عايز تتعلم دوبلاج؟.. ورش ومراكز هتعلمك الفن ده
«الدوبلاج» هو مصطلح تلفزيوني مقصود بيه تركيب أداء صوتي بديل للنص الأصلي بلغة تانية.
ولأن «الدبلجة» مبقتش قاصرة عندنا على أفلام الكروتون، وبقينا نشوف أفلام ومسلسلات كتير أجنبية معربة، بقى في حاجه لشباب عندها موهبة تأدية أصوات الشخصيات المصورة، وبقى في توجه من عدد كبير من الشباب لامتهان الفن ده.
في التقرير ده بنرصد عدد من الأماكن اللي بتقدم ورش لتعليم الدوبلاج
«علشان بلدنا»
مركز «علشان بلدنا» للتدريب الإعلامي، هو مركز متخصص في التدريب العملي. ومن ضمن التدريبات العملية اللي بيقدمها كورس الدوبلاج.
أول ورشة جايه للمركز، هتكون يوم 10 ديسمبر، مع المدرب عبد الرحمن سليم. وطبعا فيه ورشة «دبلجة» باستمرار بينظمها المركز.
هتتعلم خلال الورشة حاجات كتير منها كيفية النطق الصحيح، ومخارج الحروف الصحيحة، وكيفية خروج النفس وتنظيم النفس التدريب على طبقات الصوت وحاجات تانية كتير.
تكلفة حضور الورشة هيكون 600 جنيه. والورشة مقسمة لـ8 محاضرات، وهتكون محاضرتين كل اسبوع عدد الساعات فيهم ساعتين.
لتفاصيل أكتر والتسجيل زور صفحة المركز من هنا.
South media
«ساوث ميديا - South media» هى شركة إعلامية تنموية متخصصة في صناعة وتسويق الأفكار الاجتماعية وإدارتها وتقديم العديد من الخدمات الاجتماعية، المنتجات الإعلامية، التطويرية، والتدريبية.
ومن ضمن الخدمات اللي بتقدمها الشركة، الورش المختلفة ومن الورش دي طبعا ورشة تعليم دوبلاج.
وأول ورشة جايه لتعليم الدوبلاج، هتكون يوم 15 ديسمبر، وهيقدمها مدرب التعليق الصوتي والدوبلاج تامر حامد، وهو مؤسس ومدير فريق وموقع «سبوت ميديا».
هتتعلم خلال الورشة إزاي تحلل شخصيات اسكربت الدوبلاج، وإزاي تلعب وتختار الصوت المناسب للشخصية، والممنوع والمباح عشان صوتك يكون كويس وانت بتتكلم، وكمان تمثيل مشاهد كرتونية بصوتك.
للإطلاع على تفاصيل تانية والتسجيل في الورشة الجايه أو متابعة باقي ورش الشركة زور صفحتها من هنا .
المركز العربي للتدريب
يعتبر المركز العربي للتدريب والدعم الإعلامي، من أبرز المراكز اللي بتقدم ورش لتعليم فن الدوبلاج وبسعر مناسب جدا. وغالبا بينظم ورشتين على الأقل في الشهر للدبلجة. ورشة لمدة يوم بتكون بـ50 جنيه بس، وورشة متقدمة سعرها بيكون أكتر شوية.
الورشة الجايه للمركز هتكون لمدة 4 أيام بداية من يوم 16 ديسمبر، في «ستوديو wave». ودي من الورش المتقدمة وتكلفة الحضور بتكون 450 جنيه بس.
للتفاصيل والتسجيل ممكن الاتصال على الرقم ده (01060846534) . ولمتابعة باقي الورش اللي بينظمها المركز ممكن تزوروا صفحته على فيسبوك من هنا.
محاضرة مروة الإبياري
الورش بس مش مقتصرة على القاهرة. لأ ده كمان فيه محاضرة عن فن الصوت والدوبلاج هتكون في الإسكندرية هتقدمها مروة الإبياري، الحاصلة على بكالوروس إعلام قسم اذاعة وتليفزيون جامعة القاهرة.
وفى المحاضرة دي اللي هتكزن يوم 23 ديسمبر، هتعرف كل حاجة تخص الفن ده وكمان هتدرب عملي على تمارين كتيرة.
وعشان تعرف تفاصيل تانية عن الورشة والتسجيل ادخل هنا.
