«العروسة فاتن».. السر وراء اختيار أسماء نجوم السينما
أجيال كتير من النجوم والنجمات عدوا علينا عرفناهم بأسمائهم اللي ظهروا بيها على الساحة الفنية لكن مفكرناش نقف عند الاسم ونعرف أيه القصة اللي ورا اختياره، وهل هو فعلًا الاسم الحقيقي ولا لأ.
في التقرير ده من «شبابيك» هناخد جولة سريعة جوا عالم الفن ونجيب ليكوا بعض القصص اللي كانت السبب في اختيار اسمائهم.
فاتن حمامة
أخو «فاتن» الكبير «منير» كان عنده عروسة صغيرة وكان مسميها «فاتن»، فمامتها قالت لو جت بنت المرة دي هسميها «فاتن»، وخلّفت فعلًا بنت وسمتها فاتن حمامة، وده اسم «فاتن» الحقيقي والإسم اللي اشتهرت بيه برضه. والحكاية دي حكتها فاتن حمامة لما استضافتها الإعلامية أماني ناشد في برنامج «سهرة مع فنان» على التلفزيون المصري.
نور الشريف
والد «نور» مات وهو عنده 9 شهور، وسموه وقتها في شهادة الميلاد محمد جابر محمد. لكن لما «نور» كبر شوية لقي البيت بيناديه «يا نور» واسم «نور» جده هو اللي اختاره يناديه بيه، والبيت كله كان بيناديه «يا نور».
وافتكر «نور» إن عمه إسماعيل هو أبوه، فعاش باسم نور إسماعيل ومعرفش إن اسمه محمد جابر محمد غير وهو عنده 6 سنين في أول يوم في أولى ابتدائي لما نادى الأستاذ على اسمه في مدرسة أحمد بن طولون.
الأستاذ (ينادي) : محمد جابر محمد
فمردش عليه «نور»
الأستاذ: أنت محمد جابر محمد
نور : لأ أنا نور إسماعيل
راح الأستاذ قال ليه من النهاردة اسمك محمد جابر محمد.
ومن هنا عرف «نور» إن اسمه الحقيقي اللي كان مكتوب في شهادة الميلاد هو محمد جابر محمد.
- قصة اسم الشريف
«نور» وهو طالب في المعهد عنده 18 سنة اختاروه يعمل شخصية روميو في مسرحية روميو وجولييت لشكسبير شعبة المسرح العالمي. فكانوا وقتها بيدوروا ليه على اسم شهرة يكون ليه مسمع موسيقي على الأذن ويليق مع تجسيده لشخصية روميو. ودار الحوار ده ما بينهم:
المسؤول: اسمك أيه؟
نور: محمد جابر محمد
المسؤول: بس الاسم ده هيكون تقيل على إنه يكون اسم شهرة.
نور : أنا بينادوني في البيت «نور»
المسؤول: «نور جابر»، برضه اسم كده ملوش موسيقى.
ففكر «نور» في إن هو واخته عواطف بيحبوا عمر الشريف، فأخته قالت ليه ما تسمي نفسك «نور الشريف»، ومن هنا بقى اسمه نور الشريف. «نور» ده الاسم اللي بينادوه بيه عيلته. و«الشريف» دلالة على حبه لعمر الشريف.
وحكى «نور» تفاصيل اسمه من خلال حواره في برنامج «حلوة يا دنيا» سنة 2013.
روبي
اسم «روبي» الحقيقي هو رانيا حسين، لكن اللي سماها «روبي» هو المخرج يوسف شاهين لما جت تمثل معاه فيلم «سكوت هانصور». والقصة دي حكتها «روبي» من خلال حوارها مع برنامج «صاحبة السعادة».
ولما اتقابل المخرج العالمي مع حسين حصل الحوار التالي:
شاهين: أنا عايز أغير اسمك وأعمله اسم فني.
رانيا: ليه؟
شاهين: لأن فيه رانيات كتير فيه رانيا فريد شوقي، وفيه رانيا يوسف، فعايزين اسم فني.
رانيا: طب هتسميني أيه؟
شاهين: سيبيني أفكر يوم كده.
رانيا : فكرت في أيه بقى؟
شاهين: سحر
رانيا: لأ سحر لأ
شاهين: طب أيه رأيك في روبي؟
رانيا: حلو روبي.
ولفت نظر رانيا حسين اسمها الفني الجديد «روبي» وبقى ده اسم الشهرة بتاعها.
صباح
جانيت جرجي فغالي ده الاسم الحقيقي لـ«صباح» لكن اللي سماها «صباح» وبقى ده اسم الشهرة بتاعها هو الشاعر صالح جودت.
و«جودت» كان اشترك في كتابة أغاني الفيلمين اللي كانت بتمثل فيهم وهما فيلم «القلب له واحد»، و«هذا جناه أبي». واختار ليها اسم «صباح» لأنه كان بيشوف إن وجهها مشرق كنور الصباح. ومن هنا بقى اسمها «صباح».
وفيه قصة تانية بتقول إن المنتجة «آسيا» حطت صورة «صباح» على مجلة اسمها «الصباح المصرية» وطلبت من القراء إنهم يختاروا ليها اسم فإختاروا ليها اسم «صباح» على اسم المجلة، وده لأنهم شافوا إن وجهها مشرق كنور الصباح، وهذا يتفق مع رأي «جودت» أيضًا.
