وزنك مش هيوقفك.. ادخلي التمثيل برجلك اليمين

لو موهوبة وعايزة تدخلي مجال التمثيل بس وزنك زيادة وخايفة تتحطي في قالب الأدوار اللي الناس بتضحك فيها على وزن البنت، فمتقلقيش لأننا هنقولك في الموضوع ده تعملي أيه من خلال النصايح اللي بتقدمها ليكي الناقدة الفنية ماجدة موريس.

وزنك جزء من شرايح الحياة

لازم تعرفي إن وزنك جزء من شرايح الحياة اللي بتضم كل الأوزان والأشكال يعني متتكسفيش من حاجة زي كده أو تخليها توقفك عن تحقيق حلمك.

الموهوب يتحمل المخاطر

الموهوب في أي مجال لازم يتحمل المخاطر اللي هيواجهها فيه عشان يقدر يوصل للي هو عايزه. وعشان كده متحوطيش مسألة الوزن كعقبة في حياتك عشان تقدري تحققي اللي أنتي عايزاه في مجال التمثيل.

الدور بيثبت الموهبة

أي دور يتعرض عليكي اقبليه ومترفضيش وده عشان تثبتي لكل الناس إن الوزن عمره ما بيأثر على أداء الموهبة. لأنك لو رفضتي على اعتقاد منك إن الناس هتتريق عليكي في كل دور يبقى متشتغليش في مجال التمثيل.

امتلاك الشجاعة الكاملة

لأن المجال ده بتحتكي فيه بكل أنواع البشر وده محتاج منك إنك تكوني شجاعة وقادرة توقفي قصاد أي حد  وتثبتي على مدار الأدوار اللي بتعمليها إنك ممثلة شاطرة.

ليلى علوي لما كان وزنها زايد عملت أدوار كتيرة تعتبر بصمات فنية زي فيلم «المصير»، و«اضحك الصورة تطلع حلوة»، وغيرها من الأدوار اللي محستش وهي بتعملها إنها مقيدة عشان وزنها لأ أبدًا لأنها كانت بتمتلك الشجاعة وعارفة إنها ممثلة شاطرة وهتخلي الدور اللي بتعمله يبقى بصمة في تاريخ الفن.

اقنعي المخرج

لو روحتي «كاستينج» ولقيتي إن الدور تراجيدي مثليه وطلعي فيه كل طاقتك التمثيلية عشان تقدري تقنعي المخرج إنه لو كان بيفكر إن الدور بتمثله بنت ممشوقة القوام، أول ما هيتفرج على تمثيلك المتميز ميخلهوش يبص على وزنك ويرشحك للدور.

وده لأن بعض المخرجين دايمًا بيخلوا البنت اللي وزنها زيادة تمثل دور كوميدي بس، لكن فيه ممثلات قدروا إنهم يقنعوا المخرجين إنهم يشيلوها من القوالب اللي بيحطوها فيها دايمًا ويجربوا البنت اللي وزنها زيادة في أدوار كتيرة كانوا مستبعدين إنها تعملها.

زي مثلًا الممثلة مها أحمد اللي قدرت إنها تمثل كذا دور بعيدًا عن القالب الكوميدي، زي مثلًا دورها في مسلسل «الوتد»، وفي «حديث الصباح والمساء»، وغيرها من الأدوار اللي قدرت تثبت من خلالها إنها تقدر تعمل أي دور مش شرط القالب الكوميدي فقط.

وأخيرًا الناقدة ماجدة موريس بتقولك إن اللي بيشتغلوا في مجال التمثيل سواء في السينما أو التليفزيون بيحاولوا يحافظوا على لياقتهم البدنية والحفاظ ده بيخلي عندهم فرص أكتر في أنهم يعملوا أدوار كتيرة وده على عكس الممثل اللي وزنه زيادة.

وعشان كدة حاولي إنك تنقصي وزنك وده أولًا عشان صحتك تكون كويسة، وثانيًا عشان يكون قدامك فرص لأدوار كتيرة.