ملحقتش تشتري هدية عيد الحب.. اختار من الهدايا دي والحق نفسك
عايز تشتري هدية عيد الحب، بس خلاص مفيش وقت تفكر وتلف براحتك على محلات الهدايا عشان تشوف ممكن تجيب إيه؟.. في التقرير ده هنعرفك على مجموعة متنوعة من الهدايا، اللي كتير منها هتلاقي سعره على قد الإيد، وهيفرح شريكة حياتك.
برفان
البرفان من الهدايا الجميلة واللي في نفس الوقت مش هتكلفك غالبا أكتر من 100 جنيه، خاصة لو جبته تركيب، وده بحسب نصيحة عدد من أصحاب محلات العطور، اللي تواصلنا معاهم، واللي بينحصوك أنك تختار زجاجة شيك، وتغلفه وتحطه في «بوكس» صغير، مع الشوكولاتة اللي بتحبها.
اكسسوارات
البنات بتعشق الاكسسوارات، خصوصا الرقيقة، فلو عايز تفرح حبيبتك هاتلها سلسلة و(خواتم/ أساور) ومش هتكلفك أكتر من 50 جنيه..
ولو انت من سكان القاهرة بننصحك تروح محل (FIFTY) في شارع العراق اللي في المهندسين، وهناك ممكن كمان تلاقي عقود لطيفة وبتكون مناسبة جدا مع الطرح.. أو انسيال شيك.
ساعة
مش لازم بقى تروح تجيبها ماركة غاليه وتكلفك كتير.. في ساعات اكسسوار شيك ورقيقة جدا، ومش هتكلفك 70 جنيه.. وده في ضوء جولة قمنا بيها لعدد كبير من محلات وسط البلد، والدقي، والمهندسين.
منبه
المنبه هدية لطيفة، وعملية جدا.. ممكن تشتريها لو عارف أن شريكة حياتك نومها تقيل شوية وبتنام كتير.. الهدية دي حلوة في نظر بنات كتير استطلعنا رأيهم لأن كل ما هيرن المنبه هيفكرها بيك.
ماج
من الهدايا التقليدية غير المكلفة، واللي في نفس الوقت عملية جدا، والبنات بتحبها برضو.. لأن كل يوم هتشرب فيه مشروبها المفضل، هتفتكرك.
water ball
لو شريكتك رومانسية وفيها روح طفولة ممكن تشتريها (water ball).. وده هتفرحها اوي، لأن الموسيقى الرقيقة اللي فيها، ونورها البسيط بيدي بهجة غير طبيعية للبنات الرومانسية.
برواز
لو ظروف المادية بعافية شويتين ممكن تشتري برواز شيك، وفيه صورتكو سوا.. وسعر البرواز بيبدأ من 15 جنيه.
دبدوب
رغم أن الدبدوب من الهدايا التقليدية جدا في عيد الحب، إلا أن البنات ما زالت بتفرح جدا بالدبدوب كهدية سواء في عيد الحب أو في أي مناسبة تانية.
أسعار الدباديب بتبدأ من 45 جنيه في مكان زي حارة اليهود اللي بيبيع بسعر الجملة.. وبيوصل لـ400 جنيه في بعض المحلات.
شوكولاتة
مفيش بنت مبتحبش الشوكولاتة... فممكن تجيبلها أنواع مخصصة للهدايا بتكون مستوردة من بلجيكا، وغالبا هتلاقيها في محلات الحلويات المشهورة، أو في شارع مصدق اللي في الدقي، وفي محل اسمه (Top Toys)، وسعرها غالبا بيعدي الـ300 جنيه.
سلسلة فضة
البنات بتعشق الفضة، فممكن تجيبلها سلسلة فضة عليها اسمها.. وسعرها بيكون على حسب وزنها، لأن الفضة بتتحسب بالجيرام زي الدهب؛ في المتوسط سعرها ممكن يكون 200 جنيه.
