أمّن نفسك واحتفظ بنسخة من موبايلك.. 4 برامج هتساعدك
من كل الهواتف الذكية الموجودة في العالم في ٨٠٪ منها بيشتغل بنظام الأندرويد، وللأسف مبنقدرش نتحكم في الهاتف لنقل الملفات أو أخذ النسخ الاحتياطية من الأسماء والرسايل والتطبيقات بشكل سهل إلا من خلال طريقة أو برامج هي اللي بتسهل علينا عملية التحكم.
طبعا استخدامنا للهواتف الذكية تقريبا داخل في كل حاجه في حياتنا، وعشان كده، من الضروري اكتشاف الأدوات والبرامج المناسبة اللي هتوفر علينا الوقت والمجهود ومن خلالها نقدر نتحكم في الجهاز اللي في إيدينا.. في التقرير ده «شبابيك» بيقدملك ٤ برامج هيسهلوا عليك العملية دي جدا.
Mobikin Assistant for Android
كتير من البرامج الموجودة علي الانترنت بتساعدك في التحكم في جهازك بس اللي بيميز "Mobikin Assistant" إنك مش هتحتاج تدور علي الانترنت وتثبته علي جهازك، لأنه موجود بالفعل بس أنت محتاج توصل التليفون بالكابل وهيتيح لك تاخد نسخة من الأسماء والصور والرسايل والأغاني اللي على الموبايل، وبالتالي هيسمح لك تفضي مساحة تليفونك بسهولة.
البرنامج كمان بيتيح لك تاخد نسخة احتياطية من الأسماء لو خايف تفقدها، وكمان عن طريقه هتقدر تعرف الأرقام المكررة وهيساعدك في تنظيم قايمة الأسماء والعثور على الأرقام بشكل أسرع.
كمان في سبب يخلي "Mobikin Assistant" مميز، وهو أنه بيخليك تقدر تتحكم في الرسايل النصية ورسايل البريد الإلكتروني وتنظيمها بشكل أسهل وأسرع.
في حالة إن البرنامج مش موجود عندك ممكن تحمل نسخة الوندوز من هنا، ونسخة الماك من هنا، والموقع الرسمي من هنا.
SnapPea
برنامج "SnapPea" من مميزاته إنه بيتيح لك أداة من خلالها تقدر تاخد نسخة احتياطية من جهازك بالكامل بشكل بسيط وسهل عن طريق الكمبيوتر الشخصي، الأمر اللي ممكن يكون صعب بالنسبة لمستخدمي الويندوز والماك كمان.
كمان بيوفر لك تاخد نسخة احتياطية من تطبيقاتك قبل ما تعمل أي أبديت وبيتيح لك تنسخ الملفات بتاعته من الجهاز للتليفون، وكمان إضافة وتعديل قايمة الأسماء وإرسال رسائل نصية وحذفها أو تاخذ نسخ احتياطية منهم.
ممكن تحمل البرنامج نسخة الوندوز من هنا، ونسخة الماك من هنا.
AirDroid
من أسهل البرامج اللي ممكن تستخدمها في التحكم في تليفونك وبتوفر لك مميزات ضخمة مقارنة بالبرامج التانية، عن طريقه بتتحكم في تليفونك بشكل كامل من أول النسخ الاحتياطية لكل حاجة على التليفون سواء الصور أو الأغاني والفيديوهات لحد الأسماء والرسايل النصية.
وممكن تبعت رسايل منه وتعمل مكالمات من الكمبيوتر. كمان ممكن تعدل نغمة التليفون وتفعل خاصية فقدان التليفون اللي بتعرفك التليفون فين، وبيخليك تقدر تتحكم في ٦ تليفونات مع بعض.
من خلال "AirDroid" تقدر تتحكم في التليفون بكل سهولة حتى لو مكنتش موصله بالكابل.
تقدر تنزل نسخة الوندوز من هنا، ونسخة الماك من هنا، ونسخة الموبيل من هنا، وتقدر تستخدمه اونلاين بدون تحميل من اللينك ده.
Moborobo
البرنامج بيدعم كل الأجهزة وبيتيح لك التحكم في كل خصائص الجهاز وإدرتها من خلال الكمبيوتر الشخصي الخاص بك.
"Moborobo" مبيحتجش الانترنت عشان يشتغل كمان معدل الأمان فيه عالي، وبيسمحلك بتفعيل خاصية النسخ الاحتياطي بشكل تلقائي في كل مرة بتوصل فيها التليفون بالجهاز. ونقل الأسماء وخاصية فقدان الهاتف اللي بتعرفك مكان التليفون لو ضاع منك.
تقدر تحمل نسخة الوندوز من هنا، ونسخة الموبيل من هنا، وللأسف مفيش نسخة للماك منه.
