رئيس التحرير: أحمد متولي

ورش المزيكا.. اتعلم وانبسط واطربنا في الأماكن دي

ورش المزيكا.. اتعلم وانبسط واطربنا في الأماكن دي

عايز تتعلم كمان؟ طب بتفكر في العود، ولا البيانو؟ لونفسك تتعلم آلة موسيقية تستمتع بيها أولًا، وبعدين تطرب الناس هنقولك في الموضوع ده من «شبابيك» على الورش المتاحة اللي هتقدر تعلمك، وكل اللي عليك أنك تستعد وتحط رجلك على أول سلمة من السلم الموسيقي. 

الجيتار

مركز «ليجاتو مصر» لتعليم الموسيقى والفنون هيعمل ورش مختلفة سواء في الجيتار، أو الدرامز، أو العود وهيبدأ يعلن عنها على صفحته من هنا أخر شهر 11. وأي ورشة فيهم بتكون مدتها 8 حصص في الشهر ومكونة من 5 أشخاص، وسعرها 160 جنيه، وممكن الورشة تزيد شهر تاني وده اللي هيحدده العازف إذا كان فيه شهر تاني ولا لأ، وعامة أقل ورشة بتكون مدتها 3 شهور.

الكمان

لما بيلاقي مركز «سوناتا» لتعليم فنون العزف والغناء إن فيه مجموعة عايزة تتعلم آلة معينة بيعمل بيهم ورشة، وفيه ورشة هتحصل لتعليم الكمان ومدتها هتكون شهر، وكل أسبوع هيكون فيه حصة وقتها من ساعتين لساعتين ونص، وعدد الأفراد فيها من 3 لـ 4 أشخاص وسعرها 200 جنيه.

فممكن تروح وتلحق تحجز في الورشة دي لأن أول ما العدد هيكتمل هيبتدوا الورشة، وممكن كمان لو أصحابك عايزين يتعلموا معاك تروحوا كلكوا، وساعتها ممكن تبدأو في ورشة تانية لوحدكوا. عنوان المركز: 34 شارع 9 المعادي بجوار محطة مترو المعادي، ورقمه: 01000933945

العود

الأستاذ بمعهد الموسيقي العربية أيمن محفوظ هيعمل في مركز «الربع» الثقافي ورشة لتعليم العزف على العود هتبدأ يوم 26 نوفمبر، ومدة الورشة شهر، وميعادها يوم السبت من كل أسبوع من الساعة 4 إلى 7 بالليل، وسعرها هيكون 250 جنيه.

وهتتعلم جوا الورشة أساسيات العزف على العود، وإزاي تعزف عن طريق السمع، وعن طريق قراءة النوتة الموسيقية. عنوان المركز: شارع المعز لدين الله الفاطمي جنب مسجد الأقمر، درب التمبكشة. وعشان تحجز اتصل  على الرقم: 01143239820.

بيانو

لو عايز تتعلم بيانو، جيتار، كمنجة، عود، درامز، أو آلات نفخ زي الفلوت، والناي، تقدر أنك تتعلمها لوحدك من خلال مركز القاهرة للموسيقى بمصر الجديدة، ودرس التعليم بيكون 4 حصص في الشهر، بمعدل حصة كل أسبوع وسعرها 300 جنيه.

تقدر تروح مركز القاهرة للموسيقى بمصر الجديدة في أي وقت وتحجز في 14 شارع الزهور، عمارات هديكو، طريق المطار، قريب من مستشفى الجلاء للقوات المسلحة، هتدخل أول فتحة بعد المستشفى وهتلاقي المكان. وأرقام تليفون المركز 0222667544 - 01112964444 - 0222668649.

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»

ميكس ميديا