كيف أتعامل مع زوجي العصبي؟ 15 طريقة تنهي بيها عصبية جوزك
«عصبي جدا بس قلبه طيب وبيطلع وينزل على مفيش وبيسامح بسرعه».. الجملة دي مفيش واحدة متجوزة راجل عصبي مقالتهاش، بس وقت ما يكون متعصب بتنسى طيبته، وانه متسامح، وتركز بس في أسلوبه وعصبيته.
في التقرير ده بنقدملك مجموعة طرق تقدري بيها تحتوي جوزك العصبي، وتخليه معاكي أنتي هادي، حتى لو كان عصبي مع كل الناس
متتعصبيش
أكيد عصبية جوزك بتعصبك، وتخليكي تفقدي أعصابك، بس استشاري العلاقات الأسرية أسماء مراد، بتقولك، مينفعش تكونوا انتو الاتنين عصبيين، عشان كده حاولي تكوني هادية خصوصا وقت عصبيته، واعتبري نفسك هاديه، هتلاقي نفسك بقيتي كده فعلا، عشان تعرفي تتعاملي معاه، من غير خساير.
اعتبريه ابنك
على فكرة الرجل طفل كبير، لازم تتعاملي مع الحقيقة دي، خصوصا مع الرجل العصبي، لأن غالبا هتلاقي قلبه طيب، ويتعصب، ويطلع، وينزل على مفيش، عشان كده اتعاملي معاه كانه طفل، في الوقت دا بس، وحاولي تهديه وقت عصبيته، دا الي قالته "مراد".. ودا مش معناه أنه مش راجل أو معندوش مسؤولية،ولكن المقصود هنا المشاعر.
متروديش وتمشي
استشاري العلاقات الأسرية بتحذرك من الرد على جوزك لما يكون متعصب، وبتنصحك أنك تقفي وتتحملي كلامه، وتسمعيه بأدب، ومتقوليش غير"اه معاك حق".. "طب أخر مرة".. "انا اسفة مش هعمل كدة تاني"، و"فاهماك والله".
دا لو متعصب منك أنتي، بس لو متعصب بقى من حاجة تانيه، في الشغل أو من حاجة غلط هو عملها، استشاري الصحة النفسية الدكتور علاء رجب، بيقولك، :"هديه خالص، ودعميه، حتى لو هو غلط، قوليله فيها إيه يعني لما تغلط، أنت هتعرف تقوم وتقف على رجلك بسهولة.. ولو هو صح ومحدش مقدره قوليله أنت عارف أنك شاطر، واكيد هيعرفوا قيمتك".
أياكي والشكوى
الرجل العصبي خلقه ضيق جدا ودايما بيكون على تكة، لما تفضلي تشتكيله هتلاقيه اتعصب، وانفجر فيكي أنتي، عشان كده أسماء مراد اقترحت أنك متشتكيش قدامه، وتقولي الحاجات اللي مزعلاكي.
في الوقت اللي يكون هو هادي، وبأسلوب حكوي مش شكوى، ممكن تتكلمي، يعني مثلا بدل ما تقولي :"أنا تعبانه اوي ومش قادره اعمل حاجة"، ممكن تقولي :"تصور بقالي كام يوم ضغطي واطي وبدوخ".. بدل ما تقوليله :"ولادك هيجنوني"، قولي :"تصور ولادنا دول اشقياء شكلهم طالعين لينا".
خلي بالك من تعبيرات وشه
لغة الجسد هي اللي هتفسرلك هو متعصب، ولا لأ، وكمان درجة عصبيته ممكن توصل لإيه، عشان كده خلي بالك لو لقيته بيجز على سنانه، يبقى هينفجر فيكي لو بتقاوحي أو بتجادلي، أو بتستفزيه.
لو بيخبط على ترابيزة أو على الحيطة، حاول تختفي من ادامه، او تاخديه على قد عقله في اللحظة دي لان رد فعله هيبقى عنيف، عشان كده خلي بالك اوي من حركات عينيه، ووشه، وحواجبه، لو رفع حاجبه يبقى بيقولك متبرريش، وقولي آسفه وخلاص.
في الغيرة
الرجل العصبي، في الغيرة بيكون مجنون، فمتروحيش أنتي تثيري غيرته، او عصبيته، عشان تلفتي انتباهه ليكي، أو عشان يهتم بيكي.. لا خدي بالك، رد فعله هيكون قاسي جدا، ومش هتتحميله، ودا اللي حبت توضحه ليكي "مراد".
رسائل مستفزة
الرجل العصبي مش بس في الغيرة بيكون مجنون، لا دا كمان مش بيحب حد يغير عليه، أو يحس أن حد بيتجسس عليه، وهنا بقى استشاري العلاقات الأسرية بتحذرك أنك تبعتيله رسايل مستفزة زي: "انت فين"، "بتعمل ايه"، "طب روحت هناك ليه".. هنا هيتعصب وهتعملي مشكلة من لاشيء.
