ريحة العرق الوحشة مشكلة.. بلاش الأكل ده
ريحة العرق مشكلة بتواجه كتير منا وطبعًا بتسبب إحراج، عشان كده في التقرير ده من «شبابيك» هنعالج المشكلة دي ونقولك إيه اللي بيخلي ريحة عرقك وحشة بحيث تتجنبه، وإيه الحاجات اللي بتخلي ريحة العرق مقبولة بحيث تاخد بالك، وكمان لو كانت كمية عرقك كتيرة إزاي تتعامل معاها.
التعامل مع العرق الكتير
أستاذ التثقيف الغذائى بالمعهد القومى للتغذية مجدي نزيه بيقول إن لو أنت بتعرق كتير دي ميزة مش عيب لأن العرق ده بيطرد السموم والأملاح الزيادة من الجسم، لكن لازم تشرب مية كتير عشان تعوض اللي فقدتها من جسمك خلال العرق، وشرب المية لازم يكون أساسي في يومك بجانب أكل الخضروات والفاكهة.
للرجال.. استعمال مزيلات العرق يزيد من جاذبيتك في أعين النساء
أكلات تسبب ريحة عرق كريهة
واستشاري التغذية العلاجية خالد يوسف بيقول إن الأكلات اللي بتساعد على إن ريحة العرق تطلع وحشة هي السردين، والرنجة، والفسيخ لأنها بتحتوي على بكتيريا، والبكتيريا دي بتطلع في هيئة عرق ريحته وحشة فعليك إنك تتجنبها.
أما استشاري التغذية العلاجية ليندا جاد بتقول إن البسطرمة، وأغلب الوجبات السريعة «فاست فوود» برضه بتساعد على إنها تخلي ريحة العرق تكون وحشة فتجنبهم.
وبالنسبة للمشروبات، فالحلبة من المشروبات اللي أجمع «يوسف» و«ليندا» على إنها بتطلع ريحة عرق وحشة لكن على الرغم من كدة فهي ليها فوايد صحية منها إنها بتساعد على طرد السموم من الجسم، وبيقول «نزيه» إنها كمان مفيدة للحوامل والمرضعات لأنها بتزود اللبن عند الأمهات.
للمرأة.. 5 نصائح تجنبك إحراج «عرق الصيف»
لريحة عرق جيدة
بيقول «يوسف» إن عشان ريحة العرق تكون كويسة، مش وحشة عليك إنك تتبع نظام تنظيف الجسم كل أسبوع عن طريق مجموعة من الآكلات، وهي: طبق من الفروت سلاط، وطبق تمر مع لبن، وطبق موز مع لبن، وتاكل أي حاجة فيهم مرتين في الأسبوع.
يعني مثلًا طبق فروت سلاط مرتين في الأسبوع، وطبق موز مع لبن مرتين، وهكذا. و«ليندا» بتقول إن كتر أكلك للخضار والفاكهة بيساعد برضه على إن ريحة العرق تطلع جيدة.
أما المشروبات فعندك الشاي الأخضر، والكرفس، والبقدونس، وأي عصير فيه خل تفاح مع نص ليمونة.
وبيقول «نزيه» إن شرب الماية كتير بيخفف من تركيز ريحة العرق المركزة، وبيساعد على إنها ما تطلعش ريحة وحشة، وبينصحك «يوسف» إنك تشرب 3 لتر مية يوميًا.
أما الدكتورة بالمعهد القومي للتغذية ملك صالح بتقول إن إحدى أسس التغذية هي نظافة الجسم والاستحمام الدائم اللي لازم تتم مع التغذية السليمة للفرد لأن في أثناء الاستحمام المسام بتتفتح وبالتالي الهوا النقي بيدخل جوا الجسم فبيساعد على إن ريحة الجسم تكون كويسة وبالتالي ريحة العرق بتكون جيدة.
