كوميديا وأكشن ورومانسي.. 5 أفلام استنوها الفترة الجاية
«يوم للستات»، «حب»، «أخر ديك في مصر»، «هبوط اضطراري»، «رايحين في داهية»، كل دي أفلام مصرية منها اللي تصويره خلص، ومنها اللي لسة بيتصور، ومنها اللي لسة هيتصور.
ومن المنتظر إننا نشوفهم على شاشات السينما خلال الفترة الجاية. وفي الموضوع ده من «شبابيك» هنتعرف على قصة كل فيلم وأبطاله.
يوم للستات
بيقرر مركز شباب في حي شعبي إنه يخصص يوم لستات الحي ينزلوا فيه حمام السباحة، وطبعًا الرجالة مش هتسيب الموضوع يعدي كده، فقرروا هما كمان يعملوا يوم ليهم وما بين اليومين هنعيش وياهم مجموعة من الأحداث اللي مليانة مشاعر مختلفة.
ستات الفيلم: إلهام شاهين، ونيللي كريم، وناهد السباعي، ورجاء حسين، وهالة صدقي، وشيماء سيف. أما الرجالة فهم: محمود حميدة، وأحمد داوود، وأحمد الفيشاوي، وفاروق الفيشاوي، وإياد نصار.
والفيلم من إنتاج إلهام شاهين، وتأليف هناء عطية، أما الإخراج لكاملة أبو ذكري. وبيشارك الفيلم في مهرجان القاهرة السينمائي وهيتعرض في افتتاح دورته الـ38.
آخر ديك في مصر
بيحاول محمد رمضان هو وعيلته أنهم يسافروا برا مصر من خلال مركب بطريقة غير شرعية، وفي أثناء الرحلة المركب بتغرق وكلهم بيموتوا ماعدا «رمضان».
ولما بيرجع «رمضان» لقريته بيكتشف إن هو الرجل الوحيد في القرية وبيلاقي كل البنات عينهم منه وعايزين يتجوزوه عشان يملوا الأرض عزوة.
الفيلم من بطولة محمد رمضان، وإنتصار، وهالة صدقي، وليلى عز العرب، وإنجي وجدان، ومن تأليف أيمن بهجت قمر، وإخراج عمرو عرفة، وبيدور الفيلم في إطار كوميدي.
حُب
المخرج داوود عبد السيد بيستعد لإخراج فيلم «حُب»، اللي هيكون بطولة محمد رمضان وده هيبقى أول تعاون يجمع بينهم.
وعبر «رمضان» عن سعادته بالشغل مع «داوود»، وقال عبر تغريدة على تويتر «سعدت باختيارك لي، فيلم ثقة في الله سوف يحقق المعادلة الصعبة فنيًا وتجاريًا (حُب) للمخرج داود عبدالسيد، انتظرونا».
أما «داوود» قال عن سبب اختياره لـ«رمضان» إنه «أفضل من يستطيع القيام بالدور»، وده من خلال حواره مع موقع اتفرج. والفيلم من المفترض إنه هيدور في إطار قصة رومانسية. وباقي تفاصيل الفيلم لسة لم يتم الإعلان عنها.
هبوط اضطراري
بيدور الفيلم في إطار من أحداث الأكشن حوالين أحد أبناء رجال الأعمال اللي بيتقتل وبيتم اتهام إتنين من المقربين ليه بقتله فبيضطروا أنهم يهربوا من الشرطة.
والفيلم هيكون من بطولة أحمد السقا اللي هنشوفوا بنيولوك مختلف، وغادة عادل، وأمير كرارة، ومصطفى خاطر، وأحمد فهمي. أما التأليف لمحمد سيد بشير، والإخراج لأحمد خالد موسى.
رايحين في داهية
فكرة الفيلم بتدور حوالين الرجل والمرأة والصراع الدائم ما بينهم على مر الحياة، والفيلم من بطولة حسن حسني، ومي سليم، وبشرى، وسليمان عيد، ونبيل عيسى، وريم مصطفى، وأحمد صلاح حسني، ومن تأليف أحمد مجدى، وعمرو بدر، وندى أكرم، وإخراج أحمد صالح. والفيلم بيدور في إطار لايت كوميدي.
وصرحت ريم مصطفى من خلال موقع اتفرج إنها هتقدم شخصية كوميدية، أما مي سليم فصرحت في نفس الموقع إنها هتقدم شخصية مصورة فوتوغرافية، وهتعمل ليها نيولوك جديد.
