من بسطويسي وعالحصيرة.. أكلة هنية أنت وهي في عيد الحب
أساسي تعزم حبيبتك على أكلة حلوة في عيد الحب، وفي الموضوع ده نقينا ليك مجموعة من المطاعم اللي جربها ناس كتير وشكروا فيها.
بسطويسي
لو بتحبوا المكرونة يبقى لازم تروحوا بسطويسي لأنه بيعتبر نفسه نجم المكرونة الأول على مطاعم مصر. وهناك هتلاقوا كل أنواع المكرونة اللي تقدروا تاكلوا صوابعكوا وراها.
وميزة الطبق عند بسطويسي إنه بيبقى ملو هدومه كده، يعني مليان مش حبت مكرونة صغيرين محطوطين وخلاص لأن غرض بسطويسي إنه ميقومش حد من على التربيزة وهو لسة جعان.
بسطويسي ليه كذا فرع في هليوبوليس والدقي ومدينة نصر. وعشان تعرف عنوان كل مكان بالتفصيل وكمان تشوف المنيو فيها ايه ادخل على صفحتهم من هنا.
عالحصيرة
عالحصيرة مطعم متخصص في الفطير والبيتزا وكل اختراعاتهم، ومود المكان تحس فيه بالطابع الريفي وبتقعد على شلت على الحصيرة يعني من الأخر هتعيش هناك يوم مختلف انت وحبيبتك ونسيت أقولكوا أنه بيعمل فطيرة بالنوتيلا يعني هتاكلوا كل حاجة بتحبوها.
موجود في 15 أ شارع رضوان ابن الطبيب متفرع من شارع مراد الجيزة أخر سور حديقة الحيوان.
ادخل على لينك صفحة المطعم من هنا.
one oak
أما بقى لو انتوا الإتنين بتحبوا السوشي فروحوا مطعمOne oak في موجود في تيڤولي الشيخ زايد وفي point 90 التجمع الخامس، وعشان تعرف العنوان بالتفصيل اتصل على 16553.
El Chico
لو عايزين بقى تجربوا أكلة جديدة يبقى روحوا مطعم El Chico وجربوا الأكل المكسيكي اللي بيتميز بطعمه اللذيذ اللي بيتعمل من مجموعة من البهارات وأنواع كتيرة من الفلفل زي الفلفل الأحمر والأخضر الحار الطازج والمجفف والحلو وبيعتمد لمطبخ كمان على الفلفل الأحمر الحار.
المطعم موجود في كايرو فستيفال سيتي عند الدانسينج فاونتين. ورقم المحل 0111 273 6101.
لوسيلز
مفيش حد فينا مش بيحب البرجر بس طبعًا اللي بيحب ياكله في مكان مضمون ومطعم لوسيلز من المطاعم المتخصصة في عمل البرجر وبيقدمه بأحجام مختلفة كبير، متوسط، صغير. وبجانب البرجر برضه بيقدم أكلات مكسيكية.
عنوان المطعم في شارع 9 في المعادي أمام فيلا 55.
تاجوري
مطعم تاجوري بقى متخصص في تقديم كل أنواع الأكل اللبناني والمصري وبيتميز بالطابع المصري في ديكوراته من براويز وأباريق وحروف عربية وصور للممثلين. يعني القعدة فيه هتبقى مميزة. عنوانه 93 شارع عبد العزيز، المنيل.
كل أسعار المطاعم اللي اتكلمنا عنها دي مناسبة ليك والمنيو هتلاقيه بيقدم ليك اختيارات مختلفة من الأكل ليك وليها.
