قبل ما نوفمبر يخلص.. غيّر جو في «سيوة والريان وراس شيطان»
اتعودنا من وقت للتاني نقول ليكوا على الرحلات اللي بتطلع لأماكن مختلفة وده عشان متفكروش كتير هتروحوا فين لو عايزين تطلعوا أجازة. يلا اختاروا الرحلة اللي حابين تعيشوا وياها في روقان واستجمام :)
دهب
في خمس أيام كاملة بداية من يوم الخميس 24 نوفمبر ليوم 30 نوفمبر هتلف دهب كلها مع فريق Rove Egypt بداية من شاطئ اللاجونا، البلوهول، ثري بولز، كيڤز، وادي جني، جبل الطويلات، لغاية البلو لاجون، ومش بس كدة ده انت هتخيم كمان في محمية راس أبوجالوم وسعر تذكرة الرحلة هيكون 800 جنيه وعشان تعرف يومك هيمشي ازاي ادخل هنا.
راس شيطان
أنشطة، مغامرة، تنطيط، راحة، استجمام كل الحاجات ديه هتعيشها لما تطلع مع فريق Kites Egypt رحلتهم لراس شيطان اللي فيها هتستمتع بالجبال ومناظرها الطبيعية وهتنزل البحر وتستمتع بوقت الغروب وهتعمل سفاري. والرحلة هتكون من يوم الخميس 24 نوفمبر لـ 26 نوفمبر وسعر التذكرة هيكون 699 جنيه وعشان تعرف تفاصيل أكتر ادخل هنا.
قرية تونس
روحت الفيوم قبل كدة؟ طب لو روحت شوفت قرية تونس وجمال القعدة فيها وسط الخضرا والجو السقعة وفطرت فطارها البدوي. لو مروحتش يبقى جالك الفرصة انك تروح مع فريق ECHO Travel وتعيش الجو اللي حكينا ليك عنه يوم الجمعة 25 نوفمبر الساعة 7 الصبح وهترجع الساعة 11 بليل.
ومش بس هستمتع بالجو لأ ده انت كمان هتجرب تعمل حاجات مختلفة زي انك تجرب تشتغل على الفخار وتحوله لخزف لأن القرية فيها مدارس وورش لتعليم الخزف. وكمان ممكن تركب خيل، مراكب شرعية في بحيرة القرية وكل الفسحة ديه هتكون بـ295 جنيه للمصريين و355 جنيه للأجانب وعشان تعرف تفاصيل أكتر ادخل هنا.
وادي الريان
عايز تركب فلوكة في بحيرة قارون، طب نفسك كدة تتفرج على منظر الشلالات وتاخد عندها سيلفي يبقى يلا روح وادي الريان مع فريق ترحال يوم الجمعة 25 نوفمبر وسعر التذكرة هيكون 200 جنيه. بس الرحلة مش هتوقف بس على انك تركب فلوكة وتتفرج على الشلالات لأ ده فيه حاجات تانية كتيرة مستنياك لو عايز تعرفها ادخل على الإيفينت هنا.
سيوة
بتشتهر سيوة بعيونها وبحيراتها وينابيعها وبوجود الصحراء العلاجية فيها عشان كده أطلقوا عليها اسم جنة الصحراء الغربية. وفريق رحالة - Rahalla قرر إنه ياخدك لجنة سيوة عشان تشوف جبل الموتى، والبيت السيوي، وبحر الرمال. وده بداية من يوم 29 نوفمبر ولمدة 4 أيام/ 3 ليالي.
سعر الفرد في الغرفة المزدوجة أو الثلاثية 888 جنيه و سعر الفرد في الغرفة الفردية 1100 جنيه .والسعر ده شامل حاجات كتيرة جدًا اعرفها من هنا.
