أحسن من 100 خروجة.. إزاي تحتفلي بعيد الحب مع جوزك في البيت؟

عيد الحب مناسبة حلوة ممكن تستغليها عشان تجددي فيها حبك.. ولو هتقضيه في البيت بسبب الظروف الاقتصادية مثلا  أو جوزك مبيحبش يخرج ويحتفل بره في اليوم ده، فأنت ممكن تحتفتلي بيه في البيت احتفال حلو بمية خروجة.

من الأول

 

لو جوزك بيصحى النوم الساعة 9 مثلا عشان يروح الشغل، هيبقى شيء رومانسي جدا، لو صحيتي اليوم ده قبل منه بساعة، وجهزتي فطار ملوكي مختلف عن أي فطار قبل كده، وحطيه على السفرة.. مع كوباية عصير أو سلطة فواكه «fruit salad».

بعد كده ممكن تصحي جوزك.. وبتنصحك استشاري العلاقات الأسرية ومدربة الأنوثة أسماء مراد، أنك «تصحيه بهدوء».

التجهيزات

 

بعد ما جوزك ينزل، ابدأي استعداداتك للاحتفال.. أولا.. حاولي تنضفي البيت كويس، وتغيري ملايات السرير، وتغيري الفوط اللي في الحمام، ورشي معطر جو بعد كده.. وغيرها من الأمور، اللي تحسسه أنه داخل الشقة زي يوم الجواز.

لما تخلصي التنظيف، ادخلي بقى على المطبخ..

في اليوم ده لازم تعملي الأكل اللي بيحبه.. وتكون مخططة أنك تحطي قدامه أكتر من نوع أكل بيحبه.. يعني مفيش مشكلة لو حطيتو قدامه (حمام محشي، ممبار، كفته،..) بخلاف المقبلات.

لما تخلصي تجهيز الأكل بقى، لازم انتى بقى تستعدي.. يعني زي ما بتقولك ريهام مختار (زوجة): «لازم تجددي في شكلك، وستايلك.. اعملي تسريحة جديدة بس يكون هو بيحبها، وطقم شيك يإما جديد، أو بقالك فترة ملبستيهوش، مع برفان حلو».

متابعة

طبعا قبل ميعاد وصوله بفترة بتكوني بتابعي معاه هو فين.. وتعرفيه أنك عامله أكل هو بيحبه.. وتطلبي منه مثلا أنه يرن عليكي وهو تحت البيت عشان محتاجه حاجه يجيبها معاه.

ولما يوصل جوزك تحت البيت، اعملي بقى اللمسات الأخيرة.. ولو فيه ورد ولا بلالين وشموع حطيها على السفرة وحوليها..

والسفرة بقى حطي عليها الأكل.. ويفضل يكون في طقم «سرفيس» من اللي في النيش دول.

جوزك وصل

لما يوصل جوزك بقى.. استقبليه بابتسامة حلوة، زي ما بيقولك استشاري العلاقات الأسرية الدكتور عمرو عادل.. وخليكي رومانسية معاه على السفرة وانتو بتاكلو.

 

وحاولي بقى تساعديه.. يعني لما يقلع لبسه، خديه منه وعلقيه انتي على الشماعة؛ وقدميلو لبس البيت.. وهكذا.

بعد الغداء

بعد الغداء ممكن بقى تقعدي معاه تدردشي معاه شوية.. واستشاري العلاقات الأسرية عمرو عادل بيوصيكي أنك تخلي اليوم ده بداية لعهد جديد في حياتكم، وبيقول :«خلوا اليوم ده يبقى بداية لحياة جديدة مفيهاش مشاكل، وخناق، بداية تتعرفوا فيها على بعض من جديد، وتفهموا بعض».

وبينصحكو «عادل» لو فيه مشكلة بينكم أنكو تحسموها، بالمناقشة والهدوء، والمنطق، وابدئي انتي مثلا قولي :«انت طلبت مني معملش كذا.. وانا هسمع كلامك، ومن هنا ورايح عمري ما هزعلك».

في السهرة

 

في الليل بقى أكيد بتسهروا قدام التلفزيون.. ممكن تتابعوا فيلم بيتعرض على التلفزيون.. أو انتي تكوني جايبه فيلم جديد من الأفلام اللي بتشده (أكشن/رومانسي/..) على فلاشة، وتشغلوه وتتفرجوا عليه سواء.

وخلال الفرجة بقى على التلفزيون بقى.. قدمي بقى ليه (عصائر، فشار، سلطة فواكه، كيك،..) وأي حاجه تانيه بيحبها وهو بيتفرج على التلفزيون.

بعد كده.. ممكن تسيبيه شويه، لو انتي جايبه هدية ليه، وحطيها على السفرة، مع «تورته» صغيرة مثلا.. أو عشاء حلو كده على ضوء الشموع.. واندهي عليه.. وخليه يتفاجئ في ختام اليوم بده.. قوليلو كل اللي في قلبك.

حاجه أخيرة

 

لو انتو متجوزين ومخلفين، ولادكو مش عائق خالص أنك تعملي كل اللي فات.. بالعكس خالص، دول ممكن يكونو شريك معاكي في تنظيم اليوم.. وفي تقديم الهدية لوالدهم اللي بيحبوه.. اللي هتعرفيهم أنه مهما زعل منهم أو اتعصب عليهم فهو بيحبكو، وبيشتغل عشان خاطر يجيبلكو اللي بتحبوه، فلازم نعرفه كمان اننا بنحبه، زي ماقالت أسماء مراد.