«أنا فنان بوهيمي يعمل ما يحلو له».. أحمد راتب في 5 شخصيات لا تُنسى
«المحاكم عندينا إيدها خفيفة قوي وهى بتدي حكم بالسجن والإعدام وإيدها تقيلة قوي وهى بترجع الحقوق لأصحابها» و«ياعمي أنا فنان بوهيمي يعمل ما يحلو له». هكذا ردد الفنان أحمد راتب قبل أن يرحل عن عمر يناهز الـ67 عاما، قدّم خلال مسيرته في التمثيل مجموعة من الشخصيات بطابع خاص يميز كل منها عن الأخرى. هذه الشخصيات ربما قابلت في حياتك شبيهها.
عيسوي.. الفنان البوهيمي
عيسوي في فيلم يارب ولد كان شعاره في الحياة «أنا فنان بوهيمي يعمل ما يحلو له» وكان حماه فريد شوقي متعصب إنه مش بيستحمى وطول الفيلم بيقولوا ادخل استحمى لكن على مين! عيسوي مكنش في دماغه الموضوع وكان رده عليه دايمًا «ياعمي أنا فنان بوهيمي يعمل ما يحلو له ويلبس ما يحلو له».
سامح ..بلاها نادية وبلاها سوسو
فؤاد المهندس في مسرحية «سك على بناتك» كان مصمم يجوز أحمد راتب اللي كان بيمثل دور سامح عبد الشكور حد من بناته الإتنين إما نادية أو سوسو، وسامح برغم إنه سبق وإختار سوسو لكن غير رأيه وبقى عايز نادية. إلا إن فؤاد كان مصر إصرار غير طبيعي إنه يتجوزوا سوسو وبعد ماسوسو عملت فيه مقلب ريا وسكينة حلف وقال لفؤاد «بلاها نادية وبلاها سوسو».
شلبي.. المحاكم إيدها خفيفة
«المحاكم عندينا إيدها خفيفة قوي وهى بتدي حكم بالسجن والإعدام وإيدها تقيلة قوي وهى بترجع الحقوق لأصحابها» الكلام ده من ضمن مونولوج قاله احمد راتب لعادل إمام وهو في قمة الحسرة والحزن في فيلم الإرهاب والكباب.
شلبي اللي اتعرض للظلم والقهر واتسرقت أرضه من حد ليه نفوذ وسلطة وقعد يتنقل من قاضي لقاضي في المحاكم 16 سنة عشان يعرف ياخد حقه ومحدش جابه ليه. ولما اتهور وقرر ينتقم بنفسه صدر في خلال 3 شهور حكم بإعدامه.
تجسيد شخصية القصبجي
استطاع راتب في مسلسل ام كلثوم يقدّم دور الفنان محمد القصبجي اللي عزف معظم أغاني الست. وجسّد الشخصية بحرفية شديدة وخلى المشاهد يعتبره مرجع ليه يتعرف من خلاله على حياة القصبجي اللي معظمنا منعرفش عنها حاجة، غير إنه بيعزف على آلة العود في حفلات الست وكان بيحبها ولما مات، أم كلثوم خلت الكرسي بتاعة فاضي زي ما هو في حفلاتها.
علي عبد الظاهر.. فيه مشكلة هتقابلنا
علي عبدالظهر اللي هو أحمد راتب كان صاحب عادل إمام في فيلم واحدة بواحدة وكان بيشتغل في الشركة الإعلانية بتاعته وكان دورة سلبي ودايمًا يحسسه إنه فيه مشاكل هتقابلهم في الشغل في المستقبل، ومكنش مثلًا يديه حل معين لأ ده كان كل شوية يحسسه إن أي حاجة صعبة.
