هيكركب الدنيا.. 8 أفكار تحمي طفلك المستكشف في البيت
لو خايفة إن حركة ابنك في كل ركن في الشقة تخليه يتخبط ويتعور ومش عارفة تعملي أيه عشان تحافظي عليه، يبقى متفكريش كتير لأننا هنقولك على شوية أفكار بعض الأمهات عملوها وجربوها في البيت ونفعت.
والأفكار دي هتساعدك في إنك تحافظي على سلامته وإن البيت كمان يكون متوضب وميحاولش مع الحركة إنه يوقع حاجة ويكركبه.
لزق على كبس الكهربا
أي كبس كهربا في البيت حطي عليه لزق بلاستك مخصوص ليه يكون جامد عشان ميعرفش يحط ايده جوا الكبس ويتكهرب ولما يشوف البلاستيك يبعد عن المكان اللي موجود فيه الكبس.
ورضوى سيد بتقولك بلاش تجربي تحطي بلاستر لأنها جربتوا كتير وكان بيتشال بسرعة والبلاستك ده بيكون مخصوص للكهربا بتسألي أي محل أنتي رايحاه عليه وتجيبيه منه.
التليفزيون على الحيطة
الطفل بيكون عايز يستكشف كل حاجة حواليه والتليفزيون من الحاجات دي، وطبعًا لو وقع عليه هتبقى مصيبة والحل أنك تعلقي التليفزيون على الحيطة زي ماعملت آية ريحان. والتعليقة دي شبه اللي بتشوفي التليفزيون متعلق عليها في المستشفى عشان ميحصلش إنه يجي عنده ويحاول يحركه.
في أول يوم.. إزاي تتغلب على خوف الطفل من المدرسة؟
قفل النيش بشريط ستان
راجية محمد قررت إنها تقفل النيش بالمفتاح عشان ميحاولش ابنها يفتحه ويوقع الحاجة ويكسرها ويتعور، ولو مش معاكي مفتاح اعملي زي ما سما منتصر عملت وجابت شريط ستان وقفلت بيه البوفيه لأن مكنش معاها مفتاحه وده عشان ابنها ميحاولش يفتحه ويكسر أطباق الصيني اللي جواه.
ومش شرط شريط ستان أو مفتاح ممكن تستخدمي أي حاجة تانية زي مثلًا الموجودة في الصورة دي.
ربط درف المطبخ بالقفل
درف مطبخك طبعًا بتكون مليانة حاجات لو الطفل شافها ومسكها هتعوروا ده غير كمان إنه هيوقع الحاجة اللي فيها ويكركب ليكي الدنيا، وعشان كدة آية سمير بتقولك إن أحسن حل تربطي الدرف كلها برباط وتحطي على الرباط قفل عشان ميعرفش يفك الرباط. وممكن مثلًا تجيبي المسطرة اللي في الصورة دي وتقفلي بيها الدرف.
«عشان تربي ابنك صح؟».. تعرف على أهمية الحديث مع الطفل
الطبخ على عين بوتجاز واحدة
سارة الشيخ بوتجازها 5 شعلات وهي قررت تطبخ على شعلة واحدة بس على اليمين جنب الحيطة عشان بتخاف تشغل الشعلات كلها وبنتها تدخل وتحصل مشكلة. فأنتي ممكن تعملي زيها وتستغني عن شعلات معينة وتشغلي شعلة واحدة ولو ده هيبقى صعب، ممكن تخلي حد يعملك الحاجز اللي أنتي شايفاه في الصورة ده بحيث لو أبنك عايز يلمس حاجة ميقدرش يطول.
إزاي تختار لعبة الطفل يحبها وتكون مفيدة؟
كاوتشوك على حواف الطربيزات
حافة أي تربيزة عندك لو اتخبط فيها ابنك هتعوروا جامد وعشان تتلافي المشكلة دي ياسمين العوضي بتنصحك أنك تجيبي كاوتشوك عامل كده زي ملمس كاوتش العربية بيتحط على حافة الترابيزة وبتجبيه من أي محل بيبع الحاجات اللي تخص الأطفال أو من أي محل أدوات منزلية.
تركيب حزام في الدولاب
أي دولاب عندك صغير برفوف ممكن يجي يجيب منه حاجة يروح واقع عليه وعشان كده جيبي النجار وخليه يركب ليكي في الدولاب من ورا حزام صغير بحيث لو الدولاب هيقع الحزام يشده. زي ما الصور موضحة.
شماعة تقفل الدولاب
بعد لما وضبتي دولابك وكل حاجة تمام ممكن في ثانية ابنك يفتحه ويوقع كل حاجة ويكركب الدنيا وعشان كده اقفلي الدولاب بالشماعة زي ما الصورة بتوضح وريحي نفسك.
