الأسعار نار.. اعملي حلاوة المولد في البيت ووفري فلوسك
كل حاجة سعرها زاد من سلع غذائية، لدهب، ولبس وحاجات تانية كتيرة. وطبعًا «حلاوة المولد» من ضمن الحاجات اللي أسعارها زادت كتير وعشان كده جبنا ليكي في الموضوع ده من «شبابيك» وصفات عمليها في البيت بنفسك لمجموعة من حلويات المولد اللي قلبك يحبها بيقدمهالك الشيف شربيني، وبيقولك اللهم صل على النبي.
القشطة
- المقادير:
- كيلو سكر
- نص كيلو عسل جلوكوز
- كوباية ماية
وبعدين تحطيهم كلهم على بعض على النار يغلوا مع بعض مش أقل من تلت ساعة، وعشان تتأكدي أن الخليط ده استوى بعد ما خرجتيه بتجيبي كوباية مية ساقعة وتاخدي منه معلقة وتحطيها على الخليط ولو خرزت يعني لقيتي على الوش خرز كده زي شكل العنب تبقى استوت. وبعد كده تحطي الخليط ده في العجانة اللي هي المكنة اللي فيها مضرب زي مضرب البيض ده وتشتغلي عليها لغاية ما تبيض معاكي.
بعد كده تحطي عليها ربع كوباية لبن بودرة وشوية جيلاتينة بودر بس بتبلي الجيلاتينة في مية الأول وتحطي شوية فانيليا. وبعد كده تخلطيهم تاني كلهم في العجانة مع بعض لغاية ما تلاقيها عملت معاكي زي الخيوط كده. وبعدين هاتي صينية وادهنيها زيت وفرغي فيها القشطة اللي أنتي عملتيها وحطي جوا القشطة شوية مكسرات زبيب، أو لوز زي ما أنتي عايزة. وتسيبي الصينية ساعتين لغاية لما تبرد. ولما تيجي تقطعيها بترشي عليها جوز هند بودر كده. ودي وصفة القشطة.
الفولية
الشيف شربيني بيقولك إن عمايل الفولية والحمصية والسمسمية واحدة.
- المقادير:
- كيلو سكر
- كوباية مية
- نص كيلو عسل جلوكوز
- وسنة فانيليا مش كتير
هتحطيهم على النار يغلوا وبرضه هتعملي نفس الحركة اللي عملتيها مع القشطة وهتجيبي معلقة مية ساقعة تحطيها على الخليط عشان تتأكدي إن اتعمل عليها طبقة زي الخرز كده، ولو اتعملت كده تبقى استوت، وتحمصي بقى كيلو سوداني وتحطيه وهو سخن على الخليط ده.
الحمصية
- المقادير:
- كيلو سكر
- كوباية ماية
- نص كيلو عسل جلوكوز
- وسنة فانيليا مش كتير
هتحطيهم على النار يغلوا وبرضه هتعملي نفس الحركة اللي عملتيها مع القشطة وهتجيبي معلقة مية ساقعة تحطيها على الخليط عشان تتأكدي إن اتعمل عليها طبقة زي الخرز كده ولو اتعملت كده تبقى استوت. وتحمصي بقى كيلو حمص وتحطيه وهو سخن على الخليط ده.
السمسمية
- المقادير:
- كيلو سكر
- كوباية ماية
- نص كيلو عسل جلوكوز
- وسنة فانيليا مش كتير
هتحطيهم على النار يغلوا وبرضه هتعملي نفس الحركة اللي عملتيها مع القشطة وهتجيبي معلقة مية ساقعة تحطيها على الخليط عشان تتأكدي إن اتعمل عليها طبقة زي الخرز كده ولو اتعملت كده تبقى استوت. وتحمصي بقى كيلو سمسم وتحطيه وهو سخن على الخليط ده.
الملبن
- المقادير:
- كيلو سكر
- نص كيلو عسل جلوكوز
- وجيلاتينة بودر
وبتغليهم على النار مع بعض وبتخليهم يبردوا وبعدين تجيبي حبل دوبارة وتحطي فيه عين الجمل بتفتحي عين الجمل من النص وتدخلي فيه الخيط. وبعدين تحطي الحبل في الخليط وتسقطيه مرة وإتنين عشان الخليط يمسك في الحبل. وبعدين تحطي عليه نشا وتسيبيه يبرد.
