعر خلف جابر والمطرب والملحن فوكس أحمد مصطفى هيقدموا جلسة شعرية الساعة 5 بالليل في شقة جاردن سيتي وهيكون سعر التذكرة 25 جنيه.
وفي شقة جاردن سيتي هتعيش روح الزمن الجميل اللي هتلاقيها موجودة في تفاصيل الديكور هناك والمود ده هيضفي عليكوا جو رومانسي وهتقول «أمانة عليك يا ليل طول» عشان تقدر تستمتع بتفاصيل المكان.
العنوان في 2 شارع إتحاد المحامين العرب الدور الأول شقة 3 جاردن سيتي. وعشان تعرف العنوان بالتفصيل ادخل على صفحة المكان من هنا.
مسرحية أعمق مما يبدو على السطح
أما لو عايز تحضر مسرحية فروح مسرح الجمهورية الساعة 8 بالليل واحضر مسرحية «أعمق مما يبدو على السطح» لفرقة الرقص المسرحي الحديث، وهو عرض مسرحي راقص من انتاج دار الأوبرا المصرية، ومن تصميم واخراج مناضل عنتر، وسعر التذكرة هيكون 25 و35 و50 جنيه.
فرقة Glass onion
أما فرقة Glass onion هتكون موجودة على المسرح المكشوف بدار الأوبرا المصرية الساعة 8 بالليل وسعر التذكرة هيكون 75 جنيه، وده عشان تسمعكوا مجموعة من الأغاني الأجنبية المتميزة.
ستاند اب كوميدي
أما على مسرح الحكمة في ساقية الصاوي الساعة 7 بالليل هيكون فيه ستاند أب كوميدي هيخليكوا تفطسوا على روحكوا من الضحك بيقدموا مجموعة من المواهب الإسكندرنية وهما أحمد الهريدي، ومحمد جمال الدين «جيمي»، وعلاء الشيخ «المواطن المصري»، وسعر التذكرة هيكون 35 جنيه.
ليلة عود
العود آلة بتعزف على الروح ويوم عيد الحب هيلعب العود على وتر أرواحكوا ويوصل بيها أكتر وأكتر. وعبد العزيز محمد، وأحمد مدحت هيقدموا ليلة عود متميزة في إطار مهرجان الفنون ببيت السناري من الساعة 6 بليل والدعوة مجانية. وبيت السناري موجود في حارة منج، خلف المدرسة السنية، ميدان السيدة زينب.
