ليها مفعول السحر.. 18 طريقة تنهي بها «نكد مراتك»
مراتك نكدية وخانقاك، ومعيشاك في مشاكل على طول، مهما تعمل معاها تلاقيها بتفتكر القديم والجديد، وتعمل عليه مشكله. بتلاقيها قاعدة تعيط من غير سبب، وتتخانق معاك.
قبل ما تفكر انك تطلقها، أو تتجوز عليها أو تسيبلها البيت. هنقدملك حيل استخدمها بعض الرجال اللي اتكلمنا معاهم عشان يتخلصوا من نكد زوجاتهم.
طنش النكد
وهنا، منقصدش أنك تنطش مراتك، لا خالص، بالعكس احنا نقصد انك تتطنش النكد الي بتفتعله في البيت، واعتبره مش موجود، وتحاول تقابله بحاجة كويسه تعملها في البيت، وركز على الحاجات الكويسه الي فيها واللي بتعملها، وامدح فيها، وقتها هتتكسف، انها بتنكد عليك، وانت بتحاول تكبر دماغك، وهتبطل تنكد عليك.
دلعها
الست النكدية علاجها في ايد جوزها نفسه، بس العلاج بيكون بالحنية يعني لو لقتها مضايقة طبطب عليها، واسمعها، وحاول تبسطها، وقولها «ضحتك حلوة، ومينفعش تغيب عنك».
ابتسم
الابتسامة ليها مفعول السحر على البنات، فايه رأيك أول ما تصحى من النوم تبتسم في وشها، وتقولها «صباحك جميل»، او«احلى حاجة اني بصحى الاقيكي جنبي»، ولو لقتها مضايقة، جرب تبتسلمها ابتسامة رقيقة كده، وتقولها متزعليش نفسك كل حاجة هتحصل زي مانتي عاوزة، بس انتي اهدي، ومتضايقيش، الابتسامة دي هتخليها تحس بالأمان، لأن غالبا الست النكدية بتكون مفتقدة الأمان في حياتها.
via GIPHY
حضن مفاجئ
جرب أول ما تدخل البيت تحضنها جامد، هتلاقيها مستعدة تجيبلك نجمة من السماء، أو لو لقتها متنرفزة، وعماله تتكلم، وتدور على القديم والجديد، واسمع واسمع تانى، وركز، وفجأه احضنها جامد، هتلاقيها ابتسمت، وحست انك متعاطف معاها واتطمنت، لأن غالبا الست النكدية بتكون عايشة في دور المظلومة، والمقهورة، وانت بالطريقة دي هتعيش معاها بردو، وبالتالي هتحس انك شاركتها، وممكن تلاقيها شكرتك انك سمعتها، وحسيت بيها، وبالتالي هتحاول تردلك تقديرك دا.
اتعشوا مع بعض واديها أمل
جرب تخدها وتخرجوا تتعشوا بره، تغيروا جو، وتحسسها إن فى جديد في الحياة، واتكلم معاها عن المستقبل، بس بشكل إيجابي، يعني مثلا ممكن تقول:«انا هدخل جمعية، واوضب الشقة»، أو «انا هشتري شقة حلوة في أي مكان تحبيه»، حسسها إن في أمل في الدنيا.
اعملها الأكل في يوم
جرب تدلعها وهتلاقي على طول «البوز اتفرد»، يعني لو لقتها بتقول انا الي شايله البيت كله لوحدي ومحدش حاسس بيا، انا كده طول عمري شايلة الهم، حاول تقوم تساعدها في يوم أجازتك، واعمل أكله حلوة، هتبسطها، ومش هتنسالهالك.
اتفاهم معاها
التفاهم هو مفتاح راحة البال، ناقشها، وامتص غضبها، وحسسها انها صح، حتى لو انت مش مقتنع، ومش هتعمل الي هي عاوزاه المهم انك تسمعها.
سحر الشوكولاتة
لو لقيت مزاجها متعكر، ومضايقة، وعمالة تتخانق، اضحك عليها بشوكولاتاية، أو أي هدية بسيطة، هتفرح بيها أوي، وهتحس انك مقدرها، وهتحاول تردهالك بطريقتها، مش بعيد تلاقيها عملالك صينية كيكة أو بسبوسة، أو حتى أكله أنت بتحبها، ومش شرط تستناها لحد ما تتنرفز، ممكن تجيبهالها وانت راجع من الشغل مع كلمة حلوة، تأثير دا هياخد وقت طويل معاها.
هاتلها هدية من غير مناسبة
هات لها هديه، من غير مناسبة، حتى لو وردة معها ورقة مكتوب عليها بحبك، أو خاتم، وخليها تغمض عنيها ولبسهلها، أو سلسله ولبسها لها قدام المراية، هتفضل فاكرهالك، وتقعد تفكر تردهالك ازاي.
