بدل بوكيه الفرح.. تاج روماني وأفكار مختلفة ليكي
كسر القاعدة في بعض الأوقات بيضفي على روح الواحد اختلاف وفرحة من نوع خاص، و«بوكيه الفرح» من الحاجات اللي ممكن تكسري قاعدتها يوم فرحك ومتمسكيهوش أصلًا. وفي الموضوع ده مصممة الإكسسوارات عبير حسن هتقولك على البدايل.
اسألي نفسك
في البداية «عبير» بتقولك إنك لازم قبل ما تفكري أيه البديل إنك تشوفي هتعملي الفرح في مكان «أوبن أير» ولا مكان مقفول، وإذا كان الحاجات هتكون لايقة عليكي ولا لأ، وده اللي هيحدده معاكي المكان اللي هتشتري أو هتأجري منه الفستان اللي هتنسقي معاه الحاجة اللي هتعمليها بدل البوكيه.
وده عشان تكوني مطمنة إن التغيير اللي هتعمليه هيكون لايق عليكي ومناسب مع الفستان وميكونش مسار سخرية من الناس.
اقتراحات الأوبن اير
- شمسية
بتقترح عليكي «عبير» إن لو فرحك هيكون في الشتا وهتعمليه في مكان «أوبن أير» ممكن تمسكي مثلًا شمسية صغيرة متزوقة بورود صغيرة زي اللي كانت ماسكاها إيمي سمير غانم في فرحها.
منها هتديكي شكل حلو ومنها كمان لو الدنيا مطرت تلاقي حاجة تحمي نفسك بيها إنتي وعريسك من المطر وممكن كمان تتصوري بيها أنتي وهو صور حلوة للذكرى. والشمسية دي تنفع بس في مكان «أوبن أير» مش مكان مقفول عشان مش هتبقى منطقية.
- مروحة
ولو فرحك هيكون في الصيف وهتعمليه في مكان «أوبن أير» ممكن تمسكي مروحة صغيرة متزينة بورد ونازل منها تل زي ما تحبي. وأهي تنفع لو اتحريتي هتلاقي حاجة متاحة معاكي تهوي نفسك بيها وتهوي عريسك كمان.
- تاج ورد
كمان ممكن تشوفي ألوان الورد اللي موجودة في المكان الـ«أوبن أير» وتجمعي الألوان وتعملي بيهم تاج ورد بدل التاج التقليدي.
اقتراحات المكان المقفول
- بورنيطة
ممكن تلبسي بورنيطة ويكون الطراطيف بتاعتها ورود صغيرة مثلًا بس «عبير» بتقولك إنك تخلي بالك لو العريس قصير وانتي طويلة البورنيطة مش هتنفع عشان هتباني أطول منه. ودي الحاجات اللي لازم تخلي بالك منها وتشوفي هتليق عليكي ولا لأ زي ما قالتلك «عبير» في البداية.
و«عبير» بتقولك إن البورنيطة هتبقى حل حلو ليكي لو كنتي محجبة وعايزة يوم الفرح متلبسيش طرحة وفي نفس الوقت مش عايزة تبيني شعرك فالحل هنا هيبقى البورنيطة اللي هتداري شعرك وفي نفس الوقت هتديكي شكل جميل.
وشاح ورد
كمان ممكن تلبسي وشاح ورد بس حطي في بالك برضه إن لو جسمك مليان الوشاح هيتخنك.
- تاج روماني
فيه تاج روماني نازل موضة على شكل سعف النخل ممكن تلبسيه كمان وتمسكي في إيدك زعف برضه بيتلف كده بطريقة معينة زي فروع الشجر.
واقتراح المروحة وتاج الورد اللي اقترحناهم في الـ«أوبن أير» يمشوا برضه مع المكان المقفول.
كل اللي فات ده اقتراحات بتقترحها عليكي عبير حسين عشان لو نفسك تكسري قاعدة مسك البوكيه هتلاقي قدامك مجموعة اختيارات مختلفة ليكي.
