الأسعار نار والشتا جبّار.. بس الهدوم رخيصة في الأماكن دي
الأسعار غليت والشتا داخل وعايزين نجيب لبس، طب نعمل أيه؟ كلنا بنسأل نفسنا السؤال ده وحاسين بحيرة. بس ليه تحتار وأنت ممكن تقرأ الموضوع ده وتتعرف على أكتر الأماكن اللي تقدر تجيب منها كل اللي أنت عايزه بأسعارعلى قد الإيد.
الأماكن اللي هنقولك عليها دي مهما حصل في البلد من زيادة أسعار هتلاقيها مش بتتأثر بشكل كبير بالزيادة، آه ممكن تزيد حاجة بسيطة بس مش لدرجة إنها تغلى عليك.
وكالة البلح
كل ملابس الماركات هتلاقيها في محلات وكالة البلح بأسعار رخيصة جدًا وعلى قد الإيد، يعني مثلًا الجاكيت الفرو في سنتر الحرم الشريف هناك هتلاقيه بـ150 جنيه، والبلوفر الموهير مثلًا في محل اسمه ماركاتو هناك بيبدأ من 80 جنيه.
والوكالة فيها كذا محل وعايزلها يوم كده، تنزل فيه من أوله بحيث تلف على المحلات كلها وتجمع الطقم اللي على مزاجك لأن كل المحلات أسعارها كويسة والاختلاف إن ممكن في محل مثلًأ متلاقيش مقاسك من حاجة معينة والمحل التاني تلاقي مقاسك منها وهكذا.
بجانب المحلات في استاندات بيكون عليها لبس برضه زي سويت شيرتات، وبنطلونات وحاجات تانية كتير أسعارها مناسبة. وعشان تروح الوكالة هتركب المترو وتنزل محطة مترو جمال عبدالناصر المعروفة بمنطقة الإسعاف، وبعدين اسأل أي حد على مكان الوكالة هيدلك.
شعبان
محل شعبان بيبيع كل ملابس التصدير. والهدوم هناك هتلاقيها شيك وفي نفس الوقت سعرها كويس. يعني مثلًا الجاكيت الصوف هتلاقي سعره بيبدأ من 110 جنيه وطبعًا السعر ده مناسب لخامة الصوف. وغيرها من الأسعار المناسبة.
وهتلاقي هناك كمان بيجامات في الدور الأرضي للمحل وسعرها معقول برضه. شعبان هتلاقيه موجود جنب بيت الدونتس في شارع عباس العقاد وليه كذا فرع برضه.
شارع 26 يوليو
بداية الشارع من أول دار القضاء لحد مترو العتبة وهتلاقي في الشارع مجموعة محلات مختلفة أسعارها على قد الإيد. ظبط نفسك إنك تنزل في يوم من أوله سواء للمول أو شارع 26 يوليو بحيث تتفرج براحتك وتختار اللي على مزاجك ومتكونش متسربع.
بي نيشتي
برضه محل بي نيشتي بيبيع ملابس التصدير بأسعار مناسبة جدًا. وهتلاقي هناك ملابس رياضية، وبيت، وخروج كمان. وفيه قسم للرجال برضه فيه كل اللبس اللي هتحتاجه.
وفيه برضه جزء مخصص لملابس الأطفال اللبس فيه جميل وفي نفس الوقت سعره على أد الإيد مش زي محلات ملابس الأطفال التانية اللي الأسعار أوقات كتير فيها بتكون غالية.
بي نيشتي موجود قدام حلواني قويدر اللي جنب مطعم ماكدونالدز في عباس العقاد.
مول طلعت حرب
موجود في شارع طلعت حرب وسط البلد. هتلاقي كل المحلات فيه أسعارها مناسبة وفي نفس الحال برضه في الشوارع المتفرعة بميدان طلعت حرب.
أوت ليت
موجود في أول عباس العقاد بعد البنزينة جنب محل أخر العنقود. وبيبيع ملابس الماركات سواء بالطوهات، وجواكيت قصيرة، وبليزر بأسعار مناسبة برضه. يعني مثلًا البليزر بيبدأ من 195 إلى 225 جنيه.
ثري إم
أي فرع من فروع ثري إم بيبيع الأحذية بأسعار كويسة جدًا، وبما إننا داخلين على الشتا خلاص فهتلاقي أي فرع من فروع ثري إم بيبيع سواء الهاف بوت، أو البوت الطويل بأسعار مناسبة. وفي أول عباس العقاد هتلاقي محل ثري إم على ناصية شارع كده، وفي محل ثري إم تاني جنب محل تاتا تيو.
وفيه ثري إم على الناصية بجانب إنك هتلاقي فيه جزم هتلاقي كمان شنط بأسعار كويسة فيه بـ40 وفيه بـ70 جنيه وغيرها من الأسعار المناسبة. وهتقدري تشتري منه مثلًا جزمتين وشنطة وهكذا لأن الأسعار كويسة.
dejavu
أما بقى لو عايزة تجيبي بوت واحد ممكن تروحي dejavu هتلاقي فيه برضه بوتات شكلها حلو وأسعارها كويسة بالنسبة لخامة المنتج اللي بيقدموا المحل. وdejavu موجود في شارع حسنين هيكل في ضهر المعرض السوري اللي في شارع عباس العقاد وبرضه ليه كذا فرع.
ميدان رمسيس
لما تنزل رمسيس هتلاقي فيه ناس بتبيع أحذية واقفين على أول الشارع اللي بتدخلوا لما تيجي تركب وتروح التحرير، والأحذية هناك هتلاقي مفيش فرق بينها وبين أي أحذية تانية في أي محل، والإختلاف الوحيد هيكون في السعر اللي هتلاقيه هناك على قد الميزانية اللي حطتها ليك.
شارع المصنع
أول لما تنزل محطة حدايق المعادي هتسأل على شارع المصنع ولما تروح هناك هتلاقي محلات كتيرة بتبيع حاجات بسعر رخيص جدًا زي محل ميس ايمي، مودي فاشون.
