لو اتخانقتوا.. متعملوش الحاجات ديه
بتتخانق وبتتخانقي.. أصلا مفيش حد مبيتخانقش.. بس «شبابيك» بيقولك لو بتتخانق مع شريك/ة حياتك متعملوش الحاجات ديه عشان متخسروش بعض..
- الإهانة
أصعب حاجة ممكن تحصل في الخناقة بين أي إتنين هي إهانتهم لبعض.. عمرنا ما هننسى الكلمة اللي جرحتنا حتى لو كانت الحجة أنها اتقالت ساعة غضب.. عشان كده نبعد تمامًا عن أي إهانة من مبدأ «كل إناء ينضح بما فيه».. يعني كل حرف هتقوله هيدل عليك.
- الانتقاد
أكتر حاجة بنعملها في بداية الخناقات انتقاد الشخص اللي بنتخانق معاه.. ولازم نبدأ بـ «أنت أصلك - أنت طول عمرك - مفيش مرة تعمل».. الانتقاد بيضعف موقفنا لأن من الطبيعي الشخص التاني هيرد علينا بانتقادنا بأكتر صفات مش بنحبها في نفسنا.
- الغضب
ممكن الخناقة تبدأ من غير عصبية أو غضب.. يعني تبتدي مشادة كلامية تاخد وقت طويل فتتحول لخناقة.. هنا لازم نمنع الكلام وقت الغضب.. عشان ساعتها مش هتاخد حقك خالص وأخرك زعيق وخناق ومناهدة على الفاضي.
- المقاطعة
واحنا بنتكلم وبنتناقش كل واحد عايز ياخد مسار الكلام لنفسه.. وبالتالي هنفضل نقاطع بعض ومفيش حد هيسمع التاني.
- الماضي
من أسوأ عادات الخناقة بين أي شخصين إنك تفتكرله الماضي.. وطبعا هيتقال عليك قلبك أسود و «شيال».. حتى لو كانت الخناقة مع مديرك في الشغل مينفعش تقوله «أنت قلت من شهر - وعملت كده مع فلان».
- الصراخ والتشويح
بعض الإهانات مش لازم تيجي بالكلام السيء.. ممكن تهين اللي قدامك بصراخك عليه وتشويحك بإيدك وهو بيتكلم.. وياسلام لو مشيت وسبته وهو واقف مكانه بيكلمك.. أنت كده بتقلل من نفسك مش منه.
- الاعتذار
مبدأ الاعتذار مش موجود في قاموس الرجل والفتاة العربية.. فالرجل الشرقي يعشق كبريائة دون أن يتنازل ليعتذر لفتاة.. والفتاة الشرقية تعشق العند فهو من يعتذر أوًلا.. بشكل عام خد/ي بالكم من النقاط اللي اتكلمنا فيها..
