عايز تتعلم أوريجامي؟.. الورش دي هتجيبلك من الآخر
الأوريجامي فن ياباني معناه «طي الورق» وفيه تقدر تعمل أي شكل أنت عايزه سواء حصان، أو فراشة، أو مكعب، أو كرسي أو أي شكل تاني من خلال طي الورق. وبعد ما اتعرفت بقى على فن الأوريجامي، هل تحب تتعلمه؟ لو حابب يبقى اقرأ الموضوع ده عشان تعرف الأماكن اللي هتتعلم فيها.
مركز «The workshops» بيعمل مجموعة من الورش في مجالات مختلفة بشكل مستمر منها مثلًا ورشة تعليم فن الكروشيه، والأوتوكاد، وتصميم وتفصيل الملابس. وورشة تعليم فن الأوريجامي من الورش اللي هيعملها يوم 17 ديسمبر، وهتكون لمدة 3 أيام بداية من يوم 17 لحد يوم 19.
وفي أول يوم هتتعلم أساسيات الفن، وفي التاني هتعرف تقنيات متقدمة أكتر للأوريجامي، أما في تالت يوم هتعمل زينة الكريسماس باستخدام كل اللي اتعلمته في فن الأوريجامي.
ميعاد الورشة من الساعة 11 الصبح لـ2 الضهر أيام 17، و18 أما يوم 19 هتكون من الساعة 3 العصر لـ6 بليل. وسعر الورشة هيكون 300 جنيه للتسجيل فيها هتدخل على اللينك من هنا.
أكاديمية «Origami world academy» مختصة بتعليم الناس فن الأوريجامي وبتعمل من وقت للتاني ورش. والورشة الجاية هتكون من يوم 22 لـ 24 ديسمبر وهتتعلم فيهم أساسيات فن الأوريجامي وهتعرف معلومات عنه، وهتتعلم إزاي تبدأ تشكل أي شكل في دماغك وكمان هتتعرف على أفكار مختلفة تقدر بيها توظف الأوريجامي في صناعة منتجات مختلفة على سبيل المثال إكسسوارات، وميداليات، وديكورات، ووحدات إضاءة. الورشة هيكون سعرها 150 جنيه وميعادها من الساعة 4 العصر لـ 8 بليل.
ومكانها هيكون في مؤسسة بوهيميان في ميدان الساعة بمدينة نصر، عمارة 24، شقة 4 الدور الأرضي. ولو عايز تحجز وتسأل على أي حاجة اتصل على 01002810901، 01064347572.
«Cairo art space» عبارة عن مساحة عمل فنية بيتم فيها عمل مجموعة من الورش الفنية. وتعليم فن الأوريجامي من الورش اللي بيعملها المكان من وقت للتاني. وهيكون فيه ورشة قريب يوم 25 ديسمبر وسعر الورشة 70 جنيها شاملة الخامات اللي هتحتاجها، والفطار والمشروب ومدتها هتكون 3 ساعات من 11 الصبح لـ 2 الضهر.
عنوان المكان 49 شارع حسن أفلاطون، النزهة، أرض الجولف. ولو عايز تعرف تفاصيل أكتر اتصل على 0101 270 0054.
المركز بيعمل على نشر ودعم فن الأوريجامي في الوطن العربي من خلال الإتحاد مع فناني الأوريجامي محليًا واقليميًا وعالميًا، والتأكيد على دور الأوريجامي في العملية التعليمية والتربوية ، ومحاولة لدمجه مع بعض الفنون الأخرى. وبيقدم خدمات وفرص ودعم للعاملين في المجال الثقافي والفني والتعليمي باستخدام فن الأوريجامي وطبعًا الورش من الخدمات اللي بيقدمها وعشان تشترك في ورشة المركز الجاية عليك إنك تدخل على اللينك من هنا وتملى استمارة الاشتراك.
تعرف على فن الأوريجامي مع «فنان مش مشهور»
