خروجتك النهاردة.. استمتع بقصر البارون
خروجتك النهارده مختلفة خصوصا لو بتحب الأماكن التاريخية والأثرية، عشان كده هنوديك شارع العروبة على الطريق الرئيسي المؤدي إلى مطار القاهرة الدولي، وهناك هتلاقي قصر البارون، واللي يعتبر من أجمل الأماكن الأثرية، ودلوقتي بقى الشباب وخصوصا «الكابلز» بيعملوا فوتو سيشن فرحهم هناك.
القصر مفتوح أمام الزائرين من الساعة التاسعة صباحا حتى الثامنة مساء.
طب ايه الحلو في القصر بقى؟
بغض النظر انه مكان أثري وفخم جدا، كمان هتلاقي فيه قطع وتحف أثرية نادرة جدا، وممكن متلاقيهاش في العالم كله، دا غير الفيلة الهندية والعاج، والتماثيل الهندية والبوذية الموجودة من بره، وجوه القصر كمان هتلاقي متحف مليان تحف وتماثيل من الذهب والبلاتين، وساعة أثرية بتوضح الوقت بالدقائق والساعات والأيام والشهور والسنين مع توضيح تغيرات أوجه القمر ودرجات الحرارة، دا غير لوحه بتوريك إزاي كانوا في العصر الروماني بيحولوه لخمر.
ورغم كل دا هتلاقي القصر من جوه صغير، دورين بس، و7 أوض، وارضياته من المرمر والرخام المستورد من إيطاليا وبلجيكا، وهتلاقي نفق صغير بيوصل القصر بكنيسة البازيليك.
على فكرة القصر دا اتصور فيه أفلام سينمائية، زي فيلم الهارب لحسن فهمي وشادية، وأسف على الإزعاج لاحمد حلمي ومنة شلبي، وكمان فيلم حياتي مبهدلة لمحمد سعد، دا غير كليب اول مرة بتاع حماقي ودنيا سمير غانم في مسلسل لهفه.
طب ودا ايه قصته؟
بصوا، زمان في نهاية القرن الـ19، جه على مصر من الهند مليونير بلجيكي اسمه البارون إدوارد إمبان، وعشق القاهرة، وبنى منطقة مصر الجديدة، ولما مات في 1992، طلعت حوليه إشاعات كتير، وانه مسكون جن وعفاريت، لحد ما الحكومة ضمته لوزارة الأثار، وبقى من أهم الأماكن في مصر.
جرب تروح وتستمتع بأجمل مكان ممكن تشوفه في العالم، وخد معاك كاميرا، ووابقى قولنا رأيك.
