عايزة تبقى مصممة أزياء؟.. 4 أماكن هيعلموكي كل حاجة
بتحلمي تكوني مصممة أزياء وتصميماتك يختاروها المشاهير ويلبسوها في المحافل المحلية والدولية بس مش عارفة إيه المكان اللي يقدر يعلمك، طيب في الموضوع ده من «شبابيك» هتلاقي مجموعة من الأماكن اللي تقدري من خلالها تتعلمي كل ما يخص تصميم الأزياء.
مصممة الأزياء إلفا أحمد عندها مقر اسمه «رِفقة» بتعلم فيه بشكل دايم كل بنت عايزة تكون مصممة أزياء محترفة، وسعر الورش في المكان بيتراوح مابين 650 و1300 جنيه.
عنوان المكان: أول الهرم، مجمع عمارات نصر الدين، الدور الثالث، عمارة رقم ٦، والمكان قريب من جامع نصر الدين.
«بنفسج» ده مكان مخصص لتلبية احتياجات البنات في مختلف المجالات فهو عبارة عن مساحة عمل، ومكان للمذاكرة، وتنظيم فاعليات، وإقامة ورش مختلفة سواء فنية، أو ثقافية، أو علمية. ومن ضمن الورش اللي بيعملها بشكل دايم هي ورشة تصميم الأزياء وبيكون سعرها 600 جنيه.
عنوان «بنفسج»: 3 شارع الموسيقار علي إسماعيل، ميدان المساحة، الدقي، الدور السابع.
«آرت سكوير» ده عبارة عن أكاديمية فنية بتقدم مجموعة من الورش بشكل دايم في مجالات الديكور، والرسم، والأزياء. وورشة تصميم الأزياء عندها بتكون سعرها 4000 جنيه، وفيها بتعرفي إزاي تعملي تصميم وترسميه ومبلغ الورشة بتدفعيه على مراحل مش كله مرة واحدة.
عنوان المكان: 222 شارع الحجاز، جنب نادي الشمس، هليوبوليس. ولو عايزة تعرفي معلومات أكتر عن الورشة اتصلي على 01222383721 ، ولو حبة تتفرجي على مشاريع تخرج الدفعات اللي كانت في الورشة قبل كده ادخلي على لينك الموقع من هنا.
مركز «باب عشرة» بيقدم أنشطة متنوعة من ورش عمل في مختلف الفنون وعروض أفلام وتنظيم ندوات ثقافية ومعارض وغيرها من الخدمات.
ومن الورش اللي بيقدمها ورشة تصميم الأزياء اللي بيكون سعرها 1300 جنيه. و«باب عشرة» موجود في إسكندرية في شارع مرتضى، متفرع من شارع أبو قير، في منطقة جناكليس جنب صيدلية أسامة الطيبي.
لو عايزة تعرف تفاصيل أكتر اتصلي على أي رقم من الأرقام دي: 01220841384 - 01223541065 – 01211624006
الخبرة العملية
مصممة الأزياء نور الصواف بتنصحك إنك لازم بعد لما تتعلمي تصميم الأزياء تدربي عملي في أي مكان سواء أتيليه تروحي ليه وتقولي إنك عايزة تتعلمي، أو تسألي اللي كان بيعلمك على مصانع تروحيها تدربي فيها، أو تروحي إنتي بنفسك لأي مصنع من مصانع الملابس وتقولي ليهم إنك تدربي هناك.
وطبعًا لازم متكونيش منتظرة مقابل مادي تاخديه في البداية وخلي همك الأول والأخير إنك تدربي وتتعلمي.
ده تسرع
«الصواف» بتنصحك كمان إنك متتسرعيش وتعملي صفحة على الفيس بوك فيها تصميماتك غير لما تكتسبي خبرة كبيرة تخليكي قادرة تقدمي شغل مختلف يشد الناس. ويوم ما تتأكدي من ده اعملي الصفحة.