قدميله اكله حلوة
مكدبش اللي قال أقرب طريق لقلب الرجل معدته، عشان كدة اقترحت الدكتورة أسماء مراد، انك تقدميله أكلات حلوة، بيحبها، أو عصاير ومشروبات لذيذة اول ما يدخل من البيت.. أنتي كده هيأتي له جو هادي، واستقبال حلو، وكمان بلاش أكل سبايسي عشان دا بيزود العصبية.
استغلي فترات هدوءه
زي ما قولنا الرجل العصبي بيكون طيب جدا، وصادق جدا في مشاعره، فحاولي أنك تستغلي وقت هدوئه، وتتناقشي معاه في أسلوبه، واتكلموا في الحاجات اللي بتضايقكم، وكمان الحاجات اللي بتعصبه، عشان تبطلي تعمليها، ويبطل هو يتعصب.
الأسئلة الغبية
متفضليش تقوليله "انت مضايق"، "انت اتعصبت"، "انت عصبي كده ليه"، "يو دا انت عصبي اوي".. وغيرها من الأسئلة المستفزة، واللي ممكن تعصبه، المفروض انك عارفه انه عصبي، فمتلحيش عليه بالاسئلة دي، لأنها هتترجم عنده لأفعال.
واستشاري العلاقات الأسرية بتقولك لو هو مضايق وانت حاسه بدا ومتكلمش بلاش تساليه، وقوليله تيجي نخرج، أكيد هيقولك لا انا مضايق، هنا بقى قوليله من ايه؟، لو اتكلم تمام، لو قالك مش وقته متلحيش هيجي وقت ويحكي لك.
خدي بالك من مثلث المشاعر
ركزت "مراد" على مثلث المشاعر، اللي يضمنلك أن جوزك يبقى هادي معاكي على طول مهما كان طبعه قاسي، أو عصبي، والمثلث دا بيتكون من 3 أضلاع وهم:
الضلع الأول (الهمس): يعني صوتك يبقى هادي ورقيق لما تتكلمي معاه، او تتناقشي مع ولادك.. فاكرة أيام الخطوبة كنتي إزاي؟ ارجعي بقى لنفس الأسلوب.
الضلع التاني (اللمس): لمساتك الحنينة، دي ليها مفعول السحر في تهدية أعصابه، احضنيه أول ما يرجع من الشغل، وحسسيه أنه روحك ردت فيكي لما رجع. طبطي عليه.. كل دا هيخلي أسلوبه معاكي أنتي مختلف عن أسلوب معاملته مع الكل.
الضلع التالت (النظرات): النظرة هي رسول الحب، جربي كده يبقى متعصب وتبصيله بحب كده بصة طويله، هتلاقيه هدي، او ابتسم حتى، وهنا تقدري تناقشيه، وتتكلميه معاه، وعلى فكرة مش لازم تستني لما يتعصب عشان تبصيله بحب، خليه قاعد مشغول كده، وافضلي بصاله، هتلاقيه انتبه لك، وهيقولك في إيه.
أبعدي شويه
لو جوزك من الشخصيات اللي بتحب تبقى لو حدها لما تتعصب، بلاش تبقي معاه خالص، خصوصا لو هو طلب منك دا.. ابعدي.. هو محتاج يقعد مع نفسه، ويفكر ومتخافيش دا مش بيعمل فجوة بينك وبينه، وشويه هتلاقيه جاي يكلم معاكي، او يناقشك.. ومتنسيش مثلث المشاعر.
طاقة العصبية
العصبية طاقة غضب زايدة بتكون مكبوتة عند الإنسان، وتقدري تخليه يفرغها في أي حاجة. وهنا الدكتور علاء رجب شايف، أن ممكن تفرغي الطاقة دي بأنك تاخديه وتنزلوا تتعشوا برة، تحضروا حفلة حلوة لحد بيحبه.
خليكي متفائلة معاه
متجيش تكملي معاه، وتسودي الدنيا في وشه، وتلاقيه اتعصب، وتقولي أنا مش عارفه هو متعصب من إيه؟ انتي ببساطة قفلتي الدنيا في وشه. لأ اديله أمل في الحياة، وفي نفسه، وقدراته، وفيكي وفي أولادكم، حطيله دايما طموح واكدي له انه يقدر يوصلها، خصوصا وانتي معاه، ودا اللي نصحك علاء رجب بالتركيز عليه.
بلاش قرارات
أنتي ممكن تلاقي جوزك وهو متعصب قالك كلام ضايقك، أو حتى يطردك من البيت، أو يطلب منك تعملي حاجة وانتي اصلا مش راضيه عنها.. بلاش تستقبلي منه أي أمر في الوقت دا، لأن جوزك على ما تعوديه، ولو عودتيه أن كل ما يتعصب عليكي هيطردك من البيت، او هتعملي حاجة انتي مش مقتنعه بيها، هيبقى دا أسلوبه، لا استني لما يهدى، ومتمشيش، وعاتبيه براحة، وناقشيه في الكلام اللي قاله براحة.
