لو عايزة تكوني أميرة.. اختاري من 6 فساتين أميرات ليوم فرحك

كل بنت بتحلم إنها تكون أميرة يوم فرحها وعشان كده هنخليكي أميرة، وجبنا ليكي في الموضوع ده مجموعة من فساتين الأميرات اللي تناسبك سواء كنتي محجبة أو لأ. وتقدري تنقي منهم فستان تفصليه أو يطلعلك منهم فكرة فستان مختلفة. وتختاري ما بين إنك تفصلي الفستان أو لو صادفك الحظ ولقيتيه في مكان تبقي تأجريه.

الأميرة كيت ميدلتون

الأميرة كيد ميدلتون في فرحها على الأمير وليام كان فستانها بيتميز بالبساطة وفي نفس الوقت الجمال اللي أدى ليها طلة الأميرات، والفستان كان من تصميم سارة بورتون اللي كانت بتشتغل في دار أزياء المصمم البريطاني ألكسندر ماكوين.

الأميرة ديانا

 كل صناع الموضة أول لما شافوا فستان فرح الأميرة ديانا على الأمير تشارلز أطلقوا عليه فستان زفاف القرن ودخل الفستان ضمن قائمة أعظم فساتين الزفاف.

وده لأن الفستان أخد من شخصية الأميرة ديانا اللي مليانة حيوية وبهجة وكأنه اتعمل مخصوص عشان يجمع بين شخصيتها اللي شهد العالم على عظمتها، وبين كونها أميرة وده فعلًا اللي قصد المصمم ديفيد والمصممة اليزابيث ايمانويل إنهم يبرزوه وهما بيصمموا الفستان.

الأميرة غريس كيلي

يعتبر واحد من أهم فساتين الزفاف في تاريخ الموضة، ده كان تقييم مجلةConde nast bride  اللي بتعتبر من أشهر مجلات الزفاف على مستوى العالم، وهو فستان الممثلة الأمريكية جريس كيلي اللي اتجوزت من  أمير موناكو رينيه الثالث.

ووصفت صحيفة «تايمز» الفرح إنه أكتر حدث رومانسي يحصل والناس تتأثر بيه زي تأثرهم بقصة روميو وجولييت.

الأميرة شارلين ويتستوك

يقال إن تصميم فستان فرح الأميرة شارلين على الأمير ألبرت أمير موناكو استغرق من فريق العمل في بيت أزياء جورجيو أرماني حوالي 2500 ساعة أما التطريز استغرق 700 ساعة. وده عشان يقدروا يطلعوه بالصورة الجميلة اللي شايفنها في الصورة.

الأميرة كلير لادماتشر

المصمم اللبناني إيلي صعب صمم فستان فرح الأميرة كلير لادماتشر أميرة لوكسمبورج على الأمير فيليكس والفستان كان مدي للأميرة طلة مبهجة.

الأميرة اليزابيتا ماريا

أما مصمم الأزياء الإيطالي فالينتينو فصمم فستان فرح الأميرة اليزابيتا ماريا على الأمير اميديو.

 الأميرة مادلين

وفالينتينو صمم برضه فستان فرح الأميرة مادلين ابنة ملك السويد كارل جوستاف على خبير المال الأمريكي كريستوفر أونيل. وهتلاحظوا إن في تصميمه للفستانين اعتمد إنه يطلعهم بشكل رقيق وفي نفس الوقت جميل وليه إطلالة متميزة.

البساطة

والحقيقة كل الفساتين اللي اتكلمنا عنها اعتمد مصمميها على البساطة في تنفيذها يعني مش هتلاقي فستان مبهرج وأوفر لأن الأفورة هتفقد الفستان جماله حتى لو أغلى فستان في العالم.

شبه روحك

وكل لما يكون الفستان بسيط وأهم حاجة في شبه من روحك هيكون أجمل وده برضه اللي اعتمد عليه المصممين في إنهم يخلوا الفساتين فيها روح من العرايس مش مجرد فستان وخلاص.

شراء القماش

من أحسن الأماكن اللي تشتري منها قماش شارع الأزهر اللي في الحسين، وعليكي إنك تاخديه من أول تقاطع شارع بورسعيد لغاية جامع سيدنا الحسين وهتلاقي وأنتي ماشية محلات على الجنب اليمين والشمال مليانين أشكال مختلفة من القماش.

وبجانب الأزهر روحي كمان وكالة البلح وعشان تروحيها هتركبي المترو وتنزلي محطة جمال عبد الناصر اللي هي الإسعاف وهتسألي أي حد على مكان  الوكالة وهيدلك.

أماكن التفصيل والتأجير

لو تعرفي أي أتيليه يكون بيعمل الحاجة كويس روحيه على طول ولو متعرفيش ممكن مثلًا تروحي لأتيليه ميرفت فهمي، أو أتيليه أحمد علي، أو أتيليه محمد رجب. ولما تدوسي على اسمهم هتقدري تدخلي على صفحتهم وتتفرجي على صور الفساتين بتاعتهم وتعرفي عنوانهم.

ولو عايزة تأجري ممكن تنزلي شارع عباس العقاد اللي هتلاقي من أوله محلات فساتين أفراح كتيرة تقدري تتفرجي عليها.