رسام شاطر وعايز تسوق شغلك.. طيب خوش ع المفيد
شايف أنك بترسم حلو بس مش عارف إزاي توصل وتسوق رسمك ده بين الناس، وحاسس برضه إن رسمك ده ممكن يكون مصدر دخل ليك بس مش عارف برضه تعمل أيه عشان تكسب من وراه؟ طيب هنقولك في الموضوع ده من «شبابيك» على مجموعة نصايح بيقدمها ليك صاحب مشروع الألف رسام عبد الله الدسوقي.
الدايرة الصغيرة حواليك
في البداية الرسام عبد الله الدسوقي بيقولك إن دايرتك الصغيرة حواليك اللي فيها أهلك وأصحابك ابدأ وريهم رسوماتك كلها بحيث تبني ليك قاعدة من الناس تعرف أنك رسام موهوب. وده هيديك ثقة بإن لما بتيجي ترسم مش بتحط رسوماتك عندك في الدرج وخلاص لأ ده أنت بتنشرها بكل ثقة على صفحتك على فيسبوك أو تويتر أو انستجرام وعارف إن فيه ناس كتير هتشوفها حتى لو كانوا 100 واحد.
حدد هتتخصص في أيه
«الدسوقي» بيقولك إن التحديد شيء مهم جدًا، بمعنى أنك بعد ما عرّفت خلاص الدايرة حواليك بإنك بترسم في العموم حلو وبنيت عندهم ثقة، عليك أنك تقعد مع نفسك كده وتحدد هل أنت عايز تبقى رسام شامل لأي نوع من الرسم سواء كاريكاتير، خط عربي، أو بورتريهات، ولا تتخصص في حاجة معينة ولا أنت عايز ترسم في العموم أي حاجة عشان بعدين تعلم الناس وتعمل ورش.
الدراسة وتعلم المهارات
لو كنت مثلًا حددت أنك هتتخصص في رسم البورتريه لأن لقيت عندك كذا رسمة راسم فيها البورتريه بشكل جميل زائد كمان الناس أعجبت بيها، «الدسوقي» بيقولك إنك لازم تدرس كل حاجة عن الفن ده عشان تاخد خبرة من الناس اللي ليها بصمة فيه وتتعلم منهم عشان يكون ليك بصمتك الخاصة زيهم فيما بعد.
وعامة لازم تدرس أي فن أنت ناوي تتخصص فيه وده عشان لما تكبر في المجال وحد دخل معاك فيه مناقشة عن رسمتك تكون بترد عن خبرة ودراسة مش عن مجرد معلومات عامة. وبجانب الدراسة لازم تتعلم مجموعة من المهارات وهي مهارة التواصل مع الناس والمهارة في عرض شغلك والتسويق.
للمبتدئين.. مواقع هتعلمك الرسم والتلوين
التواصل مع الناس
«الدسوقي» بيقولك إن بجانب أنك دارس للفن اللي هتتخصص فيه لازم يكون عندك مهارة أنك تتكلم وتوصل للناس الرسالة اللي ورا فنك يعني لما حد يجي يتكلم معاك متوقفش قدامه وأنت مش عارف تعبر عن اللي أنت قاصده لأ لازم تكون واثق من اللي بتقدمه وعارف توصلوا عشان تسيب انطباع عند الناس كويس.
عرض الشغل
بيشوف «الدسوقي» إن عرض الشغل أهم من الشغل نفسه، بمعنى أنك ممكن تكون راسم رسمة جميلة جدًا بس طريقة عرضك ليها مش حلوة يعني مش حاططها في برواز شيك يخليها تلمع كده في نظر المشاهد. وحاططها في أي حاجة مخلياها شكلها مش حلو. وعليك أنك تهتم بطريقة عرض شغلك عشان لما تيجي تسوق شغلك يقدر الناس يشوفوه وهم معجبين بيه مش يعدي عليها مرور الكرام بسبب أنك مهتمتش تعرضه بشكل تجذبهم بيه.
التسويق
- تسويق من الدايرة الصغيرة
نيجي بقى عند نقطة التسويق، فاكر الدايرة الصغيرة اللي أنت عن طريقها قدرت تسوق لنفسك بين الناس بحيث إنهم يعرفوا إن في حد بيرسم كويس. «الدسوقي» بيقولك إن الدايرة دي لو حصل أي مناسبة عندهم سواء عيد ميلاد صاحب ليك أو قريب ارسم ليه صورة كهدية لأن بالصورة دي أنت بتسوق لنفسك وأكيد في ناس هتشوف الصورة فبالتالي هتسأل مين اللي عملها وهيطلبوك ترسم ليهم رسمة كمان فالدايرة كده بتوسع وهتلاقيك بتاخد تمن الرسمة فأنت بكده حققت ربح مادي.
و«الدسوقي» بيقولك لو حصل إن صاحب الرسمة علق عليها إنها كان ناقصها حاجة مثلًا وكانت هتكون حلوة متزعلش أبدًا وارجع تاني اشتغل على نفسك وظبط الحاجة اللي قصرت فيها، وحلو إنه قالك حاجة زي كده قبل ما تخرج برسوماتك لدايرة أكبر فيها ناس غريبة متعرفكش بحيث لما تخرج ليهم تكون واثق إن رسوماتك مفيهاش غلطة.
لو عايز ترسم.. 4 شباب هيعلموك من طقطق لسلامو عليكو
- تسويق مشترك مع ناس
ممكن تسوق رسوماتك عن طريق الشراكة مع ناس تانية، يمعنى «الدسوقي» بينصحك لو فيه موقع ما شايف إن عليه نسبة مشاهدة ما فممكن تبعت ليهم رسوماتك بحيث ينزلوا إعلان بيها عندهم ولو حد كان عايز تعمله رسمة سعرها يكون متقسم عليك وعلى الموقع يعني كل واحد منكم بياخد نسبة.
- تسويق من خلال جاليري وكافيه
وفيه كمان تسويق تالت وهو إنك تنزل برسوماتك وتعدي على أي كافيه أو جاليري وتعرض عليهم حاجتك بحيث لو عجبتهم يكون فيه تعاون ما بينكوا ولما يجيلك طلبات لناس عايزة اللوح بتاعتك يتقسم نسبتها عليك وعليهم.
وبينصحك «الدسوقي» في النهاية أنك متستعجلش في نتايج أي حاجة بتعملها إنها تكون هايلة وخد خطواتك واحدة واحدة، وطبعًا متخليش مستواك يكون ثابت في الرسم وطور من نفسك كل شوية وأهم حاجة أنك خدت القرار وبدأت.
