طلاب بعلوم الإسكندرية يهاجمون معيد سبهم: محتاج تأهيل نفسي
دشن طلاب قسم علوم البحار بكلية العلوم جامعة الإسكندرية، هاشتاج #طالب_علوم_مش معفن، بعد أو وصفهم المعيد أحمد سمير، قائلًا: «يا معفن يا أبو 300 جنيه عيب تقول الفلوس بتروح فين أنا بدفع من جيبي علشان أعلمكم».
جاء ذلك بعد اعتراض طلاب بقسم علوم البحار بالكلية، على منعهم من دخول المحاضرات، بسبب عدم حملهم للكارنيهات، مؤكدين لـ«شبابيك» «أن الأزمة لدى الإدارة وهي من أخرت استخراج الكارنيهات.. حتى لمن دفع المصروفات فمنا من معه ايصال الدفع وتم منعنا من الدخول» قائلين: «بندفع من بداية الترم ومش عارفين الفلوس بتروح فين؟».
وجاءت تعليقات الطلاب على تعليق المعيد كالتالي:
الطالبة إسراء طارق علقت: «ده معيد حب يعمل show ع قفانا قامت الدفعه عملت الواجب وزياده الصراحه، والوكيله ورئيسه القسم ف نفس اليوم خدوا قرار بس يارب يكون عملي ويطبق، احنا معفنين يالي اتعينت معيد بتقدير جيد بالغافيه.. وكانت اقصي مصاريفك 100 ج.. لا وبتدفع من جيبك كمان».
وسخر الطالب عبدالرحمن الحبروك، من المعيد قائلًا: «يعنى انت مش عارف تكتب وكلامك كله غلطات والمفروض انك معيد ودى ف حد ذاتها مصيبه وبتشتم فينا كأنك بتصرف علينا من جيبك و كلامك كله كدب.. اقسم بالله امثالك هما اللى بيكرهونا فى الكليه وفى التعليم عموما و لو محدش حاسبك على الكلام ده يبقى حقك تعمل اكتر من كده».
وقال الطالب محمد محمود، إن المعيد أحمد سمير، «خاف ومسح البوست وغير اسمه عالفيس.. اما نشوف بقي الكلية هتتصرف معاه ازاى ؟؟».
واستنكرت الطالبة بسمة المالكي، قول المعيد «أنه يدفع من جيبه الخاص لتعليم الطلاب»، قائلة: «انت بتهزر بتدفع ايه من جيبك ده الادوات كلها بايظه مدرجات متكسره حتي البنشات بقالها 70 سنه بتدفعوا ف كيلو السمك اللي بتشرحوا عليه للطلبه ولا ايه مش فاهماك».
الطالبة ندى عبدالحميد قالت: «المعيد دة بعيدا عن انه العربي بتاعه بايظ و لا يليق بشخص هيكون دكتور جامعى.. فالمعيد دة اللى بيتكلم على الفشلة دة مش عارف تحويله سم مربع للمتر المربع ازاى !!!.. هو نفس المعيد اللى بيطرد طلبه من السيكشن لمجرد أن طلبة تانية قاعدة جنبهم بتتكلم و بيتنك علينا جدا، واللى اغلب الاوقات الطلبة كلها بالاجماع مش بتفهم منه».
وطالبت «اتمنى يكون في صرامه معاك ومجلس تاديب ليك زى ما الطلبة بتدخل مجلس تاديب لما بتغلط فى أعضاء هيئه التدريس على السوشيال ميديا الطالب يجب أن يشعر باحترامه عشان يبادلك الاحترام».
