فرحكوا قرب والمشاكل بتزيد؟.. يلا بسرعة الحل أهو
فرحك قرب وحاسة إن المشاكل بينك وبين خطيبك عمالة تزيد بسبب الضغوط اللي عليكوا انتوا الإتنين من ناحية الجهاز وحاجات تانية كتير وخايفة إن ده يأثر على علاقتكوا بالسلب والموضوع ميكملش.
متقلقيش لأن في الموضوع ده من «شبابيك» هنقول ليكي وليك إزاي تتعاملوا مع الضغوط اللي بتواجهكوا، وكمان إزاي تتعاملوا مع أهلكوا لأن الأهل في أوقات كتير بيزيدوا من الضغط النفسي ده نتيجة أنهم عايزين كل حاجة تبقى ماشية تمام، وأوقات تانية احنا اللي بنشركهم في الضغط ده وبيبدأوا يتوتروا ويضغطوا علينا.
نظرة سريعة على المشاكل
اختيار العفش واختلاف الذوق
لما سألنا بعض البنات عن أسباب المشاكل كلمونا في حاجات كتير منها اختيار العفش واختلاف الذوق.
نانسي وجيه بتقول إن «مشاكل كتيرة حصلت بينا بسبب العفش لأن زوقنا احنا الإتنين مختلف عن بعض وهو بيصمم يمشي رأيه حتى لو كان أنا عندي حق في اللي بقولوا».
زيادة الأسعار
زيادة الأسعار وعدم استقرارها خلقت مشاكل كتير في علاقة رحمة أحمد، وكانت واقعة في حيرة ومش عارفة تختار ما بين المهم والأهم.
فلوس الفرح
فاطمة ناصر بتقول إن بتحصل مشاكل كتيرة بتدور مثلًا حوالين فيه فلوس متاحة نعمل بيها الفرح ولا لأ، وحاجات عايزة اشتريها ليها لازمة تتجاب من وجهة نظره ولا لأ؟ ومش بكون عارفة في النهاية مين صح فينا ومين غلط وده بيخلي في مشاكل.
الأهل
«نانسي» بتقول كمان إن «الأهل كتير بيدخلوا بينا وبتزيد المشاكل»، وبتوافقها الرأي هبة شوكت اللي بتقول إن «الأهل بيكونوا متوترين في الفترة دي وعايزين كل حاجة تكون ماشية تمام وبالتالي ده بيوترنا أكتر».
دي كانت نظرة سريعة على المشاكل اللي بتحصل قبل الفرح واللي أكيد بتأثر في نفسية الولد والبنت وبتخليهم شايلين ناحية بعض.
استشاري الصحة النفسية جمال فرويز بيقول إن عشان المرحلة دي تعدي على خير لازم تخلوا بالكوا من 3 حاجات وتعرفوا إزاي تتعاملوا معاها، وهي: اختلاف وجهات النظر، والظروف الإقتصادية، وتدخل الأهل.
اختلاف وجهات النظر
ولو حصل بينكوا أي اختلاف في أي حاجة بتتناقشوا فيها لازم كل واحد منكوا يقرب وجهة نظره للتاني لغاية ما تتفقوا ومينفعش إن أي حد فيكوا يصر على وجهة نظره لأن الإصرار ده هيخلي العلاقة بينكوا متكملش. وفي النقطة دي بتقول استشاري العلاقات الأسرية غادة السمني إن فيه فرق مابين اختلاف الذوق واختلاف القيم.
اختلاف الذوق ده انتوا قادرين تقربوا وجهة نظركوا فيه عشان توصلوا لإتفاق في النهاية والإختلاف ده أمره سهل. لكن لو حصل اختلاف قيم بمعنى إن حد منكوا كان متفق على حاجة وأخل بيها عليكوا انكوا توقفوا مع نفسكوا وتتكلموا في الأمر ده عشان الموضوع بينكوا ميحصلش فيه مشاكل تتسبب في انكوا تسيبوا بعض.
الحب مدرسة.. بص واتعلم في 5 مشاهد
مراعاة الضغوط الاقتصادية
الأسعار زادت في كل حاجة فمش لازم كل حاجة تكون جاهزة في بيتك، وممكن تكتفي بس بإنكوا تجيبوا الحاجات الضرورية ولما تتجوزوا تبقوا تجيبوا الحاجة بتاعتكوا واحدة واحدة بحيث متحصلش مشكلة والفلوس تزنق معاه، وأنتي تكوني عايزة حاجة وتطلبيها منه فيشوف أنك مش مقدرة الظروف وتحصل مشاكل.
وفي الجزئية دي بتقول استشاري العلاقات الأسرية غادة السمني إنك لازم تعملي حسابك إن مش كل حاجة تبقى 100 %، لأن ممكن تحصل حاجة تغير الللي أنتي مرتباه.
يعني الظروف الإقتصادية اللي حاصلة تعتبر ظرف طاريء هيخليكي الحاجة اللي كنتي هتجبيها مثلًا بـ10 جنيه تدوري عليها وتجيبيها بـ6 من أي مكان عشان تقدري توفري في فلوسك.
ومش شرط عامة تجيبي كل حاجة في بيتك بسعر غالي لأن أكيد هتلاقي الغالي ده موجود في مكان تاني بسعر رخيص.
تدخل الأهل
تدخل الأهل في أي موضوع بينكوا لازم يكون بموافقتكوا انتوا الإتنين يعني لو نازلين تجيبوا العفش وعايزين حد من أهلكوا ينزل معاكوا لازم يكون بموافقتكوا أنتوا الإتنين وتكونوا عارفين إن غرض الشخص ده هو الصالح العام ليكوا يعني مش هينزل ويسبب مشكلة بينكوا.
وأي مشكلة ما بينكوا حلوها مع بعض ومدخلوش أي حد من أهلكوا فيها عشان المشكلة متكبرش ونفوس الأهل متشلش حاجة تجاهكوا. وبتقول غادة السمني إن نفوس الأهل ممكن تشيل الكلام اللي سمعته ده طول العمر وهيفضل محفور جواهم الكلام اللي انتوا اتكلمتوه معاهم.
يعني مثلًا لو حكيتي لمامتك مشكلة حصلت مع خطيبك ممكن مامتك تتعامل معاه بأسلوب مش حلو عشان هو مزعلك وتفضل شايلة منه جواها وهو هيحس أكيد وهيسألك وبالتالي لما يعرف هتحصل بينكوا مشكلة، مع أنك لو حليتي معاه المشكلة من البداية الموضوع هيتحل.
وحاجة بيتك لما تجبيها مش شرط توريها لأهلك وأصحابك عشان ممكن حد يقولك على رأيه بصراحة فيها إنها مش عجباه فبالتالي أنتي تتوتري وممكن توريها للي واثقة إنه مش هيضايقك بالرد بتاعه ويوترك لما توريه الحاجة.