اتصل بيها في نص اليوم
اتصل بيها اول ما توصل شغلك، او وقت الراحة، أو بعد ما تخلص، وقولها وحشني صوتك، أو بحب اسمع صوتك عشان اخد طاقة إيجابية، فالست النكديه الاهتمام بيلهيها، وغالبا هتلاقي الست النكدية إما محبه جدا وإما غيورة جدا أو تعبت كتير في حياتها، وخايفة، عشان كده الاهتمام بها هو أضمن وسيلة عشان تطمنها، والاهتمام بيكون بالتعامل الرقيق، وكمان انك تجيبلها حاجة هي بتحبها مفاجأة، هتفضل فاكراها فترة طويله وتحاول تردها باي شكل، وعلى ما يخلص تأثير الهدية تكون فكرت في حاجة تانية.
جاملها دايما وحسسها بنفسها
لو ملكش مزاج تجيب هدية، خليها كده بتحضر الأكل، وادخل قولها «بحبك.. حبيبيتي ريحة الاكل تجنن، تسلم ايديك.. وحشتيني.. انتي أعلى حاجة في حياتي»، ولو مش بتعرف تقول كلام حلو اهديها كام أغنية رقيقة، وقولها الاغنيه دي بتفكرني بيكي، أو بحس انها مكتوبة ليكي مخصوص، وابعتها لها على الفيس أو الواتس، وخد بالك الست النكدية ضعيفة أوي أدام أي كلمة حنينة.
via GIPHY
صورها سيلفي كتير
من أغرب الطرق اللي الأزواج اتكلموا معانا فيها وبيقولوا إنها بتغير مود البنت للأفضل، انك تصورها سيلفي، بس ممكن دي تكون طريقة مناسبة لبعض البنات، مش كلهم، خصوصا المهوسات بالتصوير، جرب تصورها سيلفي وهي عماله تدور وتفتكر المشاكل، واتكلموا عن الصورة شويه، ودي فرصة هتساعدك تغير الموضوع اللي بتتكلموا فيه.
ارقصوا
الرقص بيحسن النفسية وبيغير المزاج، وهيخليك مبسوط كده، وجواك طاقة كبيرة، عشان كده لو لقتها قاعدة شغل الأغنية الي رقصت عليها سلو معاها يوم فرحكم، وارقصوا عليها وافتكروا يوم الفرح، أو حتى شغلوا أغاني شعبية وارقصوا عليها واتنططوا، هتلاقوا نفسكم غيرتو جو، من غير ما تتنقلوا من البيت.
اتجننوا
اتجنن معاها، انزلوا في عز الشتا، وكلوا أيس كريم، انزلوا اتمشوا في شوارع غريبة عنكم، جربوا تعملوا مقالب في بعض.
اوعى تنسى التواريخ المهمة
عيد ميلادها، وعيد جوازكم دول من الحاجات المقدسة، اوعى تنساها، وحاول تعملها مفاجأة قبل اليوم دا بأسبوع مثلا، وهدية حلوة، وياريت تحاول تفتكر التواريخ المهمة عندها والتواريخ دي هي أول يوم شوفتها فيه، أول مرة قولتلها بحبك، يوم ما طلبت ايدها، أول مرة اتقدمتلها، حاول تفتكرهم، ومع كل حاجة هدية، حتى لو شوكولاتة، او بوبوناية، أو خاتم ب5 جنيه، هتفرح بيها.
هدّيها بالصلاة
لو لقيتها عمالة تنكد عليك، سيبها تزعق وقول لها صلي ركعتين، وقوم صلي، هتلاقيها جت وراك، وصلّت معاك.
اصبر عليها
خرجها وفرحها ولما تنكد عليك تعالى على نفسك واعمل حاجه تبسطها في المقابل، لو لقتها متغيرتش فهمها انك بتحاول تسعدها وهيا مش عايزه تساعدك في ده، واطلب منها تساعدك, لو متغيرتش، خليها تروح عند أهلها فترة بحجة انها محتاجة تريح أعصابها، يومين بالكتير، لو بردو ملقتش نتيجة هددها انك ممكن تسيبها، او تدور على واحدة تانيه تفرحك، طنشت، يبقى بيت أبوها أولى بيها.
اتعود على كده
لو مش عاوز تتعب نفسك، وتعمل أي حاجة تخليها تتغير، حاول تتعود على طبعها، وأسلوبها عشان الحياة تمشي.
وفي النهاية لازم تعرف ان تغيير أي طبع، بيحتاج شوية وقت، يعني حاول تعمل كده باستمرار، وهتلاقي نفسك امتلكتها، وهتلاقيها اتغيرت معاك، انت بس اصبر عليها شوية، خد بايديها، هي متولدتش نكدية هي اكتسبته من الحياة، فلازم تكون قوي وصبور وقادر علي التغيير باسلوب يقنعها نفسيا، غلط تتنرفز عليها، وتشهد الناس عليها، معتقد انها هتتغير، ولا تقتنع، لا بالعكس، انت كده ممكن تكسرها، وتتقلب من انسانة نكدية لواحدة صامتة، لاتحب تتكلم، وحزينه، وهتخسرها، لأنك جرحتها، عشان كده جرب الطرق دي ومش هتخسر حاجة.
